អ្នកនាំពាក្យថា លោករដ្ឋមន្ត្រីអប់រំមិនបានហាមសិស្ស និយាយរឿងនយោបាយទេ
- ភ្នំពេញ
រាជធានីភ្នំពេញ ៖ អ្នកនាំពាក្យក្រសួងអប់រំយុវជន និងកីឡា លោក រស់ សុវាចា បានបញ្ជាក់ថា ក្នុងកិច្ ចប្រជុំជាមួយសមាជិកឧត្តម…
រាជធានីភ្នំពេញ ៖ អ្នកនាំពាក្យក្រសួងអប់រំយុវជន និងកីឡា លោក រស់ សុវាចា បានបញ្ជាក់ថា ក្នុងកិច្ ចប្រជុំជាមួយសមាជិកឧត្តម ក្រុមប្រឹក្សានិងពិគ្រោះយោបល់ លោករដ្ឋមន្ត្រីមិនបានហាមឃាត់សិស្ស
មិនឲ្យនិយាយពីបញ្ហានយោបាយនៅសាលារៀនទេ គឺគ្រាន់តែបញ្ជាក់ថាសាលាគឺជាកន្លែងអព្យាក្រឹត ។
លោក រស់ សុវាចា បានប្រាប់កោះសន្តិភាពនៅថ្ងៃទី២៤ ខែធ្នូ ឆ្នាំ២០១៩ថា ៖ «ខ្ញុំសូមបញ្ជាក់ថា ក្នុងកិច្ចប្រជុំនោះលោកបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា មិនបានហាមទេ ប៉ុន្តែលោកបានបញ្ជាក់អំពីអ្វីដែលក្រសួងធ្វើនេះ គឺយោងទៅតាមច្បាប់ស្តីពីការអប់រំដែលចែងថា គ្រឹះស្ថានសិក្សាជាកន្លែងអព្យាក្រឹត» ។
លោកបានបន្ថែមថា ចំណុចហាមនេះជាសំណួរ ចំណែកការបំភ្លឺរបស់លោករដ្ឋមន្ត្រីបានលើកឡើងថា មិនមែនជាការហាមទេ គឺជាការបញ្ជាក់ប្រាប់ថា អ្វីដែលធ្វើនោះគឺក្រសួងយោងទៅលើច្បាប់ស្តីពីការអប់រំដែលចែងថា គ្រឹះស្ថានសិក្សាជាកន្លែងអាព្យាក្រឹត ។
ការបញ្ជាក់របស់អ្នកនាំពាក្យក្រសួងអប់រំនេះគឺបន្ទាប់ពីលោក ពេជ្រ ស្រស់ ប្រធានគណបក្សយុវជនកម្ពុជា បានសរសេរលើបណ្តាញសង្គមកាលពីថ្ងៃទី២៣ ខែធ្នូកន្លងមកថា ក្នុងកិច្ចប្រជុំជាមួយសមាជិកឧត្តមក្រុមប្រឹក្សានិងពិគ្រោះយោបល់ លោករដ្ឋមន្ត្រីក្រសួងអប់រំបានបញ្ជាក់ថា «សិស្សមិនអាចជជែកគ្នាបានទេអំពីរឿងនយោបាយនៅក្នុងសាលារៀន ពីព្រោះច្បាប់បានហាមឃាត់ ហើយសាលារៀនគឺជាកន្លែងអព្យាក្រឹត ដូច្នេះបើចង់ឲ្យសិស្សជជែកគ្នាអំពីរឿងនយោបាយបាននៅក្នុងសាលារៀនគឺត្រូវធ្វើវិសោធនកម្មច្បាប់ហាមឃាត់នោះចោលជាមុនសិន» ។
បើតាមលោក ពេជ្រ ស្រស់ បានសរសេរលើបណ្តាញសង្គមកាលពីថ្ងៃទី២៣ ខែធ្នូកន្លងមក គឺលោកបានសួរទៅលោករដ្ឋមន្ត្រីក្រសួងអប់រំ ចំនួន៦សំណួរដូចជា ៖
១-សុំឲ្យសិស្សសាលាមានសិទ្ធិពេញលេញនៅក្នុងការជជែកគ្នាពីរឿងនយោបាយ នៅពេលម៉ោងសម្រាកក្នុងសាលារៀន ប្រសិនបើពួកគេចង់ជជែកគ្នា ។
២-កំណត់ស្ថានភាពជាក់ស្តែងក្នុងការរៀនគួរ និងគួរបញ្ឈប់ការរៀនគួរពីថ្នាក់បឋមដល់ថ្នាក់វិទ្យាល័យ ហើយងាកមកពង្រឹងគុណភាពនៃការបង្រៀនក្នុងម៉ោងរបស់រដ្ឋវិញ ពីព្រោះថា ការរៀនគួរខុសរបៀបបែបនេះ ធ្វើឲ្យមាតាបិតាសិស្សគ្មានលទ្ធភាពបញ្ជូនកូនឲ្យទៅរៀន ដោយហេតុកូនសិស្សត្រូវគ្រូបង្ខំឲ្យរៀនគួរតាមរយៈការដាក់ពិន្ទុទាប ឬធ្លាក់តែម្តង បើសិនជាកូនសិស្សនោះមិនរៀនគួរ កត្តានេះធ្វើឲ្យកូនសិស្សជំរិតទារប្រាក់ពីឪពុកម្តាយយកទៅរៀនគួរ ។
៣-បង្កើតនូវកម្មវិធីពិនិត្យទឹកនោមសិស្សនៅថ្នាក់អនុវិទ្យាល័យ និងវិទ្យាល័យ ដើម្បីស្វែងរកសារធាតុញៀនរៀងរាល់៣ខែម្តងសម្រាប់ជំហានដំបូង គឺដើម្បីបង្ការនិងទប់ស្កាត់សិស្សសេពគ្រឿងញៀន ។
៤-រឹតបន្តឹងការប្រឡងបញ្ចប់ថ្នាក់ទី៩ ដើម្បីពង្រឹងសមត្ថភាពសិស្សពីថ្នាក់អនុវិទ្យាល័យទៅ ក្នុងការធានានូវគុណភាពនៃការសិក្សារបស់សិស្ស និងបង្កើនគុណភាពធនធានមនុស្សនៅក្នុងប្រទេសកម្ពុជាយើងផងដែរ ។
៥-ពង្រឹងគុណភាពរបស់គ្រូបង្រៀននៅក្នុងម៉ោងបង្រៀនរដ្ឋ ដើម្បីលុបបំបាត់ការបង្រៀនសិស្សក្រៅម៉ោងយកលុយខុសរបៀប ជាហេតុធ្វើឲ្យឪពុកម្តាយរបស់សិស្សកាន់តែក្រីក្រទៅៗ នាំឲ្យពួកគាត់បញ្ឈប់កូនមិនឲ្យទៅរៀនបន្តទៀត ។
៦-ខ្ញុំស្នើសុំរដ្ឋមន្ត្រីក្រសួងអប់រំ ជួយដំឡើងប្រាក់ខែជូនដល់លោកគ្រូអ្នកគ្រូ យ៉ាងតិចគឺ២លានរៀលក្នុង១ខែ ដើម្បីលុបបំបាត់នូវការយកថវិកាពីកូនសិស្សមិនសមហេតុផល នៅបណ្តាសាលារៀនមួយចំនួន និងដើម្បីបង្កើននូវគុណភាពនៃការបង្រៀនរបស់លោកគ្រូអ្នកគ្រូ ព្រមទាំងមានហេតុផលដាក់ទណ្ឌកម្មទៅ
លើលោកគ្រូអ្នកគ្រូណាមួយ ដែលមិនខំយកចិត្តទុកដាក់ក្នុងការបង្រៀនសិស្សនៅក្នុងម៉ោងរដ្ឋ ៕
ចែករំលែកព័តមាននេះ