ខេត្តកំពង់ចាម ៖ អាជ្ញាធរខេត្តបានស្នើដល់លោកអធិការនគរបាលស្រុក-ក្រុងចំនួន១០ ត្រូវទៅយកចិត្តទុកដាក់ក្នុងការបង្ក្រាបល្បែងស៊ីសងរួមមានបញ្ជល់មាន់ និងឆ្នោតវៀតណាមត្រូវតែនាំគ្នាទប់ស្កាត់ ។ នេះជាការថ្លែងរបស់លោក អ៊ុន ចាន់ដា អភិបាលនៃគណៈអភិបាលខេត្តនាព្រឹកថ្ងៃទី២៣…
ខេត្តកំពង់ចាម ៖ អាជ្ញាធរខេត្តបានស្នើដល់លោកអធិការនគរបាលស្រុក-ក្រុងចំនួន១០ ត្រូវទៅយកចិត្តទុកដាក់ក្នុងការបង្ក្រាបល្បែងស៊ីសងរួមមានបញ្ជល់មាន់ និងឆ្នោតវៀតណាមត្រូវតែនាំគ្នាទប់ស្កាត់ ។ នេះជាការថ្លែងរបស់លោក អ៊ុន ចាន់ដា អភិបាលនៃគណៈអភិបាលខេត្តនាព្រឹកថ្ងៃទី២៣ ខែធ្នូ ឆ្នាំ២០១៩ នៅក្នុងទិវាជាតិប្រយុទ្ធប្រឆាំងអំពើជួញដូរមនុស្សលើកទី១៣ ដែលធ្វើឡើងនៅក្នុងបរិវេណសាលា ស្រុកចំការលើ មានការចូលរួមពីសិស្សានុសិស្ស ប្រជាពលរដ្ឋមន្ត្រីរាជការ ប្រធានមន្ទីរជុំវិញខេត្តប្រមាណជាង ១០០០នាក់ ។
លោក អ៊ុន ចាន់ដា អភិបាលខេត្តមានប្រសាសន៍ដោយគូសបញ្ជាក់ថា ដោយមានការណែនាំពីលោកស្នងការនគរបាលខេត្ត លោកអធិការនគរបាលស្រុកស្ទឹងត្រង់នៅថ្ងៃទី២២ ខែធ្នូ ឆ្នាំ២០១៩ បានបង្ក្រាបសង្វៀនបញ្ជល់មាន់១កន្លែង និងនៅស្រុកចំការលើក៏បង្ក្រាបបានសង្វៀនបញ្ជល់មាន់មួយកន្លែងដែរ ។ ប៉ុន្តែក្រុមអ្នកលេងមាន់បាននាំគ្នារត់ប្រសាចគេចខ្លួនបាត់អស់ ។
លោកអភិបាលខេត្តមានប្រសាសន៍បន្តថា ជាមួយនោះសូមឱ្យម្ចាស់ដីចំការឧស្សាហ៍ទៅពិនិត្យមើលដីរបស់ខ្លួនក្រែងមានគេលួចបើកលេងបញ្ជល់មាន់នៅក្នុងដីចំការ ហើយប្រសិនណាបើកម្លាំងសមត្ថកិច្ចចុះមកបង្ក្រាបល្បែងស៊ីសងដឹងថា ដីរបស់អ្នកណាម្នាក់នឹងត្រូវកោះហៅមកសួរនាំធ្វើការអប់រំ ។ ប្រសិនបើមានបើកលេងល្បែងបញ្ជល់មាន់ខុសច្បាប់ជាលើកទី២ទៀតនោះសមត្ថកិច្ចនឹងមានវិធានការក្តៅអាចនឹងត្រូវចាប់ខ្លួនម្ចាស់ដីបញ្ជូនទៅកាន់សាលាដំបូងខេត្តចាត់វិធានការតាមច្បាប់ ។
ជាមួយនោះសូមឱ្យប្រជាពលរដ្ឋគ្រប់ស្រទាប់វណ្ណៈត្រូវតែចេះរាយការណ៍ទៅកាន់កម្លាំងសមត្ថកិច្ចប្រសិនបើឃើញមានជនណាធ្វើសកម្មភាពជួញដូរគ្រឿងញៀននៅក្នុងភូមិឋានរួមនឹងបទល្មើសផ្សេងៗទៀត គឺត្រូវរាយការណ៍ទៅមេភូមិ ឬមេប៉ុស្តិ៍ដែលនៅកៀកបំផុតដើម្បីមានវិធានការអន្តរាគមន៍ចុះបង្ក្រាបជាបន្ទាន់ ៕
កែសម្រួលដោយ ៖ សំណាង
ចែករំលែកព័តមាននេះ