ប្រទេសរុស្ស៊ី ៖ ប្រទេសរុស្ស៊ីនាថ្ងៃទី២៣ ខែធ្នូ ឆ្នាំ២០១៩ ត្រូវវាយតម្លៃ លើការសាកល្បងបណ្ដាឧបករណ៍ដែលអាចការពារប្រព័ន្ធអ៊ីនធើរណេតរបស់ខ្លួន ពីបណ្ដាប្រព័ន្ធអ៊ីនធើរណេតពិភពលោក ហើយធានាកិច្ចដំណើរការនៃប្រព័ន្ធអ៊ីនធើរណេតរបស់ខ្លួន ក៏ទោះក្នុងករណីមានសង្គ្រាមព័ត៌មានវិទ្យាលើពិភពលោក។
ការសាកល្បងឧបករណ៍ទាំងនេះ ធ្វើឡើងក្នុងក្របខណ្ឌនៃច្បាប់ដ៏ចម្រូងចម្រាស់មួយ ដែលចូលជាធរមានកាលពីដើមខែវិច្ឆិកា ដោយមនុស្សមួយចំនួនមានការភ័យខ្លាចថា យកឧបករណ៍ទាំងនោះ ប្រើប្រាស់ក្នុងគោលដៅត្រួតពិនិត្យ។ នោះជាការសាកល្បងដែលធ្វើក្នុងបណ្ដាតំបន់ពិសេស លើបណ្ដាយន្តការនៃប្រតិកម្មដែលគំរាមកំហែងដល់កិច្ចដំណើរការប្រកបដោយស្ថេរភាពនិងសន្តិសុខអ៊ីនធើរណេតនៅរុស្ស៊ី។ នេះបើតាមការអះអាងរបស់ក្រសួងគមនាគមន៍រុស្ស៊ី។
ទួរទស្សន៍រដ្ឋរុស្ស៊ី ROSSIYA24 ដែលដកស្រង់សម្ដីអនុរដ្ឋមន្ត្រីគមនាគមន៍លោកអាឡិចសីសូកូឡូវរៀបរាប់ថា ការសាកល្បងធ្វើរួចហើយក្នុងកម្រិតផ្សេងៗ ចាប់តាំងពីជិត២សប្ដាហ៍មកហើយ។
គោលបំណងគឺធានាដល់ស្ថេរភាពនៃកិច្ចដំណើរការអ៊ីនធើរណេតក្នុងដែនដីរុស្ស៊ី ក្នុងគ្រប់កាលៈទេសៈ យោងតាមវិមានក្រឹមឡាំងថា ច្បាប់នេះមានគោលដៅការពារផ្នែករុស្ស៊ី ប្រព័ន្ធអ៊ីនធើរណេតក្នុងករណីមានការដាច់ការទាក់ទងជាមួយបណ្ដាប្រព័ន្ធអ៊ីនធើរណេតពិភពលោក ស្ថិតនៅអឺរ៉ុបនិងសហរដ្ឋអាមេរិក។
គោលបំណងពិសេសធ្វើយ៉ាងណាឲ្យបណ្ដាសេវាកម្មរដ្ឋនិងបណ្ដាធនាគាររុស្ស៊ីអាចនៅតែដំណើរការបាន ក្នុងករណីមានសង្គ្រាមឬការវាយប្រហារប្រព័ន្ធព័ត៌មានវិទ្យាដោយទ្រង់ទ្រាយធំ៕ (កែសម្រួលដោយ ៖ បុប្ផា)
ចែករំលែកព័តមាននេះ