លោកមហាសេដ្ឋី វ៉ារេន បាហ្វេត ដែលជានាយកប្រតិបត្តិរបស់ក្រុមហ៊ុន Berkshire Hathaway ត្រូវបានចាត់ទុកថា ជាវិនិយោគិនដែលជោគជ័យជាងគេ និងបានកសាងទ្រព្យសម្បត្តិមកស្មើប្រមាណជិត៨០០០០លានដុល្លារទៅហើយនៅឆ្នាំនេះ។ ប៉ុន្តែលោកក៏ធ្លាប់សម្រេចចិត្តខុសក្នុងការរកស៊ីដោយខាតបង់លុយប្រមាណ…
លោកមហាសេដ្ឋី វ៉ារេន បាហ្វេត ដែលជានាយកប្រតិបត្តិរបស់ក្រុមហ៊ុន Berkshire Hathaway ត្រូវបានចាត់ទុកថា ជាវិនិយោគិនដែលជោគជ័យជាងគេ និងបានកសាងទ្រព្យសម្បត្តិមកស្មើប្រមាណជិត៨០០០០លានដុល្លារទៅហើយនៅឆ្នាំនេះ។ ប៉ុន្តែលោកក៏ធ្លាប់សម្រេចចិត្តខុសក្នុងការរកស៊ីដោយខាតបង់លុយប្រមាណ ១៦០០០លានដុល្លារ ។
រឿងសម្ងាត់នៃភាពជោគជ័យរបស់លោក គឺយុទ្ធសាស្ត្រវិនិយោគដ៏សាមញ្ញរបស់លោក ។ លោក និងក្រុមការងារក្នុងក្រុមហ៊ុនលោកភាគច្រើនតែងតែស្រាវជ្រាវតែលើវិស័យមួយចំនួនក្នុងទីផ្សារប៉ុណ្ណោះ និងលើអាជីវកម្មណាដែលមានភាពប្រកួតប្រជែងជាងដៃគូប្រកួតប្រជែងដទៃច្បាស់លាស់ ។
លោកក៏បានទិញយកក្រុមហ៊ុនដែលស្រលាញ់ និងចូលចិត្តដែរ ហើយបច្ចុប្បន្ននេះលោក និងក្រុមការងាររបស់លោកបានវិនិយោគសរុបប្រមាណ២០១០០០លានដុល្លារឯណោះ ។ ទោះជាលោកជោគជ័យប៉ុណ្ណា លោកមហាសេដ្ឋីខាងលើក៏បានប្រព្រឹត្តកំហុសឆ្គងច្រើនដែរ ដោយមើលរំលងក្រុមហ៊ុនមួយចំនួនដូចជា Amazon.com ឬ Google របស់ Alphabet ជាដើម ។ លើសពីនេះទៅទៀត លោកក៏បានសម្រេចចិត្តខុសលើការវិនិយោគលើក្រុមហ៊ុនមួយចំនួនដែរដូចជា ក្រុមហ៊ុន Tesco ដែលបានធ្វើឲ្យក្រុមហ៊ុនលោកខាតបង់ប្រមាណ៤៤៤លានដុល្លារនៅឆ្នាំ២០១៤ ។
កាលពីឆ្នាំ១៩៦៦ លោកបាហ្វេតបានសម្រេចចិត្តវិនិយោគលើសួនឧទ្យាន Walt Disney ដែលមានតម្លៃប្រមាណ៨០លានដុល្លារ ។ ប៉ុន្តែលោកបានលក់ភាគហ៊ុនរបស់លោកនៅឆ្នាំ១៩៦៧ ដើម្បីទទួលបានប្រាក់ចំណេញ៥០%មកវិញ ។ ប្រសិនបើលោកមិនបានលក់ភាគហ៊ុន ៥%នោះរបស់លោកទេបច្ចុប្បន្នភាគហ៊ុននោះនឹងមានតម្លៃប្រមាណដល់ទៅ១១៨៦ លានដុល្លារ ។
លើសពីនេះទៀត នៅឆ្នាំ១៩៩៥ Disney បានទិញក្រុមហ៊ុន Capital Cities ដែល Berkshire Hathaway ជាម្ចាស់ភាគហ៊ុនក្នុងនោះដែរ ។ ប៉ុន្តែលោកបាហ្វេតបានសម្រេចចិត្តលក់ភាគហ៊ុនទាំងនោះចោល ដែលបច្ចុប្បន្ននេះមានតម្លៃប្រមាណ២.៧៦ប៊ីលានដុល្លារ ។
ប្រាកដណាស់ លោកបាហ្វេតជាមនុស្សដូចអ្នកដទៃដែរ ហើយលោកជៀសមិនផុតនឹងការប្រព្រឹត្តកំហុសឆ្គងឡើយ ។ ប៉ុន្តែអ្វីដែលសំខាន់គឺតើមនុស្សម្នាក់អាចរៀនសូត្រពីកំហុសឆ្គងរបស់ពួកគេដែរឬទេ ៕ កែសម្រួលដោយ ៖ សុឃាក់
ចែករំលែកព័តមាននេះ