ខេត្តកំពង់ឆ្នាំង ៖ ប្រជាកសិកររស់នៅក្នុងភូមិកោះក្របី សង្កាត់ផ្សារឆ្នាំង ក្រុងកំពង់ឆ្នាំង ដែលមានមុខរបរដាំស្ពៃ ក្រៅពីការងារធ្វើស្រែមានការសប្បាយរីករាយឡើងវិញ បន្ទាប់ពីដំណាំស្ពៃរបស់ពួកគាត់បានឡើងថ្លៃពី ១០០០រៀលទៅ១២០០រៀលក្នុង១គីឡូក្រាម ខុសពីមួយរយៈពេលកន្លងទៅដែលតម្លៃស្ពៃបានធ្លាក់ថ្លៃថោកពេក…
ខេត្តកំពង់ឆ្នាំង ៖ ប្រជាកសិកររស់នៅក្នុងភូមិកោះក្របី សង្កាត់ផ្សារឆ្នាំង ក្រុងកំពង់ឆ្នាំង ដែលមានមុខរបរដាំស្ពៃ ក្រៅពីការងារធ្វើស្រែមានការសប្បាយរីករាយឡើងវិញ បន្ទាប់ពីដំណាំស្ពៃរបស់ពួកគាត់បានឡើងថ្លៃពី ១០០០រៀលទៅ១២០០រៀលក្នុង១គីឡូក្រាម ខុសពីមួយរយៈពេលកន្លងទៅដែលតម្លៃស្ពៃបានធ្លាក់ថ្លៃថោកពេក មិនអាចទទួលយកបាន ។
ប្រជាកសិករទាំងនោះបានបញ្ជាក់ប្រាប់កោះសន្តិភាពឱ្យដឹងនៅព្រឹកថ្ងៃទី២៦ ខែធ្នូ នេះថា ពេលនេះស្ពៃបានឡើងថ្លៃវិញហើយ ក្នុងមួយគីឡូក្រាមថ្លៃពី១០០០ទៅ១២០០រៀល ធ្វើឲ្យពួកគាត់មានសេចក្តីសប្បាយរីករាយឡើងវិញ បន្ទាប់ពីរយៈពេលកន្លងទៅ ស្ពៃបានធ្លាក់ថ្លៃរហូតដល់ត្រឹមតែ៤០០រៀលប៉ុណ្ណោះក្នុង១គីឡូក្រាម ។ ពួកគាត់បានបញ្ជាក់ថា ស្ពៃបានឡើងថ្លៃប្រមាណជាង១០ថ្ងៃមកហើយ គាត់មិនដឹងថាមូលហេតុអ្វីដែលបណ្ដាលឲ្យចុះថ្លៃហួសហេតុនោះទេ ប៉ុន្តែពេលនេះរយៈពេលជាង១០ថ្ងៃហើយគឺបានឡើងថ្លៃវិញ ដែលធ្វើឱ្យពួកគាត់អាចទូទាត់ថ្លៃប្រេងបូមទឹកស្រោចស្ពៃ, ថ្លៃជី និងថ្លៃកម្មករ គឺបាននៅសល់ចំណេញតិចតួចគ្រាន់ចិញ្ចឹមជីវភាពគ្រួសារ ។
ប្រជាកសិករបានលើកឡើងថា ពេលស្ពៃចុះថ្លៃ ពួកគាត់សង្ស័យថា មានការនាំចូលបន្លែពីប្រទេសជិតខាង ទើបបណ្តាលឱ្យបន្លែក្នុងស្រុកធ្លាក់ថ្លៃបែបនេះ ហើយបើមានមែន គួរតែក្រសួងមានវិធានការជួយទប់ស្កាត់ការនាំចូលបន្លែពីប្រទេសជិតខាង ដើម្បីឱ្យបន្លែក្នុងស្រុកដាំដោយកសិករខ្មែរមានតម្លៃថ្លៃលើទីផ្សារផង ។
តាមការបញ្ជាក់ពីលោក ងិន ហ៊ុន ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តកំពង់ឆ្នាំង បាន ឱ្យដឹងថា ជាធម្មតា តម្លៃបន្លែលើទីផ្សារពេលណាសម្រុកពីតាមបណ្តាខេត្តចូលខ្លាំងទៅរាជធានីភ្នំពេញ ដែលជាកន្លែងប្រមូលផ្តុំ គឺធ្លាក់ថ្លៃបែបនេះហើយ ប៉ុន្តែវាមិនយូរទេ បន្តិចវានឹងឡើងថ្លៃវិញភ្លាម នៅពេលវាស្បើយការដឹកចូល ។ មិនមែនតែស្ពៃទេដែលឡើងថ្លៃ ពេលនេះបន្លែមួយចំនួនទៀតក៏បានឡើងថ្លៃដែរ ហើយវានឹងឡើងថ្លៃជាបន្តទៀតនៅពេលចុងដៃ ។
គួរបញ្ជាក់ដែរថា អ្នកភូមិកោះក្របីក្រៅពីការងារធ្វើស្រែ ពួកគាត់តែងតែដាំខ្ទឹម, ដាំស្ពៃជារៀងរាល់ឆ្នាំនៅពេលខែទឹកទន្លេបានស្រកចុះ ឆ្នាំខ្លះពួកគាត់ទទួលបានផលចំណេញ តែឆ្នាំខ្លះក៏មិនអាចទទួលផលចំណេញដែរ ដោយសារតែការចុះថ្លៃខ្លាំងពេក ។ ប៉ុន្តែពួកគាត់មិនបោះបង់ការងារដាំដុះនោះទេ គឺបន្តដាំជារៀងរាល់ឆ្នាំ ដើម្បីជួយទ្រទ្រង់ជីវភាពគ្រួសារ ៕ (កែសម្រួលដោយ ៖ ធីតា)
ចែករំលែកព័តមាននេះ