ខេត្តបាត់ដំបង៖ តាមប្រភពពីសមត្ថកិច្ចបានឲ្យដឹងថា ជនសង្ស័យចំនួន២នាក់បានជិះម៉ូតូទៅធ្វើសកម្មភាពវាយបំបែកកញ្ចក់ទូលក់ទូរស័ព្ទដៃមួយកន្លែង រួចប្រមូលយកទូរស័ព្ទបានចំនួន៤គ្រឿង ហើយជិះគេចខ្លួនដោយសុវត្ថិភាព កាលពីវេលាម៉ោងប្រមាណ៦និង៤៥នាទីយប់ថ្ងៃទី២៦ ធ្នូ នៅចំណុចភូមិជំនីក ឃុំអន្លង់វិល ស្រុកសង្កែ ។
គេមិនស្គាល់អត្តសញ្ញាណ ឬភិនភាគនៃជនសង្ស័យទាំង២នាក់នោះទេ ហើយក៏មិនស្គាល់ម៉ាកម៉ូតូដែលពួកគេជិះធ្វើសកម្មភាពប្លន់នោះដែរ។
បើតាមព័ត៌មានបឋមពីសមត្ថកិច្ចបាននិយាយថា មុនពេលកើតហេតុ ជនសង្ស័យទាំង២នាក់បានជិះម៉ូតូទៅឈប់ក្បែរតូបលក់អីវ៉ាន់ចាប់ហួយមួយកន្លែង រួចជនសង្ស័យម្នាក់ចុះដើរសំដៅតូបលក់ទូរស័ព្ទដៃយីហោ«ស៊ីនួន»។ ជននោះបានយកកូនពូថៅវាយបំបែកកញ្ចក់ទូដាក់តាំងទូរស័ព្ទលក់បណ្តាលឱ្យបែក ហើយប្រមូលយកទូរស័ព្ទដៃអស់ចំនួន៤គ្រឿងយ៉ាងប្រញ៉ាប់ប្រញ៉ាល់ រួចជិះគេចខ្លួនបាត់ភ្លាមៗដែរ។
តាមប្រភពពីម្ចាស់ហាងលក់ទូរស័ព្ទឈ្មោះផាន វណ្ណឈីន ភេទប្រុស អាយុ២៦ឆ្នាំ បានរាយការណ៏ប្រាប់សមត្ថកិច្ចថា ទូរស័ព្ទដែលត្រូវជនសង្ស័យប្លន់យកទៅនោះមានចំនួន៤គ្រឿង ម៉ាកផ្សេងៗគ្នា ។
ជនរងគ្រោះបានបញ្ជាក់ថា ក្រោយធ្វើសកម្មភាពរួច ជនសង្ស័យទាំង២នាក់បានដុតផាវបំផ្ទុះចំនួន២គ្រាប់ បង្កឱ្យមានការភ្ញាក់ផ្អើល រួចជិះម៉ូតូគេចខ្លួនបាត់ដោយសុវត្ថិភាព លុះបន្តិចក្រោយមកទើបសមត្ថកិច្ចចុះមកដល់កន្លែងកើតហេតុ ។
សមត្ថកិច្ចបាននិយាយថា គេមិនទាន់មានតម្រុយពីមុខសញ្ញាជនសង្ស័យនៅឡើយទេ តែនៅព្រឹកនេះមន្ត្រីជំនាញកំពុងចុះពិនិត្យទីតាំងកើតហេតុ និងសាកសួរជនរងគ្រោះ រួមទាំងសាក្សីនានាផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ