ខេត្តប៉ៃលិន ៖សេចក្តីរាយការណ៍បឋមបានឲ្យដឹងថា មានករណីអំពើហិង្សាដោយចេតនាមួយបានកើតឡើងដោយសារកូនប្រុសម្នាក់ទាញដំបងឈើជ្រុងវាយទៅលើម្តាយបង្កើតរបស់ខ្លួន បណ្តាលឲ្យចំក្បាលរងរបួសធ្ងន់ធ្ងរ ត្រូវបានគ្រូពេទ្យដេរអស់ជាច្រើនថ្នេរ ដោយខឹងម្តាយស្តីប្រដៅតិចតួច ដែលហេតុការណ៍នេះបានកើតឡើងនៅវេលាម៉ោង១និង០៤នាទីរសៀល ថ្ងៃទី២៧ ខែធ្នូនេះ នៅចំណុចក្នុងផ្ទះជនរងគ្រោះ ស្ថិតក្នុងភូមិអូរស្ងួត សង្កាត់បរយ៉ាខា ក្រុងប៉ៃលិន ខេត្តប៉ៃលិន ។
ប្រភពព័ត៌មានបានឲ្យដឹងថា ជនរងគ្រោះមានឈ្មោះ ម៉ៅ សុជាតិ អាយុ៦៣ឆ្នាំ រស់នៅភូមិឃុំកើតហេតុខាងលើ រងរបួសបែកចុងចិញ្ចើមខាងឆ្វេង និងរបួសបែកក្បាលពីលើដេរចំនួន០៥ថ្នេរ (ជាម្ដាយបង្កើតជនសង្ស័យ) ។
ចំណែកជនបង្កឈ្មោះ ឃុន បូរ៊ី អាយុ២៩ឆ្នាំ រស់នៅភូមិ ឃុំកើតហេតុខាងលើ ។ ប្រភពបន្តទៀតថា ក្រោយទទួលបានពាក្យបណ្ដឹង កម្លាំងជំនាញផ្នែកព្រហ្មទណ្ឌនៃអធិការដ្ឋាននគរបាលក្រុងប៉ៃលិន បានសហការជាមួយកម្លាំងប៉ុស្តិ៍នគរបាលរដ្ឋបាលបរយ៉ាខា បាននាំខ្លួនជនបង្កខាងលើទៅកាន់អធិការដ្ឋាននគរបាលក្រុងប៉ៃលិន ដើម្បីសាកសួរ និងរៀបចំកសាងសំណុំរឿងបញ្ជូនទៅតុលាការ ចាត់ការតាមនីតិវិធីច្បាប់ ៕ កែសម្រួលដោយ ៖ សុឃាក់
ចែករំលែកព័តមាននេះ