រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា រោងចក្រផលិតគាវយីហោវៃយ៍ជូចំកាត់ ត្រូវបានអគ្គិភ័យឆាបឆេះរងការខូចខាតអស់មួយបន្ទប់ បណ្តាលមកពីឆ្លងចរន្តអគ្គិសនី បង្កឲ្យមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋ និងសមត្ថកិច្ចមូលដ្ឋាន រួមទាំងរថយន្តពន្លត់អគ្គិភ័យចុះមកអន្តរាគមន៍ កាលពីវេលាម៉ោង១២និង១០នាទីរំលងអធ្រាត្រ ឈានចូលថ្ងៃទី៣០ ខែធ្នូនេះ ត្រង់ចំណុចរោងចក្រផលិតគាវយីហោវៃយ៍ ជូចំកាត់ នៅតាមបណ្តោយផ្លូវ៥២៨ ស្ថិតក្នុងសង្កាត់បឹងកក់ទី១ ខណ្ឌទួលគោក ។
តាមប្រភពព័ត៌មានពីបុរសម្នាក់ឈ្មោះ ដួង វ៉ាន់ណេត អាយុ៣៤ឆ្នាំ ជាសន្តិសុខយាមកាម នៅក្នុងរោងចក្រកើតហេតុខាងលើ បានរៀបរាប់ប្រាប់ឲ្យដឹងថា នៅមុនពេលកើតហេតុក្នុងរោងចក្រខាងលើមិនមានកម្មករ ឬបុគ្គលិកធ្វើការនោះទេ គឺមានតែគាត់ និងបុរសជាសន្តិសុខម្នាក់ទៀត ដែលនៅយាមកាមតែប៉ុណ្ណោះ ។ បន្ទាប់មកពួកគាត់ងងុយដេកខ្លាំងពេកក៏បានទៅដេកក្បែរ និងបន្ទប់សម្រាប់បុគ្គលិកធ្វើការខាងមុខ ដែលជាបន្ទប់កើតហេតុខាងលើ ។ លុះដល់វេលាកើតហេតុគាត់ក៏បានធំក្លិនឈ្ងៀម ខណៈពេលដែលងើបមកមើល ស្រាប់តែឃើញមានអណ្ដាតភ្លើងកំពុងតែឆាបឆេះចេញមកពីបន្ទប់កើតហេតុយ៉ាងសន្ធោសន្ធៅ ។
ភ្លាមៗនោះពួកគាត់ក៏ប្រញាប់ប្រញាល់រត់ទៅបើកទ្វារចេញទៅខាងក្រៅ និងស្រែកឆោឡោបង្កឲ្យមានការណ៍ភ្ញាក់ផ្អើលដល់ប្រជាពលរដ្ឋដែលរស់នៅក្បែរកន្លែងកើតហេតុនាំគ្នាចេញមកទាញទុយោទឹកបាញ់ពន្លត់ និងរាយការណ៍ជូនសមត្ថកិច្ចមូលដ្ឋាន រួមទាំងរថយន្តពន្លត់អគ្គិភ័យឲ្យចុះមកអន្តរាគមន៍ ។ បន្ទាប់មកក៏មានរថយន្តពន្លត់អគ្គិភ័យរបស់ការិយាល័យបង្ការ និងពន្លត់អគ្គីភ័យនៃស្នងការដ្ឋាននគរបាលរាជធានីភ្នំពេញចំនួន៧គ្រឿង ចុះមកអន្តរាគមន៍បាញ់ទឹកពន្លត់ ដោយប្រើប្រាស់ទឹកបាញ់ពន្លត់អស់ចំនួន៣គ្រឿង ភ្លើងក៏បានរលត់ជាស្ថាពរ ។
តាមប្រភពពីសមត្ថកិច្ចបានឲ្យដឹងថា នៅក្នុងហេតុការណ៍ខាងលើមិនបណ្ដាលឲ្យឆេះរាលដាលដល់ផ្ទះអ្នកជិតខាងនោះទេ គឺឆាបឆេះតែបន្ទប់សម្រាប់បុគ្គលិកធ្វើការដែលមានទំហំប្រមាណ១០ម៉ែត្រគុណ និង៦ម៉ែត្រ និងសម្ភារមួយចំនួនដែលនៅខាងក្នុងត្រូវឆេះខូតខាតអស់ទាំងស្រុង ។ ចំពោះមូលហេតុសមត្ថកិច្ចបានសណ្ឋានថា បណ្ដាលមកពីឆ្លងចរន្តអគ្គិសនី ៕ កែសម្រួលដោយ ៖ សុឃាក់
ចែករំលែកព័តមាននេះ