ខេត្តព្រះសីហនុ ៖ រសៀលថ្ងៃទី២៤ ធ្នូ រដ្ឋបាលខេត្តព្រះសីហនុបានបើកកិច្ចប្រជុំដើម្បីពិនិត្យនិងពិភាក្សា ការធ្វើអាជីវកម្មកាស៊ីណូអនឡាញក្នុងខេត្ត ក្រោមអធិបតីភាព លោក គួច ចំរើន…
ខេត្តព្រះសីហនុ ៖ រសៀលថ្ងៃទី២៤ ធ្នូ រដ្ឋបាលខេត្តព្រះសីហនុបានបើកកិច្ចប្រជុំដើម្បីពិនិត្យនិងពិភាក្សា ការធ្វើអាជីវកម្មកាស៊ីណូអនឡាញក្នុងខេត្ត ក្រោមអធិបតីភាព លោក គួច ចំរើន អភិបាលខេត្តព្រះសីហនុ និងលោកឧត្តមសេនីយ៍ឯក សៀង សេន ប្រធាននាយកដ្ឋានប្រឆាំងបទល្មើសល្បែង ពាណិជ្ជកម្មនៅសាលាខេត្តព្រះសីហនុ ។
លោក គួច ចំរើន អភិបាលខេត្តមានប្រសាសន៍ថា ដោយអនុវត្តតាមសារាចរណែនាំរបស់រាជរដ្ឋាភិបាលកម្ពុជា គឺមិនអនុញ្ញាតឱ្យមានល្បែងអនឡាញនៅព្រះរាជាណាចក្រកម្ពុជា គិតត្រឹមម៉ោង០ ថ្ងៃទី៣១ ធ្នូខាងមុខនេះ ដូច្នេះគ្រប់ភាគីពាក់ព័ន្ធត្រូវត្រៀមសហការដើម្បីត្រួតពិនិត្យតាមដាននូវរាល់កាស៊ីណូទាំងឡាយណាដែលនៅតែបន្តបើកឲ្យលេងល្បែងតាមអនឡាញ ។
ដូច្នេះយើងត្រូវធ្វើការជូនដំណឹងដល់កាស៊ីណូក្នុងក្រុង-ស្រុកទាំងអស់ ដែលមានបើកឲ្យលេងល្បែងអនឡាញនាពេលកន្លងមកគឺមិនអនុញ្ញាតឲ្យបើកលេងបន្តទៀតទេ ។ ប្រភពខាងលើបានបញ្ជាក់ឲ្យដឹងទៀតថា ប្រសិនបើកាស៊ីណូឬកន្លែងណា នៅតែបើកឲ្យដំណើរការលេងល្បែងអនឡាញបន្តទៀត និងទទួលខុសត្រូវទៅតាមផ្លូវច្បាប់ ។ លោកអភិបាលខេត្តក៏បានណែនាំដល់មន្ត្រីពាក់ព័ន្ធគ្រប់ផ្នែកមិនត្រូវទៅរំខានឬបំភ័យដល់ជនបរទេសគឺត្រូវយកចិត្តដល់អ្នកវិនិយោគបរទេសនិងខ្មែរ ដើម្បីឱ្យពួកគេមានភាពកក់ក្តៅ ក្នុងការមកវិនិយោគនៅខេត្តព្រះសីហនុ ។
លោកឧត្តមសេនីយ៍ឯក សៀង សេន ប្រធាននាយកដ្ឋានប្រឆាំងបទល្មើសល្បែងពាណិជ្ជកម្ម មានប្រសាសន៍ថា ដើម្បីអនុវត្តតាមសេចក្តីសម្រេចរបស់រាជរដ្ឋាភិបាលឱ្យមានប្រសិទ្ធភាពក្នុងភូមិសាស្ត្រខេត្តព្រះសីហនុ យើងត្រូវប្រើប្រាស់វិធានការ២ចំណុច ក្នុងនោះវិធានការរដ្ឋបាល ទាមទារយើងមានទិន្នន័យទីតាំងល្បែងអនឡាញ ក្នុងសង្កាត់ ក្រុង ស្រុកនីមួយៗ និងផ្អែកលើសេចក្តីសម្រេចបិទរបស់រាជរដ្ឋាភិបាល ត្រូវធ្វើការជូនដំណឹងជាសាធារណៈគ្រប់ទីតាំងកាស៊ីណូ ដើម្បីបិទបញ្ចប់ជាស្ថាពរល្បែងអនឡាញនៅត្រឹមម៉ោង០ ថ្ងៃទី៣១ ធ្នូ ឆ្នាំ២០១៩ខាងមុខ ក្រោយពីសេចក្តីជូនដំណឹង មន្ត្រីយើងនឹងចុះត្រួតពិនិត្យទីតាំងនៅក្នុងក្រុង ស្រុក ក្នុងខេត្តព្រះសីហនុដោយអនុវត្តតាមយុទ្ធសាស្ត្របែបភ្លៀងរលឹម ។
ជាមួយគ្នានេះពាណិជ្ជករប្រកបរបរទិញ-លក់អចលនទ្រព្យពុះដីឡូត៍លក់និងម្ចាស់ផ្ទះសំណាក់ សណ្ឋាគារដែលមានបន្ទប់ជួលឲ្យជនជាតិចិនជាច្រើននាក់សុំមិនបញ្ចេញឈ្មោះបានត្អូញត្អែរបញ្ចេញពីកង្វល់របស់ពួកគាត់ថា ក្រោយពេលដែលរាជរដ្ឋាភិបាលបានចេញសារាចរណែនាំបញ្ឈប់ការលេងល្បែងភ្នាល់ដូចបានរៀបរាប់ខាងលើ ។
យោងតាមស្មារតីនៃកិច្ចប្រជុំរបស់រដ្ឋបាលសាលាខេត្តនៅរសៀលថ្ងៃទី២៤ ខែធ្នូ ឆ្នាំ២០១៩កន្លងមកនេះ ត្រូវចាប់ផ្តើមអនុវត្តទៅតាមសារាចរណែនាំរបស់រាជរដ្ឋាភិបាល ត្រូវតែបិទបញ្ចប់អាជីកម្មល្បែងភ្នាល់តាមម៉ាស៊ីនអេឡិចត្រូនិក តាមអនឡាញ(INtenetONling)គិតត្រឹមវេលាម៉ោង០ ថ្ងៃទី៣១ ធ្នូ ធ្វើឲ្យជនជាតិចិនបាននាំគ្នាវេចបង្វិចចាកចេញពីខេត្តព្រះសីហនុទៅប្រទេសកំណើតវិញជាបន្តបន្ទាប់ ធ្វើឲ្យម្ចាស់ផ្ទះសំណាក់.សណ្ឋាគារ ដែលជួលឲ្យចិននិងអ្នកប្រកបមុខរបរផ្សេងៗមួយចំនួនត្រូវបានជួបហានិភ័យ ។
ចំពោះអ្នកមានដីជួលនៅខេត្តព្រះសីហនុ សុទ្ធតែត្រូវបានជនជាតិចិន ដែលចូលសញ្ជាតិទិញយកដាច់តែម្តង ។ បច្ចុប្បន្នដីទាំងនោះកំពុងតែស្ថិតក្នុងសភាពទ្រឹង មិនមានសកម្មភាព មិនមានសញ្ញាមួយណាដែលមានអ្នកជួលឬទិញបន្ត។ បើមានអ្នកជួលឬទិញ ក៏សុំបញ្ចុះតម្លៃខុសពីពេលមុនរហូតដល់ទៅ៥០% ។ ដូចជាករណីជួលផ្ទះ និងសណ្ឋាគារដែរ ។ ប្រភពខាងលើបានបន្តឲ្យដឹងទៀតថា ទីតាំងខ្លះដែលជនជាតិចិនបានជួលមកទល់ពេលថ្មីនេះពួកគេបាននាំគ្នាចាកចេញទាំងយប់និងបានលួចដោះយកសម្ភារនៅក្នុងផ្ទះឬសណ្ឋារគារយកទៅលក់ឡាយឡុងមិនឲ្យម្ចាស់ផ្ទះដឹងមុនឡើយ ។អ្នកមានដី ផ្ទះសំណាក់ សណ្ឋាគារជួលខ្លះត្រូវបានជនជាតិចិនបញ្ចប់មុនកិច្ចសន្យាមកដល់ជាហេតុធ្វើឲ្យមានហានិភ័យខ្ពស់កំពុងតែវាយលុកជាបណ្តើរៗដូចជាម្ចាស់ដី ម្ចាស់ផ្ទះ ម្ចាស់សណ្ឋាគារណាដែលជាប់កម្ចីឥណទានធនាគារ ។ល។
មួយផ្នែកទៀតគឺផលប៉ះពាល់អ្នកជួលរថយន្តក្រោយចិនចាកចេញពីខេត្តព្រះសីហនុ ម្ចាស់រថយន្តកំពុងលក់រថយន្តបញ្ចុះតម្លៃស្ទើរតែ៥0%នៅតាមកន្លែងជួលរថយន្តស្របពេលរថយន្តជួលឲ្យចិនហើយចិនបានប្រគល់មកឲ្យម្ចាស់វិញ ។ ចំណែកអ្នកជួលដីឬពុះដីឡូត៍លក់ នៅពេលវិស័យអនឡាញកំរើកយ៉ាងគំហុក ចរន្តលុយបានចរាចរពីតំបន់មួយទៅតំបន់មួយទៀតតាមរយៈអ្នកដែលមានផ្ទះ សណ្ឋាគារ និងដីជួល ឬលក់ឲ្យចិនធ្វើឲ្យឈ្មួញពុះដីឡូត៍លក់ ឬសង់ផ្ទះល្វែងបានកាក់កបយ៉ាងក្រាស់ក្រែលតែបច្ចុប្បន្នការលក់ដីឡូត៍ សង់ផ្ទះល្វែងលក់ ហាក់នៅទ្រឹងមួយកន្លែង តែមិនទាន់មានសញ្ញាណាមួយបញ្ចុះតម្លៃលក់ចេញទេ ហើយជំនួញពុះដីឡូត៍ឬសង់ផ្ទះល្វែងលក់ក៏មិនបន្តគម្រោងថ្មីទៀតដែរ ។
សម្ដេចតេជោ ហ៊ុន សែន នាយករដ្ឋមន្ដ្រី កាលពីរាត្រីថ្ងៃទី២១ ធ្នូ បានប្រកាសយ៉ាងដាច់ណាត់ថា មិនឲ្យមានល្បែងអនឡាញ នៅប្រទេសកម្ពុជាទៀតនោះឡើយ បើមិនដូច្នោះប្រទេសកម្ពុជា នឹងក្លាយជាកន្លែងលាងលុយកខ្វក់ និងជង្រុកពួកម៉ាហ្វីយ៉ា ដែលកើតចេញពីហ្គេមអនឡាញនេះតែម្ដង ជាមួយនេះសម្តេចក៏ស្វាគមន៍ដល់អ្នកជំនួញពិតប្រាកដដែរ ។
សម្ដេចតេជោបានសង្កត់ធ្ងន់ទៀតថា នៅសល់តែប៉ុន្មានថ្ងៃទៀតប៉ុណ្ណោះ ហ្គេមអនឡាញនឹងបញ្ចប់វត្តមាននៅកម្ពុជាទាំងស្រុង ក្រោយដល់ពេលកំណត់នៃការពន្យាសុពលភាពធ្វើអាជីវកម្ម ។ សម្ដេចតេជោនាយករដ្ឋមន្ដ្រី បានអះអាងថា ប្រទេសណាមានបង្កើតឲ្យហ្គេមអនឡាញក៏បង្កើតចុះ ប៉ុន្ដែកម្ពុជាមិនបង្កើតឲ្យមានជាដាច់ខាត ។ ក្នុងពិធីបើកបុណ្យសមុទ្រលើកទី៨ ដែលប្រារព្ធធ្វើឡើងនៅក្នុងខេត្តកំពត សម្ដេចតេជោ ហ៊ុន សែន បានសម្ដែងនូវការងឿងឆ្ងល់ ចំពោះអ្នកដែលព្រួយបារម្ភ ក្រោយកម្ពុជាបិទហ្គេមអនឡាញ ថាអាជីវកម្មមានការធ្លាក់ចុះ បន្ទាប់ពីជនជាតិចិនចាកចេញពីប្រទេសកម្ពុជា ដែលចំណុចនេះសម្ដេចបានចោទវិញសួរថា «តើអ្នកចង់បានអ្វីឲ្យពិតប្រាកដ ? » ព្រោះនៅពេលចិនចូលមក ថាចូលមកច្រើន ដល់ពេលចេញទៅវិញ ថាចេញទៅវិញច្រើន ។
សម្ដេចតេជោ ហ៊ុន សែនបានមានប្រសាសន៍យ៉ាងដូច្នេះថា «មនុស្សមួយចំនួនព្រួយបារម្ភអំពីបញ្ហាបាត់
អនឡាញ (ហ្គេមអនឡាញ) នៅពេលដែលមានអនឡាញ នាំគ្នាព្រួយបារម្ភអំពីវត្តមានជនជាតិចិននៅកម្ពុជា នៅពេលដែលយើងបិទអនឡាញគេព្រួយបារម្ភអំពីការបាត់ជនជាតិចិនពីកម្ពុជា តើអ្នកចង់បានអ្វីពិតប្រាកដ ? សម្រាប់ខ្ញុំសង្កេតឃើញថា បើសេដ្ឋកិច្ចកម្ពុជាពឹងពាក់តែលើអនឡាញ កម្ពុជានឹងក្លាយទៅជាអ្នករងគ្រោះសម្រាប់បញ្ហាសន្ដិសុខជាតិរបស់ខ្លួន យើងស្ថិតនៅក្រោមការគំរាមកំហែង នៃក្រុមម៉ាហ្វីយ៉ាដែលជ្រៀតចូលមកក្នុងប្រទេសរបស់យើង ដើម្បីធ្វើសកម្មភាព យើងក៏ថិតនៅក្នុងស្ថានភាព ដែលនឹងក្លាយទៅជាប្រទេសនៃគោលដៅ នៃការលាងលុយកខ្វក់ តាមរយៈអនឡាញ ។
យើងនឹងបាត់បង់នូវសុវត្ថិភាពអ្នកជំនួញធំៗ អ្នករកស៊ីធំៗដែលជាអ្នកមានប្រាក់មិនហ៊ានចូលមកកម្ពុជា ដោយសារខ្លាចពួកក្រុមម៉ាហ្យា ដូច្នេះអ្វីក៏ដោយត្រូវមានការបង់ថ្លៃ យើងសុខចិត្តមិនមានអនឡាញ ក៏ប៉ុន្ដែយើងច្បាស់ជានាំមកនូវប្រទេសរបស់យើងប្រកបដោយសន្ដិសុខ ហើយយើងនាំមកនូវដោយអ្នកវិនិយោគសុចរិត និងអ្នកវិនិយោគដែលមានប្រាក់កាសមករស់នៅកម្ពុជា ។ ផ្ទុយទៅវិញ បើសិនជាវត្តមានអនឡាញបន្ដ កម្ពុជានឹងក្លាយទៅជាអ្នករងគ្រោះ ហើយរងគ្រោះមុនគេគឺសន្ដិសុខរបស់យើងតែម្ដង បន្ទាប់ទៅគឺ នឹងក្លាយជាគោលដៅនៃការលាងលុយកខ្វក់ ដែលនៅលើពិភពលោក កំពុងតែប្រយុទ្ធប្រឆាំងនឹងការលាងលុយកខ្វក់ ព្រមទាំងភេរវកម្មហិរញ្ញប្បទាន សម្រាប់ភេរវកម្មដែលជាចំណុចគ្រោះថ្នាក់ ។ ដូច្នេះនៅសល់តែប៉ុន្មានថ្ងៃទៀត នឹងបាត់បង់ពីកម្ពុជាទាំងស្រុងហើយ ។
បុគ្គលិកកាស៊ីណូជនជាតិចិន និងខ្មែរជាច្រើននាក់ តវ៉ាបើកប្រាក់ខែ ក្រោយថៅកែរត់បាត់ថ្មីៗនេះ នៅក្រុងព្រះសីហនុ មិនខុសពីរោងចក្រវាយនភណ្ឌនោះទេ ថៅកែចិនមួយចំនួនបានធ្វើឱ្យកម្មករនិយោជិតផ្ទុះការតវ៉ាពេលបាត់វត្តមានថៅកែ ។ បុគ្គលិកជនជាតិចិន និងខ្មែរជាច្រើននាក់ ដែលធ្វើការនៅកាស៊ីណូយីហោ ដាយម៉ិនស៊ីសាខាទីពីរ ស្ថិតក្នុងសង្កាត់លេខ៣ ក្រុងព្រះសីហនុ បាននាំគ្នាមកស្វែងរកអន្តរាគមន៍ឲ្យសមត្ថកិច្ចជំនាញជួយដោះស្រាយបញ្ហា ក្រោយពេលថៅកែកាស៊ីណូ មិនបើកប្រាក់ខែដល់ពួកគាត់នៅល្ងាចថ្ងៃទី២៤ ធ្នូ ។
បុគ្គលិកកាស៊ីណូ បានប្រាប់បណ្តាញព័ត៌មានឲ្យដឹងថា ទាំងជនជាតិខ្មែរនិងចិនជាច្រើននាក់បាននាំគ្នាតវ៉ា ដោយសារក្រុមហ៊ុនកាស៊ីណូ មិនបានបើកប្រាក់ខែឲ្យដែលតាមការអះអាងពីបុគ្គលិកអ្នកបម្រើការថា ថៅកែចិនរត់បាត់ស្រមោល ហើយរកអ្នកទទួលខុសត្រូវបន្តមិនទាន់មាន ។ ភ្លាមៗនោះដែរ មន្ត្រីជំនាញមន្ទីរការងារខេត្តព្រះសីហនុ បានចុះទៅដល់កាស៊ីណូខាងលើនេះដើម្បីសម្របសប្រួល និងធ្វើការដោះស្រាយ ។ មានការកត់សម្គាល់ថា ថៅកែកាស៊ីណូមួយចំនួន ក្នុងខេត្តព្រះសីហនុ ចាប់ផ្តើមរត់ចោលបុគ្គលិកបណ្តើរៗហើយ ៕
ចែករំលែកព័តមាននេះ