ខេត្តបន្ទាយមានជ័យ ៖ ផ្លូវចាក់កៅស៊ូប្រវែង៩០០០ម៉ែត្រជាអំណោយប្រទេសកូរ៉េតាមរយៈក្រសួងអភិវឌ្ឍន៍ជនបទរងការខូចខាតជិត១០កន្លែងក្រោយធ្វើកសាងមិនទាន់បាន១ឆ្នាំផងដែលតភ្ជាប់ពីឃុំបត់ត្រង់ទៅឃុំរហាត់ទឹក ស្រុកមង្គលបូរី ។
ប្រជាពលរដ្ឋដែលធ្វើដំណើរឆ្លងកាត់បានរិះគន់ថា ផ្លូវកៅស៊ូដែលកសាងមិនទាន់បាន១ឆ្នាំផងត្រូវបានខូចខាតប្រមាណជិត១០កន្លែងដែលស្ថិតតាមបណ្តោយផ្លូវក្នុងឃុំមាន៧កន្លែងដែលខូចខាតមានកន្លែងខ្លះខូចជិត២ម៉ែត្រ និងឃុំបត់ត្រង់ មានប្រមាណ៣កន្លែងដែលខូចខាតកន្លែងខ្លះជិត១ម៉ែត្រ ។
ប្រជាពលរដ្ឋបានបញ្ជាក់ថា អ្នកដែលធ្វើដំណើរពេលយប់ប្រយ័ត្នប្រយ៉ែងផងធ្លាក់ជង្ហុកគ្រោះថ្នាក់ ហើយឃើញកន្លែងខូចធំក្នុងឃុំរហាត់ទឹក១កន្លែងដែលខូចជិត២ម៉ែត្រឃើញប្រជាពលរដ្ឋយកថង់ចងជាសញ្ញាឱ្យអ្នកដំណើរឃើញការពារគ្រោះថ្នាក់កើតឡើង ។
ប្រជាពលរដ្ឋសំណូមពរសុំឱ្យមន្ត្រីស្ថាប័នជំនាញធ្វើការជួសជុលផ្លូវដែលខូចឱ្យល្អឡើងវិញផងការពារអ្នកដំណើរជិះធ្លាក់ជង្ហុកគ្រោះថ្នាក់កើតឡើង ហើយសុំឱ្យធ្វើផ្លូវឱ្យមានគុណភាពផង កុំធ្វើយកតែបរិមាណត្រូវធ្វើផ្លូវឱ្យមានគុណភាពទើបប្រសើរ ។
លោក ជា យុទ្ធារុណ ប្រធានមន្ទីអភិវឌ្ឍន៍ជនបទខេត្តបន្ទាយមានជ័យបានប្រាប់នៅថ្ងៃទី២៣ ខែធ្នូ ឆ្នាំ២០១៩ ថាផ្លូវចាក់កៅស៊ូប្រវែង៩គីឡូម៉ែត្រស្របតាមមាត់ស្ទឹងខាងកើតឆ្លងកាត់ឃុំបត់ត្រង់ តភ្ជាប់ទៅឃុំរហាត់ទឹកគឺជំនួយប្រទេសកូរ៉េតាមរយៈក្រសួងអភិវឌ្ឍន៍ជនបទដែលកសាងរួចរាល់នៅឆ្នាំ២០១៨កន្លង ។
លោកបានបញ្ជាក់ថា ផ្លូវចាក់កៅស៊ូនេះសុពលភាពថែទាំរយៈពេល១ឆ្នាំនៅរយៈពេល៦ខែទៀតទើបធ្វើការថែទាំងជួសជុលឡើងវិញកន្លែងដែលខូច ហើយជាក់ស្តែងពេលនេះកំពុងធ្វើការជួសជុល និងថែទាំងជាបណ្តើរហើយ ៕
កែសម្រួលដោយ ៖ សំណាង
ចែករំលែកព័តមាននេះ