ខេត្តកណ្តាល ៖ ដីបឹងធំបឹងតូចសាធារណៈរបស់រដ្ឋរាប់ពាន់ហិកតា នៅក្នុងស្រុកកៀនស្វាយ ខេត្តកណ្តាល ត្រូវអ្នកមានលុយមានអំណាច បោះបង្គោលថ្មរំលោភបំពាន វាតយកធ្វើជាកម្មសិទ្ធិឯកជនយ៉ាងអនាធិបតេយ្យស្ទើរអស់ទៅហើយ ។ ប្រភពព័ត៌មានបានឱ្យដឹងថា…
ខេត្តកណ្តាល ៖ ដីបឹងធំបឹងតូចសាធារណៈរបស់រដ្ឋរាប់ពាន់ហិកតា នៅក្នុងស្រុកកៀនស្វាយ ខេត្តកណ្តាល ត្រូវអ្នកមានលុយមានអំណាច បោះបង្គោលថ្មរំលោភបំពាន វាតយកធ្វើជាកម្មសិទ្ធិឯកជនយ៉ាងអនាធិបតេយ្យស្ទើរអស់ទៅហើយ ។
ប្រភពព័ត៌មានបានឱ្យដឹងថា បឹងធំបឹងតូចនេះគឺជាបឹងធម្មជាតិ កើតមានតាំងពីដូនតាមកម្លេ៉ះ។ បឹងនេះមានសារសំខាន់ សម្រាប់ប្រជាជន នៃឃុំចំនួន៤រស់នៅជុំវិញមាត់បឹងក្នុងស្រុកកៀនស្វាយ គឺឃុំឈើទាល ឃុំភូមិធំ ឃុំគគីរ និងឃុំដីឥដ្ធ ដែលជាតម្រូវការចាំបាច់យកទឹកបឹងនេះប្រើប្រាស់ដូចជា៖ មុជដាំស្ល និងស្រោចស្រពផលដំណាំផ្សេងៗ ពិសេសគឺជាបឹងធម្មជាតិដែលប្រជាជន តែងតែប្រកបមុខរបរនេសាទត្រី ដកព្រលិត ដកក្រអៅឈូក រកខ្យងខ្ចៅជាលក្ខណៈគ្រួសារគ្រាន់បានចិញ្ចឹមជីវិតតាំងពីដើមមក ។
មិនតែប៉ុណ្ណោះបឹងនេះគឺជាអាងស្តុកទឹកដ៏ធំ ហើយក៏ជាប្រព័ន្ធរំដោះទឹកជំនន់ នារដូវទឹកដំឡើង ទៅតាមបឹងនានានៃស្រុកស្អាង ស្រុកកោះធំ ស្រុកលើកដែក ហូរធ្លាក់ចេញទៅវៀតណាមផងដែរ ។ ស្រាប់តែឥឡូវបែរជាអ្នកមានលុយមានអំណាច មកបោះបង្គោលថ្មរំលោភបំពានវាតយកដីបឹងសាធារណៈរបស់រដ្ឋធ្វើជាកម្មសិទ្ធិឯកជនយ៉ាងគឃ្លើនអត់មានលាក់លៀមទេ ដោយខ្លះកំពុងប្រើប្រាស់គ្រឿងចក្រ ជីកកាយចាក់ដីលុបក្លាយជាដីរាបបណ្តើរៗហើយ ដូចជាពុំឃើញមានអាជ្ញាធរឬមន្ត្រីជំនាញស្ថាប័នណាមួយ ចុះមកទប់ស្កាត់បង្ក្រាបឡើយ ។
សកម្មភាពអនាធិបតេយ្យនេះធ្វើឱ្យមហាជនជាច្រើនមានការព្រួយបារម្ភខ្លាំង ខ្លាចទៅថ្ងៃក្រោយគេចាក់ដីលុបបឹងនេះអស់ ប្រជាជនប្រាកដជាជួបការលំបាកគ្មានទឹកប្រើប្រាស់ជាក់ជាមិនខានឡើយ ។ ណាមួយអាចប្រឈមនឹងការលិចលង់ផ្ទះសម្បែង និងផលដំណាំ នៅពេលរដូវទឹកដំឡើង។
តាមការកត់សម្គាល់ អ្នកដែលមកបោះបង្គោលថ្មព័ទ្ធយកដីបឹងខាងលើ និងសកម្មភាពដាក់គ្រឿងចក្រជីកឈូសឆាយភាគច្រើនសុទ្ធតែជាអ្នកមានឋានៈឧកញ៉ា ឯកឧត្តមអ្នកមានលុយមានអំណាចមកពីភ្នំពេញ។ ប្រសិនប្រជាជនធម្មតានោះ គឺមិនអាចទៅបោះបង្គោលព័ទ្ធយកដីសាធារណៈរបស់រដ្ឋបែបនេះបានឡើយ ព្រោះពួកគេស្គាល់ណាស់ថាបឹងសម្រាប់អាស្រ័យផល ។ បញ្ហានេះធ្វើឱ្យមហាជនដាក់ការសង្ស័យថា បើគ្មានការឃុបឃិតត្រូវរូវគ្នាជាប្រព័ន្ធនោះទេ ក៏មិនអាចមកយកដីរដ្ឋឆៅៗបែបនេះបានដែរ ។
ពាក់ព័ន្ធការរំលោភយកដីបឹងធំ-បឹងតូចសាធារណៈរបស់រដ្ឋនេះ កោះសន្តិភាពបានព្យាយាមទូរស័ព្ទ សុំការបំភ្លឺពីលោក អ៊ូ ឈាង អភិបាលស្រុកកៀនស្វាយដែរ តែលោកប្រាប់ថាជាប់រវល់ប្រជុំបក្សក៏ស្ងាត់ឈឹងទៅ ។
ចំណែកលោក កេត សុផល ប្រធានការិយាល័យភូមិបាល ស្រុកកៀនស្វាយ លោកក៏ទទួលស្គាល់ថាដីបឹងធំ-បឹងតូច គឺពិតជាបឹងអាងស្តុកទឹកនិងជាប្រព័ន្ធរំដោះទឹកសាធារណៈរបស់រដ្ឋប្រាកដមែន ហើយបុគ្គលដែលទៅបោះបង្គោលយកដីបឹងនោះ គឺគ្មានច្បាប់ទេ ។
ឥឡូវលោកកំពុងអោយក្រុមការងារសិក្សាវាស់វែង និងធ្វើរបាយការណ៍ដាក់ជូនលោកអភិបាលខេត្ត ដើម្បីចុះបញ្ជីរក្សាការពារជាដីរបស់រដ្ឋហើយ ។ ការរំលោភចាក់ដីឈូសឆាយបឹងដ៏មហាសាលបែបនេះ អ្នកធម្មតាមិនអាចថ្លើមពាសមេឃឡើយ។ មហាជនសង្ស័យខ្មោចស្រុកឱ្យដៃ ទើបខ្មោចមកពីចម្ងាយហ៊ានធ្វើបែបនេះ ។
បឹងរាប់ពាន់ហិកតាឈូសលុបចង់ជិតទៅហើយ នៅមិនទាន់មានប្រតិកម្មពីម្ចាស់ទឹកម្ចាស់ស្រុកបែបនេះ តើឱ្យមហាជនយល់ឃើញបែបណាទៅវិញ ? ឬមួយចាំគេចាក់លុបពេញសិន ?
សម្តេចតេជោស្នើឱ្យធ្វើការពិនិត្យរឿងចាក់ដីចូលសមុទ្រ
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានស្នើឲ្យលោក ជា សុផារ៉ា និងអភិបាលខេត្តកោះកុងចុះទៅពិនិត្យផ្ទាល់តំបន់ដែលចាក់ដីចូលក្នុងសមុទ្រនៅខេត្តកោះកុងដោយគ្មានការអនុញ្ញាត ។
សម្តេចតេជោបានលើកឡើងក្នុងពិធីបុណ្យសមុទ្រលើកទី៨ ជុំទី២នៅខេត្តកំពតកាលពីថ្ងៃទី២១ធ្នូឆ្នាំ២០១៩ថា យើងត្រូវតែខិតខំការពារឆ្មេរសមុទ្ររបស់យើងឲ្យបានគង់វង្ស កុំឲ្យឆ្លេរសមុទ្ររបស់យើងត្រូវបានបំផ្លាញការទម្លាក់ទឹកស្អុយចូលទៅក្នុងសមុទ្រ ការចាក់ដីបំពានទៅក្នុងសមុទ្រ ការកាប់ព្រៃកោងកាងចោលដើម្បីទន្ទ្រានយកដីឡើយ ។ ចំណុចទាំងអស់នេះគឺជាចំណុចដែលខេត្តនិមួយៗត្រូវធ្វើ ។
សម្តេចតេជោបានបញ្ជាក់ថា៖«គណៈអភិបាលខេត្តត្រូវមើលរឿងចាក់ដីកន្លែងណាហាមឃាត់ ។ខ្ញុំហាក់ដូច ជាឮដំណឹងថានៅខេត្តកោះកុង មានការចាក់ដីចូលទៅក្នុងមាត់សមុ ទ្រដោយគ្មានការអនុញ្ញាត ។ អុីចឹងស្នើឲ្យលោក ជា សុផារ៉ា និងអភិបាលខេត្តកោះកុងពិនិត្យជាបន្ទាន់ចំពោះការចាក់ដីចូលក្នុងសមុទ្រដោយគ្មានការអនុញ្ញាត» ។
សម្តេចក៏បានលើកឡើងថា ការចាត់ដីចូលក្នុងសមុទ្រនេះ មាននាយទាហានទៀតផង ដែលចូលរួមក្នុងសកម្មភាពនេះ ។ សម្តេចថ្លែងថា បើសិនជាមានករណីនេះពិតមែន សម្តេចមិនអនុញ្ញាតឲ្យមាន ឈ្មោះជានាយទាហានបន្តទៀតនោះទេ ។
សម្តេចបានគូសបញ្ជាក់យ៉ាងដូច្នេះថា៖ «បើទុកយ៉ាងដូច្នេះ ពួកគេនឹងក្លាយជាអ្នកកសាងរដ្ឋនៅក្នុងរដ្ឋហើយមិនអាចអនុញ្ញាតឲ្យមានទេ ។ ប៉ុន្តែយើងក៏អនុញ្ញាតឲ្យមាន ការលុបសមុទ្រ ក្នុងករណីចាំបាច់ និងការកសាងខ្លះ ដូចជា ធ្វើកំពង់ផែ ចាក់ថ្មដើម្បីរាំងទឹករលកនៅតំបន់កម្សាន្តខ្លះ ដោយមានការសិក្សា» ។
សម្តេចក៏បានលើកឡើងទៀតថា សុំកុំបំផ្លាញបេតិកភណ្ឌ កុំបំផ្លាញតំបន់ឆ្មេរ និងកុំបំផ្លាញព្រៃប្រឹក្សាដើម្បីយកមកបម្រើតម្រូវការក្នុងរយៈពេលខ្លី ។ ត្រូវរក្សាទុកនូវអ្វីដែលយើងមាន និងបំពេញបន្ថែមទៀតដោយការដាំដើមឈើបន្ថែម ដើម្បីទទួលបានផលក្នុងរយៈពេលវែង ៕
ចែករំលែកព័តមាននេះ