ខេត្តកំពង់ស្ពឺ ៖ បើតាមសេចក្តីរាយការណ៍បឋមបានឱ្យដឹងថា អស់រយៈពេល25ឆ្នាំកន្លងទៅហើយ ដែលបុរសម្នាក់ធ្លាក់ខ្លួនពិការ ហើយត្រូវអង្គុយលើរទេះរុញដោយពុំបានជួយអ្វីដល់ប្រពន្ធបន្តិចទាល់តែសោះ ចំពោះមូលហេតុដែលគាត់ធ្លាក់ខ្លួនពិការនេះ ត្រូវបានគាត់ប្រាប់ថា ដោយសារតែកាលនៅពីក្មេង គាត់បានឡើងបេះដូង…
ខេត្តកំពង់ស្ពឺ ៖ បើតាមសេចក្តីរាយការណ៍បឋមបានឱ្យដឹងថា អស់រយៈពេល25ឆ្នាំកន្លងទៅហើយ ដែលបុរសម្នាក់ធ្លាក់ខ្លួនពិការ ហើយត្រូវអង្គុយលើរទេះរុញដោយពុំបានជួយអ្វីដល់ប្រពន្ធបន្តិចទាល់តែសោះ ចំពោះមូលហេតុដែលគាត់ធ្លាក់ខ្លួនពិការនេះ ត្រូវបានគាត់ប្រាប់ថា ដោយសារតែកាលនៅពីក្មេង គាត់បានឡើងបេះដូង ចៃដន្យបានរបូតដៃធ្លាក់ពីលើដើមដូងមកដីអុកគូថ ទើបបណ្ដាលឱ្យគាត់ពិការរហូតចាប់តាំងពីពេលនោះមក។
សេចក្តីរាយការណ៍បន្តថា បុរសដែលធ្លាក់ខ្លួនពិការអង្គុយលើរទេះរុញខាងលើនេះ ឈ្មោះ ឆិល សាក់ រស់នៅភូមិនរាយណ៍ ឃុំពោធិ៍អង្គ្រង ស្រុកបរសេដ្ឋ ខេត្តកំពង់ស្ពឺ ហើយរាល់ថ្ងៃគាត់មិនអាចប្រកបកិច្ចការអ្វីក្រៅពីដើរសុំទានតាមរទេះរុញនោះទេ ជួនកាលថ្ងៃខ្លះសុំបាន ជួនកាលថ្ងៃខ្លះក៏សុំមិនបាន។
បើតាមបុរសកំសត់រូបនេះរៀបរាប់ថា គាត់ពិតជាអាណិតប្រពន្ធ និងកូនខ្លាំងណាស់ ជាពិសេសគឺកូនស្រីមួយរូបដែលវិកលចរិត។ រាល់ថ្ងៃគាត់ចេញទៅសុំទានបានលុយបន្តិចបន្តួចយកមកឲ្យប្រពន្ធ ដើម្បីទិញម្ហូបហូបជាមួយកូនស្រីពិការ។ រូបគាត់មិនអាចធ្វើអ្វីបាននោះទេ ក្រៅពីដើរសុំទានគេអង្គុយក្រោមកំដៅថ្ងៃក្តៅហួតហែង ជួនកាលថ្ងៃខ្លះបាន ជួនកាលថ្ងៃខ្លះក៏មិនបាន តែបើជួបអ្នកចិត្តបុណ្យគេក៏ហុច 1000ទៅ 2000 រៀលក៏មាន ប៉ុន្តែថ្ងៃខ្លះ បើមិនបានជួបជាមួយអ្នកចិត្តបុណ្យទេ គាត់ក៏គ្មានប្រាក់ដែរ។
បុរសកំសត់រូបនេះបានរៀបរាប់ថា ប្រពន្ធរបស់គាត់រាល់ថ្ងៃស៊ីឈ្នួលមើលថែកូនតូចឱ្យគេដោយបានប្រាក់ឈ្នួលតិចតួចដែរ។ ចំពោះជីវភាពគឺគាត់ខ្សត់ខ្លាំងណាស់ សូម្បីតែដំបូលនិងជញ្ជាំងផ្ទះ ក៏ត្រូវបានអ្នកជិតខាងឱ្យស័ង្កសីយកមកបិទបាំងដែរ ព្រោះគាត់គ្មានលទ្ធភាពរកលុយទិញយកមកបានទេ ។ ហើយរាល់ថ្ងៃរស់អាស្រ័យទៅលើការសុំទាន និងប្រាក់កម្រៃប្រពន្ធស៊ីឈ្នួលមើលកូនតូចឲ្យគេតែប៉ុណ្ណោះ ក្រៅពីនោះគឺពុំមានអ្វីនោះទេ លើសពីនេះទៅទៀត ក៏មិនដែលមានអង្គការខាងណាផ្ដល់អំណោយដល់គាត់ដែរ។
ជាចុងក្រោយ រូបគាត់ និងភរិយា គ្មានអ្វីក្រៅពីលើកម្រាមដៃដប់សំពះសុំក្តីសន្តោសប្រណីពីសប្បុរសជននោះទេ ព្រោះថា ជីវភាពរបស់គាត់ពិតជាលំបាកខ្លាំងណាស់ ដូចសប្បុរសជនឃើញនឹងភ្នែកហើយ ។ បើសិនជាសប្បុរសជនមានក្តីមេត្តាសន្តោសប្រណីដល់គាត់ សូមទាក់ទងទៅអាសយដ្ឋានរបស់គាត់ខាងលើនោះ នឹងជួប ឃើញផ្ទាល់ពីជីវភាពរស់នៅរបស់គាត់ជាក់ជាមិនខានឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ