រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា បុរសម្នាក់ត្រូវបានសមត្ថកិច្ចប៉ុស្តិ៍នគរបាលបឹងទំពន់១ ឃាត់ខ្លួនយកទៅធ្វើការសាកសួរ បន្ទាប់ពីបុរសរូបនោះខឹងសាច់ញាតិ និងអ្នកជិតខាងផឹកស៊ីអត់ហៅរូបគេផឹកជាមួយដែរក៏បាននិយាយឌឺដងរហូតយកដែកចុងស្រួចចាក់ទៅលើមេការបូមលូរបស់ខ្លួន បណ្ដាលឲ្យរងរបួសធ្ងន់ ហេតុការណ៍នេះបានបង្កការភ្ញាក់ផ្អើល កាលពីវេលាម៉ោង១០យប់ថ្ងៃទី២៥ ខែធ្នូនេះ នៅចំណុចរោងស្នាក់នៅកម្មករបូមលូ ស្ថិតក្នុងភូមិចំរើនផល២ សង្កាត់បឹងទំពុន១ ខណ្ឌមានជ័យ ។
ជនរងគ្រោះមានឈ្មោះ វាសនា ហៅខ្នា អាយុ២៥ឆ្នាំ មុខរបរមេការឡានបូមលូ ស្នាក់នៅកន្លែងកើតហេតុ មានស្រុកកំណើតភូមិតាទឹម ឃុំជើងទង ស្រុកត្រាំកក់ ខេត្តតាកែវ ។ ចំណែកជនដៃដល់ឈ្មោះ ឌួង ចាន់ណារិទ្ធ ហៅខ្មៅ អាយុ២៧ឆ្នាំ មុខរបរកម្មករបូមលូ ស្នាក់នៅកន្លែងធ្វើការ មានស្រុកកំណើត ភូមិព្រែករំដេង ឃុំព្រែករំដេង ស្រុកត្រាំកក់ ខេត្តតាកែវ ។
តាមប្រភពពីសមត្ថកិច្ចបានឲ្យដឹងថា មុន និងឈានទៅដល់ការឃាត់ខ្លួនជនដៃដល់យកមកសាកសួរ គឺកម្លាំងសមត្ថកិច្ចបានទទួលដំណឹងពីបងប្អូនប្រជាពលរដ្ឋថា មានករណីហិង្សាវាយ និងចាក់គ្នានៅកន្លែងកើតហេតុខាងលើ ហើយគ្រាន់តែលឺដូច្នេះកម្លាំងសមត្ថកិច្ចបានចុះទៅដល់កន្លែងកើតហេតុ ដើម្បីសាកសួរទើបដឹងថា មានមនុស្សរបួសម្នាក់ត្រូវជាមេការឡានបូមលូត្រូវបញ្ជូនទៅសង្គ្រោះនៅមន្ទីរពេទ្យមិត្តភាពខ្មែរសូវៀត ។
នៅចំពោះមុខសមត្ថកិច្ចជនដៃដល់បានសារភាពថា នៅមុនពេលកើតហេតុ រូបគេទើបត្រឡប់មកពីលេងស្រុកកំណើតវិញលុះមកដល់ចំណុចកើតហេតុបានឃើញសាច់ញាតិបងប្អូន និងកម្មករបូមលូមានគ្នា៦ទៅ៧នាក់កំពុងអង្គុយផឹកស៊ីជុំគ្នាតែមិនបានហៅរូបគេផឹកជាមួយឡើយ ទើបធ្វើឲ្យរូបគេខឹងក៏បានជិះម៉ូតូហុងដាឌ្រីមមួយគ្រឿងទៅទិញស្រាបៀរចំនួន២កំប៉ុងយកមកអង្គុយផឹកនៅលើម៉ូតូតែឯង ហើយរូបគេបានស្រែកដាក់សាច់ញាតិបងប្អូន និងកម្មករបូមលូដែលកំពុងអង្គុយផឹកស៊ីជុំគ្នានោះថា កុំផឹកស៊ីមាត់ឡូឡាពេក ពេលនោះជនរងគ្រោះដើរទៅទះគាត់មួយដៃកណ្ដាលមុខធ្វើឲ្យរូបគេខឹងក៏បានយកដែកចុងស្រួចចាក់ត្រូវជនរងគ្រោះដែលជាមេការបើករថយន្តបូមលូ បណ្ដាលឲ្យត្រូវសៀតថ្កាខាងឆ្វេង ត្រូវបានបញ្ជូនទៅសង្គ្រោះនៅមន្ទីរពេទ្យ ចំណែករូបគេជាជនសង្ស័យចូលទៅរៀបចំដេក ស្រាប់តែសមត្ថកិច្ចទៅដល់ឃាត់ខ្លួនតែម្ដង ។ ដោយឡែកជនរងគ្រោះមិនបានបកស្រាយអ្វីនោះទេ ដោយតែកំពុងតែសំរាកព្យាបាលនៅមន្ទីរពេទ្យ ។
ក្រោយកើតហេតុបន្ទាប់ពីសាកសួរ រួចជនសង្ស័យត្រូវសមត្ថកិច្ចឃុំខ្លួនបណ្ដោះអាសន្ននៅប៉ុស្តិ៍នគរបាលបឹងទំពន់១ រង់ចាំជនរងគ្រោះដឹងខ្លួនចេញពីមន្ទីរពេទ្យមកដាក់ពាក្យបណ្ដឹងទើបចាត់ការបន្តទៀត៕
ចែករំលែកព័តមាននេះ