រាជធានីភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន បានបញ្ជាក់ថា ស្ពានថ្មនៅ បាត់ដំបងគ្មានការវាយកម្ចេចចោលទេ ផ្ទុយទៅវិញត្រូវថែរក្សានិងអភិរក្សមរតកដូនតាដែលមានអាយុកាលលើសពី៥០ឆ្នាំឡើង ។ សម្តេចតេជោបានបញ្ជាក់បែបនេះ បន្ទាប់ពីមានការផ្សព្វផ្សាយលើបណ្តាញសង្គមហ្វេសប៊ុកយ៉ាងផុសផុលថា ស្ពានថ្មចាស់នៅខេត្តបាត់ដំបងត្រូវបានអភិបាលខេត្តនេះស្នើសុំវាយកម្ទេចចោល ។
ថ្លែងក្នុងពិធីប្រគល់សញ្ញាបត្រដល់និស្សិតសាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រសេដ្ឋកិច្ច(RULE) កាលពីព្រឹកទី២៦ ខែធ្នូ ឆ្នាំ២០១៩ ដែលបានប្រារព្ធនៅសាកលវិទ្យាល័យនេះ សម្តេចតេជោនាយករដ្ឋមន្ត្រី ហ៊ុន សែន បានបញ្ជាក់ច្បាស់ថា មរតកដូនតាដែលបានបន្សល់ទុកលើសពី៥០ឆ្នាំឡើងទៅ ត្រូវនាំគ្នាថែរក្សានិងអភិរក្ស គឺគ្មានការរុះរើឬវាយកម្ទេចស្ពានថ្មចាស់សល់ពីសម័យបារាំង ដែលមាន
អាយុកាលជាង១០០ឆ្នាំ ស្ថិតនៅក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបងជាដាច់ខាត ។
សម្ដេចតេជោ ហ៊ុន សែន ថ្លែងថា ដើម្បីចៀសវាងគ្រោះថ្នាក់ អាជ្ញាធរខេត្តបាត់ដំបង ត្រូវរកវិធីកុំឲ្យប្រជាពលរដ្ឋឆ្លងកាត់លើស្ពាននោះទៀត ជំនួសមកវិញដោយធ្វើស្ពានបន្ថែមនៅក្បែរនោះ មិនមែនវាយស្ពានចាស់ចោលនោះទេ ។ សម្ដេចតេជោ ថ្លែងទៀតថា «កន្លងទៅស្រាប់តែនាំគ្នាផ្អើលពេញហ្វេសប៊ុកថា យើងនាំគ្នាប្រុងវាយស្ពានសល់ពីសម័យបារាំងនៅបាត់ដំបង។ សូមបញ្ជាក់ អ្វីដែលបន្សល់ទុកលើសពី៥០ឆ្នាំទៅ គឺខិតខំរក្សា អាហ្នឹងក្លាយទៅជាសមិទ្ធផល អានោះជាង១០០ឆ្នាំ រឿងអីត្រូវទៅវាយចោល ខិតខំរក្សាវា ជួសជុលធ្វើម៉េចទប់ដើម្បីកុំឲ្យវាបាក់» ។
សូមរំឭកថា ស្ពានថ្មចាស់សល់ពីសម័យបារាំងនេះ ស្ថិតនៅក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ជាស្ពានឆ្លងកាត់ស្ទឹងសង្កែ កសាងឡើងនៅឆ្នាំ១៩១៦ ដែលមានភាពស៊ីវិល័យតាមរចនាបថបារាំង ។ កាលពីអំឡុងឆ្នាំ២០០០ ស្ពាននេះក៏ធ្លាប់ត្រូវបានស្នើសុំរុះរើរួចម្ដងមកហើយ តែដោយសារមានប្រតិកម្មពីប្រជាពលរដ្ឋ អ្នកប្រវត្តិសាស្ត្រមួយចំនួន និងស្ថានទូតបារាំងផងនោះ ស្ពាននេះត្រូវបានជួសជុលទុករហូតមកដល់បច្ចុប្បន្ន ។
ស្ពានថ្មចាស់សល់ពីសម័យបារាំងនេះ មានអាយុកាលជាង១០០ឆ្នាំមកហើយ ជាសំណង់បេតិកភណ្ឌទីក្រុងនៅសល់តែមួយគត់ ក្នុងខេត្តបាត់ដំបង និងនៅសល់តែមួយគត់នៅកម្ពុជា ដែលមានតម្លៃប្រវត្តិសាស្ត្រ ស្ថាបត្យកម្ម នគរូបនីយកម្ម និងបរិស្ថាន ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ