ខេត្តបាត់ដំបង ៖ ប្រជាពលរដ្ឋប្រមាណពី៣០ទៅ៤០នាក់ ដែលខ្លះបានបើកទាំងរថយន្តទៅជាមួយផង បាននិងកំពុងនាំគ្នាបន្តសម្រុកកាត់និងដឹកយកស្ពៃ «ជើងទា»យ៉ាងភ្លូកទឹកភ្លូកដី នៅព្រឹកថ្ងៃទី២៦ ខែធ្នូ ឆ្នាំ២០១៩នេះ នៅក្នុងដីចំការមួយកន្លែង ស្ថិតនៅភូមិតាគ្រក់ ឃុំត្រែង ស្រុករតនៈមណ្ឌល ដែលជនពិការម្នាក់ជាម្ចាស់ចំការនេះ បានបោះបង់ចោល ដោយសារតែគ្មានទីផ្សារ។ នេះបើតាមប្រភពព័ត៌មានពីពលរដ្ឋដែលកំពុងនាំគ្នាកាត់យកស្ពៃនៅក្នុងចំការនោះ។
អ្នកភូមិម្នាក់ដែលកំពុងមមាញឹកប្រមូលផលស្ពៃ បានប្រាប់កោះសន្តិភាព នៅព្រឹកថ្ងៃទី២៦ ខែធ្នូនេះថា រយៈពេល២ថ្ងៃហើយ ដែលអ្នកភូមិរាប់សិបនាក់នាំគ្នាទៅកាត់យកស្ពៃ «ជើងទា» នៅក្នុងដីចំការមួយកន្លែងរបស់កសិករ ឈ្មោះ អ៊ឹម សុភ័ក្រ ដែលជាជនពិការដៃម្ខាងនៅចំណុចភូមិ-ឃុំខាងលើ។
អ្នកភូមិបាននិយាយថា កសិកររូបនេះបានប្រកាសឲ្យពលរដ្ឋនានា ទៅកាត់យកស្ពៃរបស់គាត់ដែលសេសសល់ជិតពាក់កណ្ដាលនៅក្នុងចំការ ដោយគ្មានការលក់ដូរទេ។ មូលហេតុ ដែលបុរសពិការរូបនេះ សម្រេចឲ្យស្ពៃទៅអ្នកភូមិកាត់យកទៅលក់ដូរ ឬយកទៅធ្វើជ្រក់សម្រាប់ទុកហូបក្នុងគ្រួសារ ព្រោះតែដំណាំស្ពៃនេះធ្លាក់ដល់តំលៃទាបបំផុត ស្ទើរតែគ្មានទីផ្សារតែម្ដង ដែលគាត់មិនអាចទុកយូរបាន។
ចំណែកម្ចាស់ដំណាំស្ពៃ លោកអ៊ឹម សុភ័ក្រ បានប្រាប់កោះសន្តិភាព នៅព្រឹកថ្ងៃដដែលនេះថា លោកបានសម្រេចប្រកាសផ្ដល់ស្ពៃជើងទានេះឲ្យទៅអ្នកភូមិ ដោយមិនគិតលុយ ដោយសារតែតំលៃស្ពៃនេះធ្លាក់ថ្លៃ ស្ទើរតែគ្មានទីផ្សារ ហើយមិនអាចទុករយៈពេលយូរបាន។ គាត់បានប្រកាសឲ្យអ្នកភូមិកាត់យកស្ពៃនេះ តាំងពីថ្ងៃទី២៥ ធ្នូ ហើយអ្នកភូមិបាននាំគ្នាមកកាត់យកស្ពៃគាត់ទាំងថ្ងៃទាំងយប់ ហើយបន្តប្រមូលរហូតដល់ព្រឹកថ្ងៃទី២៦ ធ្នូ នេះទៀតផង។
លោកអ៊ឹម សុភ័ក្រ ដែលជាជនពិការ និងជាប្រធានសហគមន៍កសិកម្មក្នុងភូមិគីឡូ៣៨ ផង បាននិយាយថា ឆ្នាំនេះ គាត់បានដាំដំណាំស្ពៃ «ជើងទា» នេះ លើផ្ទៃដីទំហំជិត១ហិចតា រីឯអ្នកភូមិដទៃទៀតក៏ដាំដំណាំស្ពៃនេះជាច្រើនកន្លែងដូចគ្នាដែរ តែដល់ពេលប្រមូលផល ស្រាប់តែទីផ្សារធ្លាក់ចុះ ហើយស្ទើរតែគ្មានម៉ូយរកទិញទៀតផង។ គាត់បានប្រាប់ថា ដំណាំស្ពៃគាត់បានចាប់ផ្ដើមប្រមូលផលមុនគេ ដែលដំបូងលក់បានតំលៃ៥០០រៀលក្នុង១គីឡូក្រាម។ លុះប្រមូលផលលក់បានត្រឹម៦០% ស្រាប់តែតំលៃស្ពៃធ្លាក់ចុះសល់ត្រឹម៣០០រៀលក្នុង១គីឡូក្រាម ហើយស្ទើរតែគ្មានអ្នកទទួលទិញទៀត។
គាត់បានបញ្ជាក់ថា ដោយសារតែតំលៃស្ពៃធ្លាក់ចុះដល់កំរិតបែបនេះ និងមិនអាចទុកយូរថ្ងៃបានទៀត ទើបគាត់សម្រេចប្រកាសឲ្យអ្នកភូមិនាំគ្នាមកប្រមូលយក ដោយមិនគិតថ្លៃ។ គាត់និយាយបន្ថែមថា ក្រោយពីមានការផ្សព្វផ្សាយអំពីតំលៃស្ពៃគាត់ធ្លាក់ដល់កំរិត រហូតបោះបង់ឲ្យទៅអ្នកភូមិមិនគិតថ្លៃ ទើបនៅព្រឹកថ្ងៃទី២៦ ធ្នូ មានមន្ត្រីជំនាញ នៃមន្ទីរកសិកម្មខេត្តប៉ុន្មាននាក់ ចុះទៅពិនិត្យស្ថានភាពដំណាំដល់ចំការរបស់គាត់ ខណៈកសិករដទៃទៀតដែលមានដាំណាំស្ពៃដូចគ្នាដែរ និងត្រៀមប្រមូលផលនាពេលខាងមុខនេះ កំពុងមានក្ដីបារម្ភយ៉ាងខ្លាំងអំពីទីផ្សារនេះ។
កោះសន្តិភាព មិនទាន់អាចសុំការបំភ្លឺពីមន្ត្រីជំនាញកសិកម្មដែលបានចុះទៅដល់ចំការស្ពៃបានភ្លាមៗទេ នៅព្រឹកថ្ងៃទី២៦ ធ្នូនេះ ជុំវិញព័ត៌មានទីផ្សារស្ពៃដែលកំពុងដាំក្បាលចុះនេះ។ ប៉ុន្តែបើតាមប្រភពពីប្រជាកសិករដែលកំពុងសំណេះសំណាលរកដំណោះស្រាយជាមួយមន្ត្រីជំនាញទាំងនោះ បានស្រង់សំដីថា ក្នុងស្ថានភាពចំពោះមុខនាពេលនេះ មន្ត្រីជំនាញហាក់គ្មានដំណោះស្រាយទេ។ ប៉ុន្តែមន្ត្រីដែលចុះទៅនោះបានអះអាងថា ពួកគេនឹងព្យាយាមជួយរកដំណោះស្រាយផ្នែកទីផ្សារសម្រាប់កសិករនានា ដែលត្រៀមប្រមូលផលស្ពៃនាពេលខាងមុខនេះ។
ចំណែកលោក អ៊ឹម សុភ័ក្រ បានស្រង់សំដីមន្ត្រីជំនាញដែរថា ក្រៅពីសន្យាជួយរកដំណោះស្រាយទីផ្សារស្ពៃ ដែលកសិករដទៃទៀត ត្រៀមប្រមូលផលនាពេលខាងមុខនេះ មន្ត្រីជំនាញទាំងនោះបានណែនាំដល់កសិករក្នុងការដាំដុះដំណាំស្ពៃ សម្រាប់ឆ្នាំក្រោយៗទៀត។ មន្ត្រីជំនាញបានណែនាំឲ្យកសិករត្រូវកំណត់ឲ្យបានច្បាស់លាស់អំពីទំហំដីដែលត្រូវដាំ និងពេលវេលានៃការដាំ ដើម្បីឲ្យសមស្របទៅនឹងទីផ្សារ ហើយត្រូវចងក្រងជាសហគមន៍ឲ្យបានច្បាស់លាស់ទៀតផង។
កសិករពិការរូបនេះហាក់មិនហ៊ានធ្វើការស្និដ្ឋានបានទេ អំពីការធ្លាក់ចុះតំលៃស្ពៃនៅពេលនេះ រីឯមន្ត្រីជំនាញ ក៏មិនបានបង្ហើបអំពីរឿងនេះដែរ។ ប៉ុន្តែគាត់បានលើកឡើងថា អ្វីដែលកសិករកំពុងប្រឈមខ្លាំងនាពេលនេះ គឺការដាំក្បាលចុះនៃតម្លៃស្ពៃដែលពួកគាត់ត្រៀមប្រមូលផលស្ពៃនាពេលឆាប់ៗខាងមុខនេះ ដែលអាចប្រឈមនឹងការខាតបង់ធ្ងន់ធ្ងរ ប្រសិនបើទីផ្សារស្ពៃនៅតែមិនអាចងើបរួច។ ទោះយ៉ាងណាក៏ដោយ លោកអ៊ឹម សុភ័ក្រ ជាកសិករពិការរូបនេះ បានប្រាប់បន្ថែមថា ដំណាំស្ពៃដែលលោកបានប្រគល់ឲ្យអ្នកភូមិប្រមូលយកនោះ ទំនងអាចនឹងប្រមូលអស់ពីដីចំការនៅរសៀលថ្ងៃដដែលនេះហើយ៕ (កែសម្រួលដោយ ៖ បុប្ផា)
ចែករំលែកព័តមាននេះ