រាជធានីភ្នំពេញ ៖ សម្តេចតេជោហ៊ុន សែន នាយករដ្ឋមន្ត្រីបានអះអាងថា យុវជននាសម័យបច្ចុប្បន្ននេះមានឱកាសច្រើនជាងយុវជនសម័យមុន ព្រោះពួកគេបានសិក្សា និងរៀនជំនាញបានស្រួល ។ ក្នុងពិធីប្រគល់សញ្ញាបត្រដល់និស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចនាព្រឹកថ្ងៃទី២៦ ធ្នូ នៅវិទ្យាស្ថានជាតិអប់រំសម្ដេចតេជោហ៊ុន សែន ថ្លែងថា យុវជនរបស់យើងនៅសម័យនេះ អាចចាត់ ទុកជាយុវជនមានសំណាងជាងយុវជនសម័យមុន ដោយសារយុវជនសម័យមុនបានបាត់បង់ឱកាសអស់ ហើយ នៅពេលប្រទេសមានសន្តិភាពក្នុងដំណាក់កាលចន្លោះឆ្នាំ១៩៥៣-១៩៥៤ ដល់ឆ្នាំ១៩៧០ ក្រោមការដឹកនាំដោយសម្តេចឪព្រះបរមរតនកោដ្ឋរបស់យើងគឺយុវជនមានឱកាស ។
ប៉ុន្តែយុវជនបានបាត់បង់ឱកាសក្នុងរយៈពេលសង្គ្រាមឆ្នាំ១៩៧០ដល់១៩៧៥ និងពិសេសនោះក្នុងរបបប្រល័យពូជសាសន៍ប៉ុល ពត ឆ្នាំ១៩៧៥ដល់ឆ្នាំ១៩៧៩ ។ ក្នុងឆ្នាំ១៩៧០ដល់១៩៧៥ ឱកាសរបស់យុវជនមិនទាន់បានបាត់ទាំងស្រុងនោះទេ ដោយសារនៅក្នុងរដ្ឋកាល លន់ នល់ បានបណ្តុះបណ្តាលយុវជនរៀនសូត្រ ប៉ុន្តែនៅក្នុងសម័យប៉ុល ពត យុវជនគឺបានបាត់បង់ទាំងស្រុង ។
សម្តេចតេជោក៏បានលើកឡើងថា បន្ទាប់ពីអនុវត្តនូវនយោបាយឈ្នះ-ឈ្នះដែលថ្ងៃទី២៩ ធ្នូ គឺជាខួបលើកទី២១ជោគជ័យនៃការអនុវត្តនយោបាយឈ្នះ-ឈ្នះ ដែលបានបង្រួបបង្រួម និងបញ្ចប់សង្គ្រាម និងឯកភាពទឹកដី ដែលពីមុនបានចែកជាតំបន់ត្រួតត្រាគ្នាជា ចម្រៀកៗ ។ សម័យឥឡូវនេះមិនមែនជាសម័យចាប់ទា ហាននោះទេ គឺជាសម័យជ្រើសរើសទាហានដោយដាក់ពាក្យប្រឡង ដែលមួយឆ្នាំៗមានជាង១ម៉ឺននាក់ ។
ដូច្នេះ ខុសពីមុនទាហានដើរប្រមូលមនុស្សធ្វើទាហាន ដោយអ្នកខ្លះមិនធ្វើដោយរត់ចោលជួរថែមទៀត ។
ទាហានសម័យប្រទេសមានសន្តិភាពមានអ្នកចង់ធ្វើច្រើន ចំណែកទាហានសម័យសង្គ្រាមគេមិនចង់ធ្វើទេព្រោះទៅច្បាំងគ្នា ។ ប៉ុន្តែសម័យមុន គឺជាកាតព្វកិច្ចត្រូវតែធ្វើ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ