ខេត្តបន្ទាយមានជ័យ ៖ «ច្រកចេញចូលតែមួយត្រូវបម្រើសេវារដ្ឋបាលសាធារណៈជូនប្រជាពលរដ្ឋប្រកបដោយតម្លាភាពនិងរហ័ទាន់ចិត្តតាមតម្រូវការរបស់បងប្អូនប្រជាពលរដ្ឋ»។ លោកអភិបាលខេត្តបានលើកឡើងបែបនេះក្នុងពិធីសម្ពោធដាក់ឱ្យប្រើប្រាស់អគារការិយាល័យច្រកចេញចូលតែមួយ នៅស្រុកព្រះនេត្រព្រះ។
លោក ឃូ ពៅ អភិបាលស្រុកព្រះនេត្រព្រះបានមានប្រសាសន៍ថា ការិយាល័យច្រកចេញចូលតែមួយ និងការិយាល័យប្រជាពលរដ្ឋស្រុកព្រះនេត្រព្រះត្រូវបានចាប់ផ្តើមសាងសង់ក្នុងខែមីនា និងរួចរាល់ក្នុងខែធ្នូ ឆ្នាំ២០១៩នេះ ដោយបំពាក់សម្ភារៈប្រើប្រាស់ និងបានរៀបចំមន្ត្រីអោយទទួលការងារក្នុងការិយាល័យច្រកចេញចូលតែមួយមាន អភិបាលរងទទួលបន្ទុកចំនួន១រូប ប្រធានការិយាល័យចំនួន១រូប អនុប្រធានការិយាល័យចំនួន១រូប និងមានសរុបចំនួន១៣វិស័យ និងមានមន្ត្រីទទួលបន្ទុកប្រគល់ទទួលឯកសារ និងព័ត៌មានចំនួន១រូប។
លោក អ៊ុំ រាត្រី អភិបាលខេត្តបន្ទាយមានជ័យមានប្រសាសន៍ថា សមិទ្ធផលថ្មីសម្រាប់រដ្ឋបាលស្រុកព្រះនេត្រព្រះក្នុងការបម្រើសេវារដ្ឋបាលសាធារណៈជូនប្រជាពលរដ្ឋប្រកបដោយតម្លាភាព និងរហ័សទាន់ចិត្តតាមតម្រូវការរបស់បងប្អូនប្រជាពលរដ្ឋ ។ ជាទូទៅរដ្ឋបាលស្រុកបានអនុវត្តការងារបានល្អប្រសើរ និងសម្រេចបាននូវសមិទ្ធផលសំខាន់ៗជាច្រើនទាំងការងារសន្តិសុខសណ្តាប់ធ្នាប់ការងារសេដ្ឋកិច្ច សង្គមកិច្ច។
លោកអភិបាលខេត្តបានបញ្ជាក់ថា ជាពិសេសស្រុកបាននឹងកំពុងលើកកម្ពស់ការអនុវត្តគោលការណ៍គោលនយោបាយរបស់រាជរដ្ឋាភិបាល និងបន្តយកចិត្តទុកដាក់លើការងារគ្រប់គ្រង និងការបម្រើសេវារដ្ឋបាលសាធារណៈជូនប្រជាពលរដ្ឋទាំងការអនុវត្តលិខិតបទដ្ឋានគតិយុត្តិនានា ការគ្រប់គ្រងលិខិតស្នាមនិងឯកសារផ្សេងៗ ការទំនាក់ទំនងជាមួយដៃគូអភិវឌ្ឍន៍នានាក្នុងគោលបំណងអោយដៃគូអភិវឌ្ឍន៍ផ្តល់កិច្ចសហការជាមួយរដ្ឋបាលស្រុកនិងជួយអោយប្រជាពលរដ្ឋបានយល់ដឹងអំពីសិទ្ធិសេរីភាពនិងសុខភាពអនាម័យ ដើម្បីលើកស្ទួយជីវភាពរស់នៅរបស់ប្រជាពលរដ្ឋអោយកាន់តែប្រសើរឡើងជាលំដាប់៕ (កែសម្រួលដោយ ៖ ធីតា)
ចែករំលែកព័តមាននេះ