ប្រធានមន្ទីរដែនដីចាស់ ត្រូវបានផ្លាស់ដាក់មន្ត្រីថ្មីជំនួសវិញ
- កំពត
ខេត្តកំពត ៖ លោក ជាវ តាយ អភិបាលខេត្ត បានថ្លែងថា សព្វថ្ងៃនេះ ការងារសុរិយោដីនៅតាមក្រុង-ស្រុកមួយចំនួននៅមានបញ្ហា ដូច្នេះ…
ខេត្តកំពត ៖ លោក ជាវ តាយ អភិបាលខេត្ត បានថ្លែងថា សព្វថ្ងៃនេះ ការងារសុរិយោដីនៅតាមក្រុង-ស្រុកមួយចំនួននៅមានបញ្ហា ដូច្នេះ…
ខេត្តកំពត ៖ លោក ជាវ តាយ អភិបាលខេត្ត បានថ្លែងថា សព្វថ្ងៃនេះ ការងារសុរិយោដីនៅតាមក្រុង-ស្រុកមួយចំនួននៅមានបញ្ហា ដូច្នេះ លោកស្នើឲ្យប្រធានការិយាល័យភូមិបាលត្រូវដោះស្រាយបញ្ហានោះជាបន្ទាន់ ព្រោះបញ្ហាដីធ្លីវាផ្សារភ្ជាប់នឹងនយោបាយ ។
ថ្លែងនៅក្នុងពិធីប្រកាសតែងតាំងលោក ដាញ់សារី ជាប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ជំនួសលោក យិន វុឌ្ឍអតីតប្រធានមន្ទីរចាស់ដែលត្រូវផ្លាស់ប្ដូរទៅកាន់មុខតំណែងថ្មីនៅក្រសួងរៀបចំដែនដីនគរូបនីយកម្ម និងសំណង់ នាព្រឹកថ្ងៃទី២៣ ខែធ្នូ ឆ្នាំ២០១៩ នៅសាលប្រជុំសាលាខេត្ត លោក ជាវតាយ អភិបាលខេត្ត បានស្នើដល់ប្រធានការិយាល័យភូមិបាលក្រុង-ស្រុក ត្រូវដោះស្រាយបញ្ហាសេសសល់នៅក្នុងមូលដ្ឋានខ្លួនជាបន្ទាន់ ដើម្បីឆ្លើយតបទៅនឹងចក្ខុវិស័យរបស់សម្តេចតេជោនាយករដ្ឋមន្ត្រី ហ៊ុន សែន ដែលលោកតែងតែយកចិត្តទុកដាក់ចំពោះរឿងនេះយ៉ាងខ្លាំង ព្រោះបញ្ហាដីធ្លីបានផ្សារភ្ជាប់យ៉ាងជិតស្និទ្ធនឹងរឿងនយោបាយរបស់ប្រទេស ។ លោកអភិបាលខេត្តបានបញ្ជាក់ថា ដើម្បីសង់អគារបានរឹងមាំ ត្រូវសង់គ្រឹះពីក្រោមឡើងមកឲ្យបានរឹងមាំជាមុនសិន ទើបសង់អគារទៅអាចរឹងមាំបាន ។
លោកអភិបាលខេត្ត ក៏បានស្នើឲ្យស្មៀន និងមេឃុំ សង្កាត់ ទាំងអស់មិនត្រូវចុះកិច្ចសន្យាលើឯកសារដីណាដែលមិនទាន់មានប្លង់កម្មសិទ្ធិនោះទេ ព្រោះបើនៅតែបន្តធ្វើបែបនេះ ការដោះស្រាយបញ្ហានៅតែមិនចេះចប់មិនចេះហើយ ។ លោក ឆាន់ សាផាន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានផ្ដាំផ្ញើដល់ប្រធានមន្ទីរដែលទើបតែងតាំងចូលកាន់មុខតំណែងថ្មី ត្រូវបន្តអនុវត្តការងារដែលនៅសេសសល់ឱ្យបានចប់សព្វគ្រប់តាមផែនការនិងបន្តយកចិត្តទុកដាក់អនុវត្តឲ្យមានប្រសិទ្ធភាពថែមទៀត ក្នុងស្មារតីទទួលខុសត្រូវខ្ពស់ ស្របតាមតួនាទីភារកិច្ច ព្រមទាំងពង្រឹងការអនុវត្តច្បាប់ លិខិតបទដ្ឋានគតិយុត្តនានា និងគោលការណ៍ណែនាំផ្សេងៗរបស់រាជរដ្ឋាភិបាល ក៏ដូចក្រសួងរៀបចំដែនដី នគរូបនីយកម្ម និងសំណង់ និងរដ្ឋបាលខេត្ត ។
ពិសេសពង្រឹងស្មារតីសាមគ្គីភាព និងឯកភាពផ្ទៃក្នុងជាមួយថ្នាក់ដឹកនាំ មន្ត្រីរាជការគ្រប់ថ្នាក់ក្នុងមន្ទីរឲ្យបានល្អ ពោលគឺសំដៅលុបបំបាត់ភាពអសកម្មទាំងឡាយ និងបង្កើនស្មារតីគោរពក្រមសីលធម៌វិជ្ជាជីវៈ បង្កើនប្រសិទ្ធភាពការងារលើការផ្ដល់សេវាជូនប្រជាពលរដ្ឋដែលមករកសេវាពីមន្ទីរ ។ ជាមួយគ្នានេះ ត្រូវរៀបចំនីតិវិធីក្នុងការចេញវិញ្ញាបនបត្រសម្គាល់ម្ចាស់អចលនវត្ថុ ជាលក្ខណៈប្រព័ន្ធ ជូនប្រជាពលរដ្ឋឲ្យសម្រេចតាមផែនការ ។
ពាក់ព័ន្ធនឹងវិស័យសំណង់ ត្រូវចាត់មន្ត្រីឲ្យចុះពិនិត្យគុណភាពសំណង់ ជំរុញដល់បងប្អូនប្រជាពលរដ្ឋស្នើសុំច្បាប់អនុញ្ញាតមុនពេលសាងសង់ ធ្វើកិច្ចសហការជាមួយមន្ទីរអង្គភាពជុំវិញខេត្ត រដ្ឋបាលក្រុង ស្រុក ឃុំ សង្កាត់ ដើម្បីឲ្យការងារមានប្រសិទ្ធភាព តម្លាភាព និងគណនេយ្យភាព ក្នុងគោលដៅបម្រើផលប្រយោជន៍ជូនរាជរដ្ឋាភិបាល ក៏ដូចក្រសួង និងរដ្ឋបាលខេត្ត ព្រមទាំងប្រជាពលរដ្ឋប្រកបដោយឆន្ទៈម្ចាស់ការ ភក្ដីភាព មនសិការវិជ្ជាជីវៈ និងវប្បធម៌សាធារណៈផងដែរ ៕
ចែករំលែកព័តមាននេះ