ខេត្តបន្ទាយមានជ័យ ៖ តាមសេចក្តីរាយការណ៍បឋមបានឱ្យដឹងថា កាលពីថ្ងៃទី២៨ ធ្នូ ឆ្នាំ២០១៩ មន្ត្រីអភិរក្សព្រៃឈើសហការជាមួយទាហានឈុតខ្មៅថៃកងរយលេខ១២០១ ប្រចាំស្រុកអរញ្ញ ខេត្តស្រះកែវ បានធ្វើការឆែកឆេរឃ្លាំងមួយកន្លែងនៅជិតផ្សាររុងក្លឿ (ផ្សារឥណ្ឌូចិន) ជិតច្រកទ្វារអន្តរជាតិប៉ោយប៉ែត រកឃើញឈើគ្រញូងជាច្រើនតោន មានតម្លៃជាង១០០លានបាត។
តាមប្រភពពីទឹកដីថៃប្រាប់ឱ្យដឹងថា ឈើគ្រញូងទាំងនេះគេលាក់ទុកដើម្បីដឹកចេញលក់ឲ្យឈ្មួញខ្មែរនៅក្រុងប៉ោយប៉ែត ប៉ុន្តែមិនដឹងថានាំចូលតាមច្រកណាឡើយ ខណៈប្រភពថាពេលខ្លះឈើគ្រញូងត្រូវឈ្មួញលួចដឹកពីថៃបង្កប់តាមរទេះទំនិញ និងប្រហិតចូលមកកម្ពុជាតាមច្រកទ្វារអន្តរជាតិផងដែរ។
ទោះបីជាយ៉ាងណា ករណីលួចដឹកឈើគ្រញូងបង្កប់តាមរទេះចេញពីថៃតាមច្រកទ្វារអន្តរជាតិប៉ោយប៉ែតនេះ កន្លងមកត្រូវមន្ត្រីជំនាញគយ និងរដ្ឋាករច្រកទ្វារអន្តរជាតិប៉ោយប៉ែតឆែកឆេរចាប់បានជាបន្តបន្ទាប់៕ (កែសម្រួលដោយ ៖ ធីតា)
ចែករំលែកព័តមាននេះ