លោក ជា ចាន់តូ ជួបសំណេះសំណាលជាមួយមន្ត្រីបុគ្គលិក
- ភ្នំពេញ
ខេត្តសៀមរាប ៖ លោក ជា ចាន់តូ អគ្គទេសាភិបាលធនាគារជាតិនៃកម្ពុជា នៅព្រឹកថ្ងៃសុក្រ ទី២៧ ខែធ្នូ ឆ្នាំ២០១៩…
ខេត្តសៀមរាប ៖ លោក ជា ចាន់តូ អគ្គទេសាភិបាលធនាគារជាតិនៃកម្ពុជា នៅព្រឹកថ្ងៃសុក្រ ទី២៧ ខែធ្នូ ឆ្នាំ២០១៩ បានអញ្ជើញជួបសំណេះសំណាលជាមួយមន្ត្រី បុគ្គលិកសាខាធនាគារជាតិនៃកម្ពុជា ខេត្តសៀមរាប។
នៅឱកាសនោះ លោកអគ្គទេសាភិបាលធនាគារជាតិ នៃកម្ពុជា ជា ចាន់តូ បានស្នើឲ្យមន្ត្រី បុគ្គលិកទាំងអស់ឲ្យបន្តការខិតខំប្រឹងប្រែងបំពេញការងារឲ្យបានល្អតាមតួនាទីភារកិច្ចរៀងៗ ពិសេសការពង្រឹងស្ថេរភាពប្រាក់រៀល និងការផ្ដល់ទំនុកចិត្តរបស់ប្រជាពលរដ្ឋ និងសាធារណជនមកលើការគ្រប់គ្រងរបស់ធនាគារជាតិ នៃកម្ពុជា ។
ជាមួយនេះដែរ លោក ជា ចាន់តូ បានជម្រុញឲ្យមន្ត្រីបុគ្គលិកសាខាធនាគារជាតិ នៃកម្ពុជាខេត្តសៀមរាប ត្រូវតែខិតខំប្រឹងប្រែងពង្រឹងស្ថាប័នរបស់ខ្លួនឲ្យបានរឹងមាំនិងត្រូវធ្វើយ៉ាងណាឲ្យកាន់តែទទួលបានការជឿជាក់ទុកចិត្តពីប្រជាជន និងសាធារណជនមកលើប្រព័ន្ធដឹកនាំគ្រប់គ្រងរបស់ធនាគារជាតិនៃកម្ពុជា។ ទន្ទឹមនឹងនេះ លោកនៅបានស្នើឲ្យមន្ត្រីម្នាក់ៗមានការបង្កើនសមត្ថភាព និងមានការប្ដេជ្ញាចិត្តខ្ពស់និងមានការគោរពវិន័យ តួនាទី តាមភារកិច្ចរៀងៗខ្លួន និងមានសាមគ្គីភាពផ្ទៃក្នុងឲ្យរឹងមាំ។
ទន្ទឹមនឹងនេះដែរ លោក ជា ចាន់តូ ក៏បានស្នើដល់មន្ត្រីវ័យក្មេងដែលជាអ្នកបន្តវេនឲ្យខិតខំប្រឹងប្រែងរៀន និងទាញយកបទពិសោធន៍ពីមន្ត្រីជំនាន់មុនៗសម្រាប់ឲ្យខ្លួនក្លាយជាអ្នកដឹកនាំល្អប្រកបដោយចំណេះដឹង និងចំណេះធ្វើ ដើម្បីរួមចំណែកអភិវឌ្ឍសង្គមកម្ពុជាកាន់មានការរីកចម្រើនក្រោមដំបូលសុខសន្តិភាព។
ហើយត្រូវបន្តគាំទ្រនយោបាយ ឈ្នះឈ្នះ របស់សម្ដេចតេជោ ហ៊ុន សែន និងគោលនយោបាយរាជរដ្ឋាភិបាលសម្រាប់អភិវឌ្ឍភាពសង្គមជាតិ និងអនាគតកូនចៅជំនាន់ក្រោយៗទៀត៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ