ខេត្តបន្ទាយមានជ័យ ៖ មានករណីម៉ាស៊ីនច្រូតស្រូវខ្នាតធំមួយគ្រឿង ខណៈច្រូតសុខៗស្រាប់តែឆ្លងចរន្តអគ្គិសនីបង្កជាអគ្គិភ័យឆាបឆេះកណ្តាលវាលស្រែ កាលពីវេលាម៉ោង៧ព្រឹកថ្ងៃទី២៩ ខែធ្នូ ឆ្នាំ២០១៩ នៅវាលខាងភូមិកងវ៉ាង សង្កាត់កំពង់ស្វាយ ក្រុងសិរីសោភ័ណ។
ម្ចាស់ម៉ាស៊ីនច្រូតខាងលើឈ្មោះ លី ស៊ាវឡុង ភេទប្រុស អាយុ២៦ឆ្នាំ រស់នៅភូមិពង្រ សង្កាត់កំពង់ស្វាយ ក្រុងសិរីសោភ័ណ។
លោកវរៈសេនីយ៍ត្រី យ៉ាន សុវណ្ណ មេបញ្ជាការកងរាជអាវុធហត្ថក្រុងសិរីសោភ័ណបានឱ្យដឹងថា មុនពេលកើតហេតុ គឺម៉ាស៊ីនច្រូតស្រូវបានច្រូត២ទៅ៣មុខហើយ ស្រាប់តែឆ្លងចរន្តអគ្គិសនីបង្កជាអគ្គិភ័យឆាបឆេះផ្នែកខាងក្រោយ បង្កការភ្ញាក់ផ្អើលដល់ប្រជាពលរដ្ឋបាននាំគ្នាយកទឹកមកពន្លត់ រហូតដល់រថយន្តពន្លត់អគ្គីភ័យរបស់ស្នងការដ្ឋាននគរបាលខេត្តចុះមកជួយអន្តរាគមន៍ពន្លត់មិនឱ្យភ្លើងឆេះរាលដាលដល់ស្រូវក្នុងស្រែឡើយ។
តាមប្រភពដដែលបានបញ្ជាក់ថា មូលហេតុដែលមានអគ្គិភ័យឆាបឆេះម៉ាស៊ីនច្រូតខ្នាតធំនេះគឺបណ្តាលមកពីឆ្លងចរន្តអគ្គីសនីបង្កជាអគ្គិភ័យឆាបឆេះ តែត្រូវបានពន្លត់ទាន់ពេល និងបណ្តាលឱ្យរងការខូចខាតម៉ាស៊ីនច្រូតស្រូវផ្នែកខាងក្រោយស្ទើរទាំងស្រុង។
តាមប្រភពដដែលបានបញ្ជាក់បន្តថា ពេលអគ្គីភ័យឆាបឆេះម៉ាស៊ីនច្រូតស្រូវ សំណាងហើយឆេះតែម៉ាស៊ីនច្រូត មិនបណ្តាលឱ្យឆេះស្រូវក្នុងស្រែមិនទាន់ច្រូតនោះ ហើយករណីនេះធ្វើឱ្យប្រជាកសិករភ័យស្លន់ស្លោនាំគ្នាជួយគ្នាពន្លត់ផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ