ខេត្តសៀមរាប ៖ រថយន្តធុនធំមួយគ្រឿងមានដឹកអេស្កាវ៉ាទ័រកាយដីមួយគ្រឿងបានកិនចំគ្រាប់មីនមួយគ្រាប់បណ្តាលឱ្យផ្ទុះនៅចំណុចផ្លូវលំមួយកន្លែង កាលពីល្ងាច ថ្ងៃទី២៦ ខែធ្នូ ឆ្នាំ២០១៩ ស្ថិតនៅខាងលិចភូមិស្វាយ ឃុំត្រីញ័រ ស្រុកពួក និងបណ្ដាលឱ្យរងការខូចខាតរថយន្តចំនួន២គ្រឿង ប៉ុន្តែសំណាងល្អមិនមានប៉ះពាល់ដល់អាយុជីវិតមនុស្សនោះទេ។
បើតាមការអះអាងពីលោកវរសេនីយ៍ឯក ទេព ពុំសែន អធិការដ្ឋាននគរបាលស្រុកពួក បានឱ្យដឹងថា ករណីផ្ទុះគ្រាប់មីនមួយគ្រាប់នៅលើផ្លូវលំដែលជាផ្លូវសម្រាប់ប្រជាពលរដ្ឋធ្វើដំណើរឆ្លងកាត់ទៅធ្វើស្រែ រាល់ថ្ងៃនោះ ស្ថិតនៅចំណុចខាងលិចភូមិស្វាយ ឃុំត្រីញ័រ ចម្ងាយ៣គីឡូម៉ែត្រ ជាផ្លូវតភ្ជាប់ពីឃុំត្រីញ័រ ទៅឃុំក្តីរុន ក្នុងស្រុកពួក ខេត្ត សៀមរាប បណ្ដាលឱ្យខូចខាតរថយន្តចំនួន២គ្រឿង ក្នុងនោះរថយន្តម៉ាកថៃល័រ ជាប្រភេទរថយន្តដឹករថយន្ត ពណ៌ស ពាក់ផ្លាកលេខ ក.០១១៨ ភព៣ មានដឹកអេស្កាវ៉ាទ័រកាយដីមួយគ្រឿង បើកបរដោយឈ្មោះ អុត ទក់ ភេទប្រុស អាយុ៣៥ឆ្នាំ រស់នៅភូមិបេង ឃុំដូនពេង ស្រុកអង្គរជុំ ខេត្តសៀមរាប ជាម្ចាស់រថយន្តនិងម្ចាស់អេស្កាវ៉ាទ័រ មុខរបរជីកដី និងដឹកដីលក់ ចំណែករួមដំណើរម្នាក់ឈ្មោះ អូន ភេទប្រុស អាយុ២៥ឆ្នាំ មុខរបរជាកម្មករ រស់នៅភូមិកំពង់ក្តី ឃុំកំពង់ក្តី ស្រុកជីក្រែង ខេត្តសៀមរាប ។
លោកអធិការនគរបាលស្រុកពួកបានបញ្ជាក់ថា នៅមុនពេលកើតហេតុ មានរថយន្តមួយគ្រឿងម៉ាកថៃល័របានដឹកអេស្កាវ៉ាទ័រកាយដីមួយគ្រឿង ធ្វើដំណើរក្នុងទិសដៅពីលិចទៅកើត ពីឃុំក្តីរុនទៅឃុំត្រីញ័រ លុះដល់មកកន្លែងកើតហេតុបានកិនចំគ្រាប់មីនបណ្តាលឱ្យផ្ទុះចំកង់ក្រោយខាងឆ្វេង តែពុំមាននរណាម្នាក់រងរបួសក្នុងហេតុការណ៍នេះទេ។
លោកអធិការនគរបាលស្រុកពួកបានបន្តទៀតថា ក្រោយពេលកើតហេតុ កម្លាំងជំនាញ បានចុះសហការជាមួយកម្លាំងប៉ុស្តិ៍នគរបាលរដ្ឋបាលឃុំត្រីញ័រ ចុះទៅដល់កន្លែងកើតហេតុ ដើម្បីធ្វើការត្រួតពិនិត្យភ្លាមៗផងដែរ។
បើតាមការពិនិត្យនិងសន្និដ្ឋានរបស់កម្លាំងសមត្ថកិច្ចបានឱ្យដឹងថា គ្រាប់មីនដែលផ្ទុះខាងលើនេះ សង្ស័យជាប្រភេទមីនតោនដាក់បង្កប់ដោយនៅសេសសល់ពីសម័យសង្គ្រាម ខណៈផ្លូវខាងលើនេះជាផ្លូវតូច ហើយកន្លងមកពុំដែលមានរថយន្តធុនធំ និងធុនធ្ងន់បើកបរលើផ្លូវនេះឡើយ គឺមានតែគោយន្តកន្ត្រៃតូចៗបើកបរលើផ្លូវនេះតែប៉ុណ្ណោះ ទើបពុំបណ្តាលឱ្យផ្ទុះ ។ បច្ចុប្បន្នរថយន្តទាំង២នេះ ត្រូវបានកម្លាំងជំនាញ ប្រគល់ឱ្យម្ចាស់យកទៅរក្សាទុកនៅផ្ទះរបស់ខ្លួនវិញហើយ៕ (កែសម្រួលដោយ ៖ ធីតា)
ចែករំលែកព័តមាននេះ