ខេត្តបាត់ដំបង ៖ ចាត់ទុកថានេះជាលើកទី១ និងអាចចាត់ទុកជារឿងចម្លែក ដែលចោរប្លន់២នាក់បានប្រើប្រាស់គ្រាប់បែកផាវគប់ចូលក្នុងហាងលក់ទូរស័ព្ទ ដែលទើបបើកលក់ថ្មីមួយកន្លែង រួចវាយបំបែកកញ្ចក់ទូប្លន់យកទូរស័ព្ទស៊េរីទាបចំនួន៥គ្រឿង ហើយជិះម៉ូតូគេចខ្លួនទៅបាត់ស្រមោល កាលពីវេលាម៉ោងប្រមាណ៦និង៤៥នាទីល្ងាចថ្ងៃទី២៦ ខែធ្នូ…
ខេត្តបាត់ដំបង ៖ ចាត់ទុកថានេះជាលើកទី១ និងអាចចាត់ទុកជារឿងចម្លែក ដែលចោរប្លន់២នាក់បានប្រើប្រាស់គ្រាប់បែកផាវគប់ចូលក្នុងហាងលក់ទូរស័ព្ទ ដែលទើបបើកលក់ថ្មីមួយកន្លែង រួចវាយបំបែកកញ្ចក់ទូប្លន់យកទូរស័ព្ទស៊េរីទាបចំនួន៥គ្រឿង ហើយជិះម៉ូតូគេចខ្លួនទៅបាត់ស្រមោល កាលពីវេលាម៉ោងប្រមាណ៦និង៤៥នាទីល្ងាចថ្ងៃទី២៦ ខែធ្នូ នៅភូមិជំនីក ឃុំអន្លង់វិល ស្រុកសង្កែ ។
សមត្ថកិច្ចបានឲ្យដឹងថា ចោរប្លន់ទាំង២នាក់នោះ បានជិះម៉ូតូទៅធ្វើសកម្មភាពប្លន់ទាំងងងើលនិងគ្មានបង្អង់យូរឡើយ ដោយពួកគេឈប់ម៉ូតូនៅក្បែរហាងលក់ទូរស័ព្ទនោះដែលមានម្ចាស់ឈ្មោះ ផាន វណ្ណឈីន ភេទប្រុស អាយុ២៦ឆ្នាំ ។ចោរម្នាក់បានចុះពីលើម៉ូតូស្ទុះទៅគប់គ្រាប់បែកផាវចំនួន២គ្រាប់ចូលទៅក្នុងហាង បណ្ដាលឲ្យផ្ទុះផ្អើលដល់ម្ចាស់ហាងរត់ចេញក្រៅស្រែកឱ្យគេជួយ ។
សមត្ថកិច្ចបានប្រាប់ថា ពេលម្ចាស់ហាងភ័យរត់ចេញក្រៅ ជនម្នាក់នោះបានដកកូនពូថៅវាយបំបែកកញ្ចក់ទូដាក់តាំងទូរស័ព្ទ ប្រមូលយកទូរស័ព្ទស៊េរីទាបៗបានចំនួន៥គ្រឿង រួចជិះម៉ូតូគេចខ្លួនទៅបាត់ស្រមោល ។
ម្ចាស់ហាងលក់ទូរស័ព្ទខាងលើ បានប្រាប់សមត្ថកិច្ចថា គាត់មិនស្គាល់ភិនភាគពួកចោរទាំង២នាក់នោះទេ ហើយក៏មិនបានពិនិត្យមើលម៉ូតូថា ម៉ាកអ្វីដែរ ។ ជនទាំង២នាក់នោះជិះម៉ូតូឌុបគ្នាមកឈប់នៅក្បែរហាង រួចម្នាក់ជិះខាងក្រោយចុះដើរសំដៅមកក្នុងហាង ខណៈម្នាក់ទៀតអង្គុយចាំលើម៉ូតូ ។
គាត់បញ្ជាក់ថា ជននោះបានធ្វើសកម្មភាពលឿនបំផុតពេលដើរចូលមកដល់ ដោយបានបោះ គ្រាប់បែកផាវចំនួន២គ្រាប់ចូលក្នុងហាង បណ្ដាលឲ្យផ្ទុះផ្អើលតែម្ដង ។ គាត់បានរត់ចេញពីហាងហើយជននោះបានដកកូនពូថៅវាយបំបែកកញ្ចក់ទូ ប្រមូលយកទូរស័ព្ទចំនួន៥គ្រឿង រត់ឡើងម៉ូតូជិះគេចខ្លួនបាត់ បង្កឲ្យមានការភ្ញាក់ផ្អើលនិងបានរាយការណ៍ប្រាប់សមត្ថកិច្ចភ្លាមៗ ។
មានការកត់សម្គាល់ថា រយៈពេលប៉ុន្មានថ្ងៃកន្លងទៅនេះ អំពើប្លន់ឬលួចហាក់កំពុងម្រើកយ៉ាងខ្លាំងគួរឲ្យបារម្ភបំផុតអំពីបញ្ហាអសន្តិសុខនៅក្នុងមូលដ្ឋាន ខណៈសមត្ថកិច្ចហាក់មិនទាន់កំណត់បាននូវមុខសញ្ញាជនសង្ស័យទាំងនោះ។ ជាក់ស្ដែង កាលពីរសៀលថ្ងៃទី២៣ ខែធ្នូ អំពើប្លន់តាមដងផ្លូវមួយបានកើតឡើង នៅក្នុងភូមិបឹងរាំង ឃុំបឹងរាំង ស្រុកកំរៀង បង្កឡើងដោយជនមិនស្គាល់អត្តសញ្ញាណ២នាក់ ។ ជនដៃដល់បានប្រើដាវសាមូរៃ៉ភ្ជង់អ្នករត់ម៉ូតូឌុបម្នាក់ឈ្មោះ នួន លាភ អាយុ៣៦ឆ្នាំ ប្លន់យកម៉ូតូ១គ្រឿងបានសម្រេច រួចជិះគេចខ្លួនដោយសុវត្ថិភាពទាំងថ្ងៃ ដោយមិនរំខានសមត្ថកិច្ចឡើយ តែមិនបង្ករបួសស្នាមទៅលើជនរងគ្រោះទេ ។
ដោយឡែក នៅក្នុងក្រុងបាត់ដំបង និងនៅស្រុកបាណន់ឯណេះវិញ ប៉ុន្មានថ្ងៃចុងក្រោយនេះ ក៏មានករណី«ចោរលួចម៉ូតូ»កើតឡើងស្ទើរព្រមៗគ្នាយ៉ាងគឃ្លើនដែរ ។ តាមរបាយការណ៍របស់សមត្ថកិច្ចបានឲ្យដឹងថា ជនដៃដល់ចំនួន២នាក់ បានធ្វើសកម្មភាពកាច់សោ.កលួចយកម៉ូតូ១គ្រឿង កាលពីរសៀលថ្ងៃទី២៤ ខែធ្នូ នៅភូមិខ្នារឃុំឈើទាល ស្រុកបាណន់ ខណៈជនរងគ្រោះទុកនៅមុខផ្ទះ ។ សកម្មភាពក្រុមចោរនេះ បានបន្សល់ទុករូបភាពនៅក្នុងកាមេរ៉ាសុវត្ថិភាពយ៉ាងច្បាស់ក្រឡែត ពេលដែលពួកគេលួចម៉ូតូបានហើយនាំគ្នាជិះចេញទៅ ។ ប៉ុន្តែរហូតមកដល់ពេលនេះ ក៏សមត្ថកិច្ចនៅតែមិនអាចកំណត់មុខសញ្ញាចោរទាំង២នាក់នោះបាននៅឡើយ ។
ខណៈដែលសមត្ថកិច្ចមិនទាន់មានតម្រុយពីជនសង្ស័យលួចម៉ូតូនៅស្រុកបាណន់នោះ ស្រាប់តែនៅព្រឹកថ្ងៃទី២៥ ខែធ្នូ មានសេចក្ដីរាយការណ៍ថា លោកចោរបានធ្វើសកម្មភាព«កាច់សោលួចយកម៉ូតូ» ចំនួន២លើកផ្ទូនៗគ្នា ស្ទើរក្នុងពេលតែមួយ ។ សេចក្ដីរាយការណ៍បានឲ្យដឹងថា ដំបូងក្រុមចោរបានធ្វើសកម្មភាពកាច់សោលួចម៉ូតូនៅខាងមុខផ្សារណាត់(ផ្សារធំបាត់ដំបង)ចំកណ្ដាលបេះដូង ក្រុងបាត់ដំបង ។ ការផ្អើល
ឆោឡោនៅផ្សារណាត់នេះមិនទាន់ស្ងប់ផង ស្រាប់តែមានសេចក្ដីរាយការណ៍បន្ថែមទៀតថា នៅឯភូមិសាលាបាឡាត់ សង្កាត់អូរម៉ាល់ ក៏មានចោរកាច់សោលួចម៉ូតូអស់១គ្រឿងដែរ ។
មិនតែប៉ុណ្ណោះ បើតាមសមត្ថកិច្ចបញ្ជាក់ថា មុនកើតហេតុនេះប៉ុន្មានថ្ងៃ ម៉ូតូរបស់មន្ត្រីសាលាខេត្តម្នាក់ដែលទុកនៅខាងក្នុងបរិវេណសាលាខេត្ត ក៏ត្រូវចោរចូលលួចយកទៅបាត់ដែរ បើទោះជាមានអ្នកយាមនៅច្រកចូលសាលាខេត្តព្រោងព្រាតក្ដី ។
ជុំវិញអំពើចោរកម្មដែលកំពុងអង្រួនខេត្តបាត់ដំបងយ៉ាងកក្រើកគួរឲ្យព្រួយបារម្ភនេះ លោកឧត្តមសេនីយ៍ត្រី ជេត វណ្ណនី ស្នងការរងនគរបាលខេត្ត មានប្រសាសន៍ថា ពេលនេះមន្ត្រីគ្រប់ការិយាល័យជំនាញ បាននិងកំពុងមមាញឹកយ៉ាងខ្លាំងក្នុងការតាមស៊ើបអង្កេតមុខសញ្ញាជនសង្ស័យនានា តែលទ្ធផលហាក់មានតម្រុយតិចតួចប៉ុណ្ណោះ ។ ប៉ុន្តែយ៉ាងណាក៏ដោយ កម្លាំងជំ នាញកំពុងប្រឹងប្រែងយ៉ាងដុតដៃដុតជើងបំផុត ក្រោមការបញ្ជាផ្ទាល់ពីលោកស្នងការខេត្ត ៕
ចែករំលែកព័តមាននេះ