ខេត្តត្បូងឃ្មុំ ៖ សម្តេចតេជោនាយករដ្ឋមន្ត្រី ហ៊ុន សែន បានព្រមានថា ប្រសិនបើផ្សារដោះដូរទំនិញកម្ពុជា-វៀតណាម និងជាផ្សារគំរូបរាជ័យ នោះអភិបាលខេត្តត្បូងឃ្មុំនឹងត្រូវដកចេញ ។ សម្តេចតេជោបានព្រមានបែបនេះ ក្នុងពិធីសម្ពោធដាក់ឲ្យដំណើរផ្សារគំរូដោះដូរទំនិញរវាងកម្ពុជានិងវៀតណាម នៅព្រំដែនកម្ពុជា-វៀតណាម ខេត្តត្បូងឃ្មុំ នាព្រឹកថ្ងៃទី២៤ ធ្នូ ។ សម្តេចបញ្ជាក់ថា បើផ្សារគំរូនេះបរាជ័យ នោះការបង្កើតផ្សារផ្សេងក៏បរាជ័យដែរ ដូច្នេះអភិបាលខេត្ត ត្រូវតែគិតគូររឿងនេះ បើមិនដូច្នេះទេនឹងដកចេញពីតំណែង ។
សម្តេចតេជោមានប្រសាសន៍ថា ៖ «ផ្សារនេះជាផ្សារគំរូ បើផ្សារនេះបរាជ័យ ផ្សារដែលយើងគ្រោងបង្កើតទៀតក៏គ្មានវឌ្ឍនភាពទេ ។ អុីចឹងអភិបាលខេត្តនៅកន្លែងនេះត្រូវមើលផ្សារនេះ ។បើផ្សារនេះបរាជ័យ លោកឯងក៏មិនអាចឈរជើងនៅកន្លែងនេះទេ ខ្ញុំដកចោល ។ យើងនិយាយគ្នាឲ្យច្បាស់» ។សម្តេចតេជោបានព្រមានថា តិចលោពេលប្រជាពលរដ្ឋនាំទំនិញចេញយកលុយប៉ុណ្ណេះ នាំចូលយកលុយប៉ុណ្ណោះ រឿងនេះត្រូវនិយាយឲ្យហើយ ។ រឿងនេះជាប្រតិភូកម្ម បើមិនអាចគ្រប់គ្រងបានគឺចប់ហើយ មិនចាំបាច់មកគ្រប់គ្រងខេត្តនេះទៀតទេ ។
សម្តេចតេជោបន្តថា រាជរដ្ឋាភិបាលបានខិតខំប្រែក្លាយតំបន់អតីតសមរភូមិទាំងអស់ឲ្យទៅជាតំបន់ទីផ្សារ និងប្រែក្លាយតំបន់ព្រំដែនទាំងអស់ទៅជាព្រំដែនសន្តិភាព សហប្រតិបត្តិការ និងការអភិវឌ្ឍ ។ ជាកស្តែងជាង៤០ឆ្នាំមុន និង៤០ឆ្នាំក្រោយ យើងឃើញមានការអភិវឌ្ឍយ៉ាងណា ។ ជាមួយគ្នានេះ សម្តេចតេជោបានលើកឡើងថា រដ្ឋាភិបាលវៀតណាមព្រមព្រៀងជាផ្លូវការទិញស្រូវពីកម្ពុជា៣០ម៉ឺនតោន ។ ដូច្នេះ សូមក្រសួងពាណិជ្ជកម្មនៃប្រទេសទាំងពីរធ្វើការគ្រប់គ្រងឲ្យបានទាំងសងខាង ព្រោះថានៅកន្លែងនេះ ជាកន្លែងលក់ដូរមួយ ដែលមានសណ្តាប់ធ្នាប់និងត្រូតពិនិត្យបាន ។
សម្តេចតេជោបញ្ជាក់ថា ការត្រួតពិនិត្យមិនមែនជាឧបសគ្គរារាំងដល់ការដោះដូរធ្វើពាណិជ្ជកម្មរបស់ប្រជាជនទេ ។ មន្ត្រីគយ និងមន្ត្រីអន្តោប្រវេសន៍ មិនត្រូវធ្វើការរំខានណាមួយដល់ប្រជាជនរកស៊ីនៅតំបន់ផ្សារគំរូនេះទេ ។ ប្រសិនបើមានការរំខានណាមួយនៅតំបន់នេះ ប្រជាពលរដ្ឋនឹងបង្កើតច្រករបៀបរកស៊ីដោយខ្លួនឯង ប៉ុន្តែកុំឲ្យធ្វើជាបញ្ហាគ្រប់គ្រងមិនបាន ។ បើគ្រប់គ្រងមិនបាន នឹងបើកដៃឲ្យឧក្រិដ្ឋជនធ្វើចរាចរណ៍គ្រឿងញៀន និងធ្វើឧក្រិដ្ឋកម្មផ្សេងៗទៀតនៅតាមច្រកនេះ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ