រាជធានីភ្នំពេញ ៖ សម្តេចតេជោនាយករដ្ឋមន្ត្រី ហុ៊ន សែន បានថ្លែងថា សម្តេចសុខចិត្តទទួលយកយោបល់ពីសមាជិកឧត្តមក្រុមប្រឹក្សាពិគ្រោះនិងផ្តល់យោបល់ ជាជាងស្តាប់បញ្ជាពីបរទេស ។ សម្ដេចតេជោ…
រាជធានីភ្នំពេញ ៖ សម្តេចតេជោនាយករដ្ឋមន្ត្រី ហុ៊ន សែន បានថ្លែងថា សម្តេចសុខចិត្តទទួលយកយោបល់ពីសមាជិកឧត្តមក្រុមប្រឹក្សាពិគ្រោះនិងផ្តល់យោបល់ ជាជាងស្តាប់បញ្ជាពីបរទេស ។ សម្ដេចតេជោ ហ៊ុន សែន មានប្រសាសន៍បញ្ជាក់ថា បើទោះបីនៅក្នុងព្រះរាជក្រឹត្យយើងបានកំណត់ត្រឹមតែមួយអាណត្តិ ប៉ុន្តែដោយសង្កេតឃើញថា ភារកិច្ចដែលបណ្ដាគណបក្សនយោបាយចូលរួមដោយផ្ទាល់ជាមួយនឹងរាជរដ្ឋាភិបាល ខ្ញុំមានបំណងថា ក្រោយឆ្នាំ២០២៣ យើងក៏អាចស្នើសុំបន្តនូវក្បាលម៉ាស៊ីនឧត្តមក្រុមប្រឹក្សាពិគ្រោះនិងផ្ដល់យោបល់នេះបន្តទៀត ។
ព្រោះថា បើនិយាយពីប្រសិទ្ធភាពនិងកិច្ចការផ្ទាល់ដែលអស់លោក លោកស្រី បានធ្វើដោយផ្ទាល់ជាមួយនឹងរាជរដ្ឋាភិបាល គឺវាខុសគ្នាយ៉ាងច្រើនពីសមាជិកសភានៃបក្សប្រឆាំង ដែលតែងលើកសំណួរតាមរយៈសភាមកកាន់រាជរដ្ឋាភិបាល មកកាន់នាយករដ្ឋមន្ត្រី ឬមកកាន់រដ្ឋមន្ត្រីនានា ។ សម្តេចតេជោបន្តថា លោក-លោកស្រីដែលនៅជាសមាជិកសមាជិកាឧត្តមក្រុមប្រឹក្សាពិគ្រោះនិងផ្ដល់យោបល់ គឺមានឱកាសធ្វើការផ្ទាល់ជាមួយនឹងរដ្ឋមន្ត្រី ធ្វើការផ្ទាល់ជាមួយនឹងនាយករដ្ឋមន្ត្រី ហើយធ្វើការផ្ទាល់ជាមួយនឹងអាជា្ញធរថ្នាក់ក្រោមជាតិទៀតផង ។ ដូច្នេះចំណុចទាំងនេះ បើទោះបីថាស្ថានភាពពហុបក្សមិនមាននៅក្នុងសភា ក៏ប៉ុន្តែស្ថានភាពពហុបក្សនេះបែរជាមកកៀកនឹងក្បាលម៉ាស៊ីននៃអង្គការនីតិប្រតិបត្តិតែម្ដង ។
សម្ដេចតេជោមានប្រសាសន៍បែបនេះ កាលពីរសៀលថ្ងៃទី២៧ ខែធ្នូ ក្នុងឱកាសអញ្ជើញបិទសន្និបាតបូកសរុបការងាររបស់ឧត្តមក្រុមប្រឹក្សាពិគ្រោះនិងផ្តល់យោបល់ ដែលបានប្រារព្ធនៅសណ្ឋាគារសុខា ក្នុងខណ្ឌជ្រោយចង្វា ។ សម្តេចតេជោមានប្រសាសន៍ថា កម្ពុជាសុខចិត្តទទួលយកយោបល់និងរបាយការណ៍ក្នុងន័យស្ថាបនារបស់ឧត្តមក្រុមប្រឹក្សាពិគ្រោះនិងផ្តល់យោបល់ ដើម្បីជាធាតុចូលសម្រាប់ដោះស្រាយ និងធ្វើការកែទម្រង់ស៊ីជម្រៅរបស់រាជរដ្ឋាភិបាល។ សម្តេចតេជោនាយករដ្ឋមន្ត្រី បានបង្ហាញនូវការពេញចិត្តចំពោះយន្តការនិងរបាយការណ៍ការងាររបស់សមាជិករបស់ឧត្តមក្រុមប្រឹក្សាពិគ្រោះនិងផ្តល់យោបល់ទាំង១៦គណបក្ស ដែលបានផ្តល់ព័ត៌មាន និងរបាយការណ៍មកកាន់នាយករដ្ឋមន្ត្រីក្នុងការដោះស្រាយ ។
សម្តេចតេជោបានអះអាងថា សម្តេចសុខចិត្តស្តាប់និងទទួលយកយោបល់នានាពីសមាជិកនៃឧត្តមក្រុម
ប្រឹក្សានិងពិគ្រោះយោបល់ ប្រសើរជាងស្តាប់ការបង្គាប់បញ្ជាពីបរទេស ក្នុងការធ្វើនេះ ធ្វើនោះដើម្បីជា
ថ្នូរទៅនឹងជំនួយនិងប្រព័ន្អនុគ្រោះពន្ធ ។ សម្តេចតេជោ ហុ៊ន សែន បញ្ជាក់ថា របាយការណ៍របស់សមាជិកឧត្តមក្រុមប្រឹក្សានេះ បានក្លាយជាធាតុចូលដ៏សំខាន់សម្រាប់រាជរដ្ឋាភិបាលយកទៅពិចារណា ធ្វើជាធាតុចូលក្នុងការធ្វើកំណែទម្រង់ស៊ីជម្រៅរបស់រាជរដ្ឋាភិបាល ។
សម្ដេចតេជោនាយករដ្ឋមន្ត្រី មានប្រសាសន៍បញ្ជាក់ថា ខ្ញុំពេញចិត្តនឹងការទទួលយកយោបល់ទាំងឡាយ ហើយទោះបីថាមានចំណុចខ្លះដូចខ្ញុំបានបញ្ជាក់ហើយ គឺវាស្ថិតនៅក្នុងសមត្ថកិច្ចអ្នកនេះ សមត្ថកិច្ចអ្នកនោះ ប៉ុន្តែអ្វីជាអន្តរាគមន៍ដែលយើងអាចធ្វើទៅរួចនឹងអន្តរាគមន៍ឆាប់រហ័ស ។ ប្រសិនបើគ្មានការរុករកពីសំណាក់គណបក្សនយោបាយេដែលនៅក្នុងក្រុមប្រឹក្សាពិគ្រោះនិងផ្ដល់យោបល់ទេ គឺប្រហែលជាគ្មានរបាយការណ៍មកដល់នាយករដ្ឋមន្ត្រីទេ ។ មិនត្រឹមតែមិនមកដល់នាយករដ្ឋមន្ត្រីទេ ៥ឆ្នាំទៀត ១០ឆ្នាំទៀត នៅតែរបាយការណ៍មិនដល់ ។ នេះជាចំណុចដែលបានបង្ហាញចេញរួចមកហើយ ។
សម្ដេចតេជោបញ្ជាក់ថា ខ្ញុំសុខចិត្តទទួលយកយោបល់នៃគណបក្សនយោបាយដែលមានយោបល់ខុសគ្នា ប្រសើរជាងទទួលបទបញ្ជាពីបរទេសឱ្យយើងធ្វើនេះឬធ្វើនោះ ។ប្រតិកម្មទាន់ពេលមួយចំនួន ដែលលើកឡើងដោយថ្នាក់ដឹកនាំនៃគណបក្សទាំងអស់ ក៏បានបង្ហាញអំពីចំណុចដែលយើងត្រូវដោះស្រាយបន្ទាន់ ។
សម្ដេចតេជោ បានលើកឧទាហរណ៍មកបង្ហាញប្រតិកម្មដែលចេញមកពីគណបក្សយុវជនកម្ពុជាទាក់ទងនឹងការលុបសមុទ្រ ឥឡូវនេះយើងបានបញ្ជានិងផ្ដល់ភាពម៉ឺងម៉ាត់ ប្រសិនបើអ្នកមិនកាយចេញទេ យើងនឹងដកហូតស័ក្តិចេញតែម្ដង។
ឥឡូវនេះ ខ្ញុំទទួលបានដំណឹងថា គេបានកាយដីទាំងនោះចេញពីសមុទ្រហើយ ។ នីតិវិធីរបស់តុលាការគឺជារឿងផ្សេងមួយទៀត ក៏ប៉ុន្តែឆន្ទានុសិទ្ធិរបស់នាយករដ្ឋមន្ត្រី ត្រូវតែផ្ដល់ឲ្យអ្នកឯងច្បាស់លាស់ថា ត្រូវតែកាយដីចេញពីសមុទ្រឱ្យអស់ ប្រសិនបើមិនកាយចេញទេ យើងនឹងមិនទុកអ្នកឯងឲ្យនៅក្នុងជួរកងទ័ពដែលនាំទៅដល់ខូចកេរ្តិ៍ឈ្មោះកងទ័ពរបស់យើងនោះទេ ។ ដូច្នេះ ចំណុចទាំងនេះខ្ញុំសុខចិត្តទទួលយកនូវយោបល់ជនជាតិយើង ។ បើទោះបីជាយើងមាននយោបាយមិនដូចគ្នា ក៏ប៉ុន្តែអ្វីដែលជាចំណុចដូចគ្នាគឺចង់ឲ្យប្រទេសរីកចម្រើន ។ ចំណុចនេះប្រហែលជាវាល្អជាងការដែលយើងទទួលនូវការបង្គាប់បញ្ជាពីខាងក្រៅ ឱ្យយើងធ្វើនេះធ្វើនោះ ដើម្បីនឹងដោះដូរជាមួយនឹងជំនួយរបស់គេ។
ពិតហើយ នៅក្នុងក្របខណ្ឌឧត្តមក្រុមប្រឹក្សាមិនមែនបានសេចក្តីថា គេយកលោក-លោកស្រី ឲ្យមកអនុវត្តនូវគោលនយោបាយរបស់គណបក្សប្រជាជនទេ អត់ទេ…គឺទៅតាមព្រះរាជក្រឹត្យដែលដាក់ចេញប៉ុណ្ណោះ។
ការចូលរួមរបស់គណបក្សនានាក្នុងឧត្តមក្រុមប្រឹក្សាពិគ្រោះនិងផ្ដល់យោបល់ គឺជាការបង្ហាញពីទឡ្ហីករណ៍ជាក់ស្ដែងអំពីការអនុវត្តប្រព័ន្ធនយោបាយប្រជាធិបតេយ្យសេរីពហុបក្សរបស់ប្រជាជនកម្ពុជា ជាប្រយោជន៍ដ៏វិសេសវិសាលក្នុងការកសាងសហគមន៍ជាតិ ដែលគ្រប់គ្នារួមរស់ក្រោមដំបូលសន្តិភាព និងសុខដុមរមនា។ជាពិសេស រវាងក្រុមនិន្នាការនយោបាយខុសៗគ្នា នេះគឺជាមោទនភាពជាតិដែលបញ្ជាក់ថាបរិបទប្រជាធិបតេយ្យសេរីពហុបក្ស គឺកម្ពុជាអាចធ្វើបានដោយខ្លួនឯង ដោយមានទស្សនៈចម្រុះខុសគ្នា ចេះរួមរស់និងធ្វើការជាមួយគ្នា ក្នុងក្របខណ្ឌទទួលខុសត្រូវផ្សេងៗគ្នា ផ្អែកលើស្មារតីគោរពនូវគោលការណ៍ពហុនិយម ពហុគំនិតជាមួយនឹងការរិះគន់ក្នុងន័យស្ថាបនា ។
ម្យ៉ាងវិញទៀត ឧត្តមក្រុមប្រឹក្សាពិគ្រោះនិងផ្តល់យោបល់ បាននិងកំពុងបំពេញតួនាទីជាស្ថាប័នមួយដែលភ្ជាប់ទំនាក់ទំនងរវាងប្រជាជននិងនាយករដ្ឋមន្ត្រី ជាពិសេសលើបរិការណ៍នៃការលាតត្រដាងការពិត ការតវ៉ា ការទាមទារ សំណូមពររបស់ប្រជាពលរដ្ឋទូទៅ ភ្ជាប់ជាមួយនឹងវិធានការនៃកាដោះស្រាយទាន់ពេល
វេលា ។ ខ្ញុំមានសុទិដ្ឋិនិយមថា ឧត្តមក្រុមប្រឹក្សាពិគ្រោះនិងផ្តល់យោបល់ នឹងបន្តបំពេញតួនាទីនេះ ជាមួយនឹងបេសកកម្មដ៏មានសារប្រយោជន៍ក្នុងឆ្នាំ២០២០ខាងមុខ សំដៅរួមចំណែកធ្វើការកែទម្រង់នៅកម្ពុជាឲ្យទទួលបានផ្លែផ្កាជាបន្តបន្ទាប់ និងកាន់តែប្រសើរឡើង ដើម្បីសុខសន្តិភាព ស្ថិរភាព និងការអភិវឌ្ឍគ្រប់វិស័យដែលផ្ដល់នូវសេចក្តីសុខសេចក្តីចម្រើនដល់ប្រជាជាតិនិងប្រជាជន ៕
ចែករំលែកព័តមាននេះ