ខេត្តកំពង់ស្ពឺ ៖ បន្ទាប់ពីកោះសន្តិភាពចេញផ្សាយអំពីជីវិតកំសត់របស់លោកតារើសអេតចាយម្នាក់ ធ្វើឱ្យសប្បុរសជនដែលមានមេត្តាធម៌បានបរិច្ចាគធនធានផ្ទាល់ខ្លួនជូនដល់លោកតាដើម្បីទុកដោះស្រាយក្នុងជីវភាពប្រចាំថ្ងៃ។
សប្បុរសជនខាងលើរួមមាន លោកឧត្តមសេនីយ៍ត្រីជូ សារុន មេបញ្ជាការកងរាជអាវុធហត្ថខេត្ត ថវិកាចំនួន៣០០.០០០រៀល, លោកឱម ណាហ្គារ៉ា និងលោកស្រីបូរ្យី កាន់នីកា ថវិកាចំនួន១០០ដុល្លារ, អ្នកនាង ណារ៉េន បុគ្គលិកកោះសន្តិភាពថវិកាចំនួន១០ដុល្លារ, លោកសុខ ប៊ុនវីរ: មន្ត្រីអធិការកិច្ចក្រសួងការងារថវិកាចំនួ៥០.០០០រៀល, កញ្ញា ស្រី នួន បុគ្គលិកមជ្ឈមណ្ឌលកំសាន្តឌឹឃ្វីនថវិកាចំនួន២០.០០០រៀល និងយុវតី ត្រា សុខេធីតា រៀននៅសាលាសុវណ្ណភូមិថវិកាចំនួន៤០.០០០រៀល។
ជំនួសមុខឱ្យលោកតាកែវភឹម លោកឈឹម យៀង មេភូមិស្លែង បានថ្លែងអំណរគុណយ៉ាងជ្រាលជ្រៅដល់សប្បុរសជនទាំងអស់ដែលបានចែករំលែកនូវថវិកាផ្ទាល់ខ្លួនជួយឧបត្ថម្ភដល់លោកតាកែវភឹម ដែលជួបការលំបាកនាពេលនេះ។ លោកមេភូមិក៏បានជូនពរដល់សប្បុរសជនទាំងអស់សូមជួបប្រទះតែពុទ្ឋពរទាំង៥ប្រការកុំបីឃ្លៀងឃ្លៀតឡើយ។
សូមរំលឹកថា លោកតាកែវ ភឹម អាយុ៦៩ឆ្នាំ រស់នៅភូមិស្លែង ឃុំស្វាយរំពារ ស្រុកបរសេដ្ឋខេត្តកំពង់ស្ពឺ បានរៀបរាប់ថា លោកតារស់នៅម្នាក់ឯងអស់រយៈពេល១០ឆ្នាំមកហើយបន្ទាប់ពីប្រពន្ធរបស់គាត់បានលាចាកលោកទៅ ។ លោកតាក៏មានកូនចៅនឹងគេដែរ ប៉ុន្តែកូនចៅបានបែកទីលំនៅ ក្រោយពីពួកគេរៀបការអស់ទៅ រាល់ថ្ងៃលោកតារស់នៅម្នាក់ឯងក្នុងខ្ទមតូចមួយនៅភូមិស្លែង ដោយប្រកបរបរចិញ្ចឹមជីវិតគឺដើររើសអេតចាយ។
លោកតារៀបរាប់ទៀតថា ការចេញទៅរើសអេតចាយនោះ គឺគាត់ត្រូវធ្វើដំណើរចេញពីផ្ទះតាំងពីព្រលឹមស្រាងៗ ដើររើសគ្រប់ច្រកល្ហក លុះដល់ពេលបាយ គាត់ក៏ទៅសុំបាយព្រះសង្ឃនៅវត្តស្លាបលែងដើម្បីហូបនៅពេលថ្ងៃត្រង់ ដោយពេលល្ងាចត្រឡប់មកពីរើសអេតចាយវិញរហូតដល់ម៉ោង៧ទៅ៨យប់ ទើបគាត់បានហូបបាយ។
លោកតាបានរៀបរាប់បន្តទៀតថា ការរើសអេតចាយមិនបានច្រើននោះទេ ពីរបីថ្ងៃគាត់លក់សំបកដបម្ដងបានលុយ៣ពាន់រៀល ជីវភាពរបស់គាត់ពិតជាលំបាកខ្លាំងណាស់ ជាពិសេសនៅពេលគាត់ឈឺម្ដងៗ គ្មានប្រាក់សម្រាប់ព្យាបាលនោះទេ ៕ (កែសម្រួលដោយ ៖ ធីតា)
ចែករំលែកព័តមាននេះ