រាជធានីភ្នំពេញ ៖ បុរសជនជាតិខ្មែរសញ្ជាតិអាមេរិកកាំងម្នាក់សង្ស័យគាំងបេះដូងបណ្តាលឱ្យបាត់បង់ជីវិតដោយសារតែប្រើប្រាស់សារធាតុញៀន បន្ទាប់ពីធ្វើដំណើរមកពីនាយសមុទ្រ ដើម្បីមករៀបចំសំណុំបែបបទនាំប្រពន្ធទៅរស់នៅប្រទេសអាមេរិក។
ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោងប្រមាណ៦ព្រឹកថ្ងៃទី២៣ ខែធ្នូ ឆ្នាំ២០១៩ នៅចំណុចផ្ទះប្អូនស្រីខាងប្រពន្ធ ស្ថិតនៅផ្ទះលេខT២១ ផ្លូវបេតុង ភូមិដំណាក់ សង្កាត់គោកឃ្លាង ខណ្ឌសែនសុខ ។
ជនរងគ្រោះឈ្មោះខាន់ សាវិន ភេទប្រុស អាយុ៣៩ឆ្នាំ ជាកូនខ្មែរកើតនៅជំរុំប្រទេសថៃ សញ្ជាតិអាមេរិកាំង មានប្រពន្ធឈ្មោះឯក ប៊ុនមករា អាយុ៣៤ឆ្នាំ ស្នាក់នៅតាមផ្លូវលេខ ១៩២ សង្កាត់ទឹកល្អក់ទី៣ ខណ្ឌទួលគោក។
តាមប្រភពព័ត៌មានបានឱ្យដឹងថា បុរសរងគ្រោះជាកូនខ្មែរកើតនៅជំរុំនៅប្រទេសថៃ ហើយ បានទៅរស់នៅប្រទេសអាមេរិក ។ នៅកំឡុងឆ្នាំ២០១៨ ក៏បានរៀបការប្រពន្ធជាជនជាតិខ្មែរនៅក្នុងសង្កាត់ទឹកល្អក់ទី៣ រួចជនរងគ្រោះក៏បានវិលទៅប្រទេសអាមេរិកវិញ។
តាមព័ត៌មានអោយដឹងទៀត ប្រមាណ១សប្តាហ៍ក្រោយមកហើយ បុរសរងគ្រោះក៏បានវិលត្រឡប់មកប្រទេសកម្ពុជា ដើម្បី រៀបចំនាំប្រពន្ធទៅរស់នៅអាមេរិក ហើយក៍បានទៅស្នាក់នៅផ្ទះប្អូនស្រីខាងប្រពន្ធជាកន្លែងកើតហេតុខាងលើ។
តាមប្រភពពីក្រុមគ្រួសារបានអោយដឹងថា នៅវេលាម៉ោងរសៀលថ្ងៃទី២២ ខែធ្នូ បុរសរងគ្រោះបានជួបជុំបងប្អូន មិត្តភក្កិ ដែលក្នុងនោះក៏មានមន្ត្រីនគរបាលផងដែរ ។ លុះនៅវេលាយប់ ពេលបងប្អូនចាកចេញអស់ទៅ ស្រាប់តែព្រឹកឡើង ពេលប្រពន្ធបានដាស់អោយក្រោក ទើបដឹងថា ជនរងគ្រោះបាត់បង់ជីវិតបាត់ទៅហើយ។
នៅព្រឹកថ្ងៃកើតហេតុនេះ នគរបាលជំនាញក៏បានចុះទៅពិនិត្យជនរងគ្រោះ រកឃើញមានថ្នាំជាច្រើនដែលជនរងគ្រោះប្រើប្រាស់។ តាមការពិនិត្យរបស់គ្រូពេទ្យតុលាការនិងនគរបាលជំនាញក៏បានបញ្ជាក់ថា ជនរងគ្រោះបាត់បង់ជីវិតដោយសារតែគាំងបេះដូងប្រើប្រាស់សារធាតុញៀន។
ជនរងគ្រោះដែលបាត់បង់ជីវិតត្រូវក្រុមគ្រួសារបញ្ជូនទៅតម្កល់ទុកនៅឈាបនដ្ឋានវត្តស្ទឹងមានជ័យ ៕ (កែសម្រួលដោយ ៖ ធីតា)
ចែករំលែកព័តមាននេះ