រាជធានីភ្នំពេញ ៖ លោកអ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានបញ្ជាក់ថា រាជរដ្ឋាភិបាលនឹងបន្តបង្កើនធ្វើកិច្ចសហប្រតិបត្តិការយ៉ាងជិតស្និតជាមួយវិស័យឯកជន តាមរយៈការអនុវត្តយន្តការត្រីភាគី និងកិច្ចសន្ទនាសង្គមក្នុងការប្រកួតប្រជែងលើទីផ្សារ អន្តរជាតិ…
រាជធានីភ្នំពេញ ៖ លោកអ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានបញ្ជាក់ថា រាជរដ្ឋាភិបាលនឹងបន្តបង្កើនធ្វើកិច្ចសហប្រតិបត្តិការយ៉ាងជិតស្និតជាមួយវិស័យឯកជន តាមរយៈការអនុវត្តយន្តការត្រីភាគី និងកិច្ចសន្ទនាសង្គមក្នុងការប្រកួតប្រជែងលើទីផ្សារ អន្តរជាតិ ។
លោកអ៊ិត សំហេង បានថ្លែងក្នុងពិធីបើកវេទិកាសំណេះសំណាលប្រចាំឆ្នាំរវាងតំណាងរាជរដ្ឋាភិបាល និងវិស័យឯកជនក្រោមប្រធានបទ «វឌ្ឍនភាពនៃការអនុវត្តកាតព្វកិច្ចច្បាប់ស្តីពីការងារ និងច្បាប់ស្តីពីរបបសន្តិសុខសង្គម » នាព្រឹកថ្ងៃទី២៣ ខែធ្នូនេះ នៅសណ្ឋាគារកាំបូឌីយ៉ាណា ថាការសម្រេចបាននូវលទ្ធផលជាទីមោទនៈនានារហូតមកដល់ថ្ងៃនេះ គឺបានបង្ហាញយ៉ាងច្បាស់ពីស្មារតីទទួលខុសត្រូវកិច្ចខិតខំប្រឹងប្រែង និងការប្តេជ្ញាចិត្តរបស់យើងក្នុងការជំរុញវិស័យការងារ និងបណ្តុះបណ្តាលវិជ្ជាជីវៈ និងការលើកកម្ពស់ភាពជាដៃគូរវាងរដ្ឋ-ឯកជន ប្រកបដោយប្រសិទ្ធភាព និងប្រសិទ្ធផលខ្ពស់ក្នុងគោលដៅរួមចំណែកបង្កើនល្បឿនដល់ការអភិវឌ្ឍសង្គម-សេដ្ឋកិច្ច ប្រកបដោយចីរភាព ។
លោកបានបញ្ជាក់ថា ៖ « ការបង្កើនកិច្ចសហប្រតិបត្តិការយ៉ាងជិតស្និតតាមរយៈការអនុវត្តយន្តការត្រីភាគី និងកិច្ចសន្ទនាសង្គមដែលយើងបានអនុវត្តប្រកបដោយប្រសិទ្ធភាពដែលជាមូលដ្ឋានគ្រឹះនៅក្នុងការធានាបាននូវភាពសុខដុមផ្នែកទំនាក់ទំនងវិជ្ជាជីវៈដែលធ្វើឱ្យមានការថយចុះនូវវិវាទការងារបានប្រសើរជាងមុនច្រើន» ។ លោកបន្ថែមថា ការបន្តចូលរួមអនុវត្តយ៉ាងសកម្មក្នុងការគាំទ្រដល់កម្មវិធីកំណែទម្រង់របស់រាជរដ្ឋាភិបាលយុទ្ធសាស្ត្រចតុកោណ គោលនយោបាយនានាដូចជា គោលនយោបាយជាតិស្តីពីមុខរបរ និងការងារគោលនយោបាយជាតិស្តីពីអប់រំបណ្តុះបណ្តាល បច្ចេកទេស និងវិជ្ជាជីវៈ គោលនយោបាយជាតិអភិវឌ្ឍវិស័យឧស្សាហកម្ម និងក្របខណ្ឌគោលនយោបាយជាតិគាំពារសង្គម ។
ទន្ទឹមនឹងនេះការចូលរួមអនុវត្តប្រកបដោយស្មារតីទទួលខុសត្រូវនូវកាតព្វកិច្ចនានាដែលបានចែងក្នុងច្បាប់ស្តីពីការងារច្បាប់ស្តីពីសហជីព ច្បាប់ស្តីពីរបបសន្តិសុខសង្គម ច្បាប់ស្តីពីប្រាក់ឈ្នួលអប្បបរមា រួមទាំងបទដ្ឋានគតិយុត្តិនានាពាក់ព័ន្ធនឹងវិស័យការងារផងដែរ ។ ជាមួយគ្នានោះដែរ លោកករដ្ឋមន្ត្រីក៏បានលើកឡើងថា សមាគមសហព័ន្ធនិយោជកកម្ពុជា (CAFEBA) ក៏ជាដៃគូរដ៏សំខាន់ផងដែរ ដែលបានចូលរួមធ្វើឱ្យក្រសួងអាចសម្រេចបានដោយជោគជ័យ នូវការអនុវត្តផែនការយុទ្ធសាស្ត្រអភិវឌ្ឍន៍ វិស័យការងារ និងបណ្តុះបណ្តាលវិជ្ជាជីវៈព្រមទាំងកម្មវិធីការងារសមរម្យសម្រាប់ប្រទេសកម្ពុជា និងគម្រោងនានាផងដែរ ។ លោកបានសង្កត់ធ្ងន់ថា ក្រសួងការងារ និងបណ្តុះបណ្តាលវិជ្ជាជីវៈបានត្រៀមខ្លួនរួចជាស្រេចក្នុងការបន្តកិច្ចសហការជាមួយ CAFEBA សំដៅលើកកម្ពស់ភាពប្រកួតប្រជែងកម្ពុជានៅលើឆាកអន្តរជាតិ ដើម្បីរួមចំណែកជាមួយរាជរដ្ឋាភិបាលក្នុងការសម្រេចឱ្យបាននូវចក្ខុវិស័យកម្ពុជាឆ្នាំ២០៣០ ដែលជាប្រទេសមានចំណូលមធ្យមកម្រិតខ្ពស់ និងឆ្នាំ២០៥០ ជាប្រទេសមានចំណូលខ្ពស់ ។
លោកបានគូសបញ្ជាក់ទៀតថា ស្ថិតក្នុងបរិបទដែលវិស័យឯកជនកាន់តែប្រឈមកាន់តែខ្លាំងទៅនឹងលទ្ធភាពប្រកួតប្រជែងជាមួយប្រទេសនាំចេញនានាយើងបានធ្វើការយ៉ាងជិតស្និតជាមួយគ្នាស្វែងរកដំណោះស្រាយរួមគ្នា ដើម្បីធានាថា វិស័យឯកជននៅតែអាចបន្តធានាបាននូវឧត្តមភាពប្រកួតប្រជែងសមាជិកទាំងអស់របស់ CAFEBA អាចរក្សាបានដំណើរផលិតកម្ម អាជីវកម្មរបស់ខ្លួនប្រកបដោយចីរភាព ។
បើតាមលោករដ្ឋមន្ត្រីក្រសួងការងារបានអះអាងថា បច្ចុប្បន្នក្រសួងការងារ និងបណ្តុះបណ្តាលវិជ្ជាជីវៈបាននឹងកំពុងខិតខំជំរុញ ការអនុវត្តផែនការយុទ្ធសាស្ត្រអភិវឌ្ឍន៍វិស័យការងារ និង បណ្តុះបណ្តាលវិជ្ជាជីវៈឆ្នាំ២០១៩-២០២៣ សំដៅឆ្លើយតបទៅនឹងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលបន្តជំរុញការអភិវឌ្ឍរីកចម្រើនដែលផ្តល់ផលប្រយោជន៍កាន់តែច្រើនដល់ប្រជាពលរដ្ឋតាមរយៈការបង្កើតការងារថ្មីៗដែលមានគុណភាពកាន់តែល្អ ការពង្រីកកិច្ចគាំពារសង្គមកាន់តែទូលំទូលាយ និងការអភិវឌ្ឍជំនាញ និងសមត្ថភាពកាន់តែខ្ពស់ឡើង ៕
ចែករំលែកព័តមាននេះ