រាជធានីភ្នំពេញ ៖ មានករណីអគ្គីភ័យឆាបឆេះស្មៅព្រៃរាប់ហិកតានៅហ្គេនភ្នំពេញយ៉ាងសន្ធោសន្ធៅបង្កអោយមានការភ្ញាក់ផ្អើលដល់បុគ្គលិក, អាជ្ញាធរ និងសមត្ថកិច្ចហៅរថយន្តពន្លត់អគ្គីភ័យ ជាច្រើនគ្រឿងទៅអន្តរាគមន៍ បាញ់ពន្លត់អស់ប្រមាណជាង១ម៉ោង។ ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោងប្រមាណ១២និង៣០នាទីថ្ងៃត្រង់ទី២៩ ខែធ្នូ ឆ្នាំ…
រាជធានីភ្នំពេញ ៖ មានករណីអគ្គីភ័យឆាបឆេះស្មៅព្រៃរាប់ហិកតានៅហ្គេនភ្នំពេញយ៉ាងសន្ធោសន្ធៅបង្កអោយមានការភ្ញាក់ផ្អើលដល់បុគ្គលិក, អាជ្ញាធរ និងសមត្ថកិច្ចហៅរថយន្តពន្លត់អគ្គីភ័យ ជាច្រើនគ្រឿងទៅអន្តរាគមន៍ បាញ់ពន្លត់អស់ប្រមាណជាង១ម៉ោង។
ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោងប្រមាណ១២និង៣០នាទីថ្ងៃត្រង់ទី២៩ ខែធ្នូ ឆ្នាំ ២០១៩ នៅខាងត្បូងកន្លែងវាយកូនហ្គោលរបស់ក្រុមហ៊ុនហ្គេនភ្នំពេញ នៅក្នុងភូមិឃ្មួញ សង្កាត់ឃ្មួញ ខណ្ឌសែនសុខ រាជធានីភ្នំពេញ។
ស្មៅព្រៃដែលអគ្គីភ័យ ឆាបឆេះខាងលើត្រូវសមត្ថកិច្ចអោយដឹងថា មានទំហំប្រមាណជាង១០ហិកតា ជាដីឡូតិ៍ទុកចោលដុះសុទ្ធតែស្មៅព្រៃរបស់ក្រុមហ៊ុនហ្គេនភ្នំពេញ ។ អគ្គីភ័យដែលកើតឡើងខាងលើនេះគេពុំដឹងថា បណ្តាលមកពីមូលហេតុ អ្វីពិតប្រាកដឡើយ ។
តាមព័ត៌មានអោយដឹងថា នៅមុនពេលកើតហេតុ គេឃើញភ្លើង បានឆាបឆេះយ៉ាងរហ័ស ចេញពីទិសខាងកើត ហើយភ្លើងបានឆាបឆេះយ៉ាងសន្ធោសន្ធៅ និងរាលដាល់ទិសខាងលិចបង្កអោយមានការភ្ញាក់ផ្អើលយ៉ាងខ្លាំង ។ ដោយសារតែស្មៅព្រៃដុះក្រាស់ៗ និងមានកូនឈើស្ងួតទៀត ទើបភ្លើងបានឆាបឆេះអស់ជាច្រើនហិកតា ។ ភ្លាមៗអាជ្ញាធរ និងសមត្ថកិច្ច ព្រមទាំងបុគ្គលិកក្រុមហ៊ុនក៏បានហៅរថយន្តទៅអន្តរាគមន៍បាញ់ពន្លត់អស់រយៈពេលប្រមាណជា១ម៉ោង ទើបអាចទប់ស្កាត់បាន។
តាមនគរបាលអោយដឹងថា នៅក្នុងហេតុការណ៍នេះ រថយន្តពន្លត់អគ្គីភ័យចំនួន១៤គ្រឿងទៅអន្តរាគមន៍ បាញ់ពន្លត់ហើយ ភ្លើង បានរលត់នៅវេលាម៉ោងប្រមាណ១និង៣០នាទីរសៀលថ្ងៃដដែល ប៉ុន្តែស្មៅព្រៃជាច្រើនហិកតា ត្រូវភ្លើងឆេះអស់ ។ ទាក់ទិនការកើតមានអគ្គីភ័យ គេសង្ស័យ មានអ្នកដុត ឬមានអ្នកបោះកន្ទុយបារីទៅលើស្មៅស្ងួតៗជាហេតុ នាំអោយកើតមានអគ្គីភ័យតែម្តង៕ (កែសម្រួលដោយ ៖ ធីតា)
ចែករំលែកព័តមាននេះ