រាជធានីភ្នំពេញ ៖ លោក ប៉ាវ ស៊ីណា ប្រធានសហជីពចលនាកម្មករបានឲ្យដឹងថា ម្ចាស់រោងចក្រមួយចំនួនបានយឺតយ៉ាវក្នុងការបើកប្រាក់ចំណាច់អតីតភាពការងារក្នុងឆ្នាំ២០១៩ តាមការកំណត់របស់ក្រសួងការងារ ។
លោក ប៉ាវ ស៊ីណា បានឲ្យដឹងនៅថ្ងៃទី៣០ ខែធ្នូនេះថា ការត្អូញត្អែររបស់កម្មករជុំវិញភាពយឺតយ៉ាវនៃការបើករលឹកប្រាក់បំណាច់អតីតភាពការងារមុនឆ្នាំ២០១៩ និងការផ្តល់ប្រាក់បំណាច់អតីតភាពការងារចាប់ពីឆ្នាំ២០១៩ ។ លោកបញ្ជាក់ថា ៖«ក្រុមការងារយើងខ្ញុំបានពិនិត្យឃើញថា មានរោងចក្រមួយចំនួនពុំបានអនុវត្តន៍តាមការប្រកាសរបស់ក្រសួងការងារនោះទេ ពោល គឺអ្នកគ្រប់គ្រងរោងចក្របានយឺតយ៉ាវ និងពន្យាពេលបើករំលឹកប្រាក់បំណាច់អតីតភាពការងារមុនឆ្នាំ២០១៩ និងការទូទាត់ប្រាក់បំណាច់អតីតភាពការងារក្នុងឆ្នាំ២០១៩ ត្រូវតម្រូវឲ្យម្ចាស់រោងចក្របើកជូនកម្មករនៅក្នុងខែធ្នូនេះ ។
ប៉ុន្តែអ្នកគ្រប់គ្រងរោងចក្របានលើកទៅបើកជូនកម្មករនៅខែមករា ឆ្នាំ២០២០ ចន្លោះពីថ្ងៃទី០៥ ដល់ថ្ងៃទី២០ ខែមករា ឯណោះហើយក៏មានរោងចក្រខ្លះទៀតក៏ពុំទាន់បានកំណត់ថ្ងៃបើកជូនកម្មករផងដែរ ។ លោកបន្តថា ក្រសួងការងារ និងបណ្តុះបណ្តាលវិជ្ជាជីវៈស្តីពីការទូទាត់ប្រាក់បំណាច់អតីតភាពការងារបានតម្រូវឲ្យម្ចាស់រោងចក្រសហគ្រាសបើករំលឹកប្រាក់បំណាច់អតីតភាពការងារ និងការទូទាត់ប្រាក់ជូនកម្មករពីរដងក្នុង១ឆ្នាំ ការបើកជូននេះមានរយៈពេល៦ខែម្តង គឺបើកជូនរៀងរាល់ ខែមិថុនា និងរៀងរាល់ ខែធ្នូ នៃឆ្នាំនីមួយៗ ។
មេសហជីពបានអះអាងករណីបើកយឺតយ៉ាវនូវប្រាក់បំណាច់នេះ អាចជាចរន្តរុញច្រានទៅជាវិវាទដែលអាចកើតឡើងក្នុងកំឡុងពេលណាមួយ ប្រសិនបើនិយោជិកមិនបានអនុវត្តន៍ស្របតាមសេចក្តីប្រកាស ហើយក្រសួងការងារមិនបានចាត់មន្ត្រីចុះធ្វើការតាមដានដោយចិត្តទុកដាក់ទេនោះ ។
យោងតាមសេចក្តីប្រកាសរបស់ក្រសួងការងារត្រង់ប្រការ២ បានលើកឡើងថា ការផ្តល់ប្រាក់បំណាច់អតីតភាពការងារ២ (ពីរ) ដងក្នុងមួយឆ្នាំត្រូវអនុវត្តចាប់ពីឆ្នាំ២០១៩តទៅស្របតាមបែបបទដូចជា ៖ ទី១.និយោជកត្រូវផ្តល់ឲ្យកម្មករនិយោជិតដែលកំពុងបម្រើការងារនូវប្រាក់ចំណាច់អតីតភាពការងារដែលស្នើនឹងប្រាក់ឈ្នូល និងប្រាក់បន្ទាប់បន្សំចំនួន១៥ថ្ងៃក្នុងមួយឆ្នាំ ។ ប្រាក់បំណាច់នេះត្រូវបើកជូនកម្មករនិយោជិត ៖ ចំនួនប្រាំពីរថ្ងៃកន្លះនៅក្នុងខែមិថុនា នៃឆ្នាំនីមួយៗ និងប្រាំពីថ្ងៃកន្លះនៅក្នុងខែធ្នូ នៃឆ្នាំនីមួយៗ ។ ទី២.ចំពោះកម្មករនិយោជិតដែលចូលធ្វើការនៅក្នុងឆ្នាំដំបូង ហើយបានបំពេញការងារជាប់ជានិច្ចចាប់ពី១ខែ ទៅដល់៦ខែ និយោជកត្រូវផ្តល់ឲ្យកម្មករនូវប្រាក់បំណាច់អតីតភាពការងារចំនួន៧.៥(ប្រាំពីរកន្លះ)ថ្ងៃ ។
ប្រការ៣ ៖ ការបើកប្រាក់ខែចំណាច់អតីតភាពការងារមុនឆ្នាំ២០១៩ របស់កម្មករនិយោជិតដែលបាននឹងកំពុងបម្រើការងារនៅតាមគ្រឹះស្ថាន ត្រូវអនុវត្តតាមបែបបទដូចជា ៖ ចំពោះសហគ្រាស គ្រឹះស្ថាន ផ្នែកវាយនភណ្ឌ កាត់ដេរ និងផលិតល្បែកជើង និយោជកត្រូវបើករំលឹកចំនួន៣០ថ្ងៃ ប្រាក់បំណាច់អតីតភាពការងារសរុបរៀងរាល់១ឆ្នាំម្តង ដោយ ៖ ចំនួន១៥ថ្ងៃ នៅក្នុងខែមិនថុនា នៃឆ្នាំនីមួយៗ និងចំនួន១៥ថ្ងៃ នៅក្នុងខែធ្នូ នៃឆ្នាំនីមួយៗ ។
ចំពោះសហគ្រាស គ្រឹះស្ថានផ្នែកផ្សេងវាយនភណ្ឌកាត់ដេរ និងផលិតស្បែកជើងនិយោជកត្រូវបើករំលឹកចំនួន១៥ថ្ងៃ នៃប្រាក់បំណាច់អតីតភាពការងារសរុបរៀងរាល់មួយឆ្នាំម្តង ៕ កែសម្រួលដោយ ៖ សុឃាក់
ចែករំលែកព័តមាននេះ