ខេត្តស្វាយរៀង ៖ នៅព្រឹកថ្ងៃទី២៤ ខែធ្នូ ឆ្នាំ២០១៩ មានករណីឆ្លងចរន្តអគ្គិសនីពីទូទឹកកកបង្កជាអគ្គិភ័យឆាបឆេះក្នុងផ្ទះសំណាក់ បណ្តាលឲ្យរងការខូចខាតសម្ភារមួយចំនួននៅផ្ទះសំណាក់ដែលមានយីហោម៉ាឡៃ មានកម្ពស់៤ជាន់ ស្ថិតក្នុងភូមិបាវិតកណ្តាល សង្កាត់បាវិត…
ខេត្តស្វាយរៀង ៖ នៅព្រឹកថ្ងៃទី២៤ ខែធ្នូ ឆ្នាំ២០១៩ មានករណីឆ្លងចរន្តអគ្គិសនីពីទូទឹកកកបង្កជាអគ្គិភ័យឆាបឆេះក្នុងផ្ទះសំណាក់ បណ្តាលឲ្យរងការខូចខាតសម្ភារមួយចំនួននៅផ្ទះសំណាក់ដែលមានយីហោម៉ាឡៃ មានកម្ពស់៤ជាន់ ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។
ផ្ទះសំណាក់កើតហេតុខាងលើមានម្ចាស់ឈ្មោះលូ ឈិនអៀន ភេទស្រី អាយុ៤២ឆ្នាំ ជាជនជាតិម៉ាឡេស៊ី ។
បើតាមសមត្ថកិច្ចនគបាលក្រុងបាវិតបានអោយដឹងថា ករណីអគ្គិភ័យបានឆាបឆេះផ្ទះសំណាក់ខាងលើ បណ្តាលឲ្យខូចខាតទ្រព្យសម្បត្តិ និងសម្ភារៈក្នុងផ្ទះសំណាក់មួយចំនួន ប៉ុន្តែមិនបណ្តាលឲ្យមានមនុស្សណាម្នាក់រងរបួសនោះទេ។
តាមប្រភពដដែលបានបន្តទៀតថា ក្នុងករណីអគ្គិភ័យឆាបឆេះនោះដែរ កម្លាំងអធិការរដ្ឋាននគរបាលក្រុងបាវិតនិងកម្លាំងប៉ុស្តិ៍នគរបាលរដ្ឋបាលសង្កាត់បាវិត សហការជាមួយកម្លាំងកងរាជអាវុធហត្ថក្រុងបាវិត ដឹកនាំដោយលោកវណ្ណ សុមុន្នី អភិបាលរងនៃគណ:អភិបាលក្រុងបាវិត បានចុះជួយពន្លត់បានទាន់ពេលវេលា។
សមត្ថកិច្ចបានប្រើប្រាស់រថយន្តពន្លត់អគ្គិភ័យចំនួន៣គ្រឿងប្រើប្រាស់ទឹកអស់៣រថយន្ត ។ ចំណែកមូលហេតុនាំឲ្យមានការឆាបឆេះនេះគឺបណ្តាលមកពីឆ្លងចរន្តអគ្គិសនីពីទូទឹកកក ទើបបង្កជាអគ្គិភ័យឆាបឆេះឡើង៕ (កែសម្រួលដោយ ៖ ធីតា)
ចែករំលែកព័តមាននេះ