នៅក្នុងមង្គលសូត្រទី២៨ព្រះមានព្រះភាគត្រាស់សម្តែងថា សោវចស្សតា ភាវៈនៃបុគ្គលដែលគេទូន្មានប្រៀនប្រដៅបានដោយងាយជាមង្គលដ៏ឧត្តម ។
មនុស្សប្រដៅដោយងាយ គឺជាអ្នកដែលឆាប់ទទួលយកនូវដំបូន្មានឪពុកម្តាយ គ្រូអាចារ្យ ចាស់ព្រឹទ្ធាចារ្យ និងមតិយោបល់របស់បណ្ឌិតទាំងឡាយ ព្រោះភាពជាអ្នកឈ្លាសវៃមានការចេះដឹងច្រើន ឆាប់ពិចារណាឃើញនូវហេតុផលច្បាស់លាស់ថែមទាំងជាបុគ្គលមានចិត្តបើកទូលាយ បន្ទាបខ្លួនមិនប្រកាន់មានះ ។
តែទោះជាយ៉ាងណាតោងតែធ្វើដោយបញ្ញា ប្រយ័ត្នត្រូវជនពាលបញ្ចុះបញ្ចូល អូសទាញឱ្យលុះក្នុងគំនិតគិតខុស ។
ឯពួកជនដែលមិនលុះតាមដំបូន្មានមាតាបិតានិងបណ្ឌិតទាំងឡាយ ក៏ព្រោះតែភាពនៃខ្លួនជា អ្នកមិនឈ្លាសវៃ មិនមានការចេះដឹង ម្ល៉ោះហើយក៏មានការងងឹតងងល់ក្នុងអស្មិមានះយ៉ាងធ្ងន់ធរ ។
មានតែការខិតខំរៀនសូត្រនិងស្តាប់ធម៌ទេសនាជាដើមទេ ទើបអាចធ្វើខ្លួនឱ្យទៅជាបុគ្គលងាយប្រដៅបាន ។ ដូចនេះការខិតខំកសាងខ្លួនឱ្យបានក្លាយជាបុគ្គលដែលគេងាយប្រដៅបាន ជាមង្គលដ៏ឧត្តម ។ ដោយសាន សារិន
ចែករំលែកព័តមាននេះ