រាជធានីភ្នំពេញ ៖ តារាសម្តែងនាង ព្រីម លីហ្សា បានបញ្ជាក់មូលហេតុនៅពីក្រោយដែលនាងតែងតែបង្ហាញនូវម៉ូដសម្លៀកបំពាក់ម៉ាកល្បីៗ និងមានតម្លៃថ្លៃៗតាមបណ្តាញសង្គមហ្វេសប៊ុក និងអ៊ីនស្ត្រាក្រាមជាបន្តបន្ទាប់។ ក្នុងនាមជាអ្នកប្រឡូកក្នុងផ្នែកនេះ ព្រីម…
រាជធានីភ្នំពេញ ៖ តារាសម្តែងនាង ព្រីម លីហ្សា បានបញ្ជាក់មូលហេតុនៅពីក្រោយដែលនាងតែងតែបង្ហាញនូវម៉ូដសម្លៀកបំពាក់ម៉ាកល្បីៗ និងមានតម្លៃថ្លៃៗតាមបណ្តាញសង្គមហ្វេសប៊ុក និងអ៊ីនស្ត្រាក្រាមជាបន្តបន្ទាប់។
ក្នុងនាមជាអ្នកប្រឡូកក្នុងផ្នែកនេះ ព្រីម លីហ្សា បានលើកឡើងថា អ្វីដែលនាងបានបង្ហាញនេះ មិនមែនជាការបង្អួតមហាជននោះឡើយ ប៉ុន្តែនាងគ្រាន់តែចង់បង្ហាញពីម៉ូដថ្មីៗរបស់ស្ត្រីសម័យថ្មីតែប៉ុណ្ណោះ។
ព្រីម លីហ្សា បានបញ្ជាក់ថា អ្វីដែលនាងខ្ញុំតែងតែបង្ហាញជូនទៅកាន់បងប្អូនទាំងអស់គ្នាកន្លងមក គ្រាន់តែចង់បង្ហាញអំពី Fashion ផ្ទាល់ខ្លួនរបស់នាងខ្ញុំតែប៉ុណ្ណោះ។ នាងខ្ញុំជាតារាសម្ដែង ហើយនាងខ្ញុំបានប្រឡូកនៅក្នុងវិស័យ Fashion បែបនេះ ហើយរាល់រូបភាពរបស់នាងខ្ញុំ គ្រាន់តែចង់បង្ហាញអំពី Fashion របស់ស្ត្រីសម័យថ្មី មិនមែនចង់បង្អួត ឬសម្ញែងភាពមានបាន ឬក៏ភាពហ៊ឺហាអ្វីទេ ហើយទោះជាងនាងខ្ញុំស្រឡាញ់វិស័យ Fashion ខ្លាំងកម្រិតណាក៏ដោយ ក៏នាងខ្ញុំមិនដែលបំភ្លេចវប្បធម៌ខ្មែរដែរ។
នាងបន្ថែមថា វប្បធម៌ខ្មែរតែងតែដក់ជាប់នៅក្នុងដួងចិត្តរបស់កូនខ្មែរគ្រប់រូប ពីព្រោះនាងខ្ញុំក៏ជាសិស្សម្នាក់ដែលឈានជើងចេញពីសាលាវិចិត្រសិល្បៈដូចគ្នា គ្រាន់តែថា នាងខ្ញុំក្នុងនាមជាអ្នកសិល្បៈម្នាក់ គ្រាន់តែចង់បង្កើតអ្វីដែលប្លែក និងថ្មី ភាពទាន់សម័យមួយរបស់ស្ត្រីសម័យនេះ។ អរគុណសម្រាប់បងប្អូនមួយចំនួនដែលតែងតែយល់អំពីអ្វីដែលនាងខ្ញុំធ្វើ។
ជាការកត់សម្គាល់ ព្រីម លីហ្សា គឺជាតារាសម្តែងមួយរូប ដែលតែងតែបញ្ចេញនូវរូបភាពបង្ហាញម៉ូដសម្លៀកបំពាក់ម៉ាកល្បីៗ និងមានតម្លៃថ្លៃតាមបណ្តាញសង្គម។ បើទោះបីជាមិនសូវបានបង្ហាញវត្តមានសម្តែងញឹកញាប់ក៏ដោយ ប៉ុន្តែតារារូបនេះតែងតែបង្ហាញនូវភាពហ៊ឺហារបស់ខ្លួនតាមរយៈការបញ្ចេញនូវសម្លៀកបំពាក់យីហោល្បីៗ ក្នុងនាមជាអ្នកបង្ហាញម៉ូដមួយរូប។
ព្រីម លីហ្សា ត្រូវបានគេកត់សម្គាល់ថា ជាតារាស្រីនិយម ក៏ដូចជាស្រឡាញ់ភាពស្រស់ស្អាត និងភាពហ៊ឺហា ពោលគឺនាងល្បីជាយូរមកហើយថា ជាតារាស្រី ដែលនិយមប្រើសម្លៀកបំពាក់ Brand Brand មុនតារាស្រីជួរមុខស្ទើរទាំងអស់របស់កម្ពុជា។ សំលៀកបំពាក់ដែល លីហ្សា ពាក់ សុទ្ធជាម៉ាកល្បីៗ និងមានតម្លៃខ្ពស់ ដែលកាលពីអតីតកាល នាងធ្លាប់ប្រើសំលៀកបំពាក់មានតម្លៃដល់ម៉ឺនដុល្លារឯណោះ។
ព្រីម លីហ្សា គឺជាអតីតម្ចាស់ពានប្រជាប្រិយរបស់កម្មវិធីអាណាចក្រតារាកាលពីឆ្នាំ ២០១៤ ក្រោយពីនាងទទួលបានសំឡេងបោះឆ្នោតគាំទ្រតាមរយៈការផ្ញើសារតាមទូរស័ព្ទពីអ្នកគាំទ្ររបស់នាងលើសលប់។ ក្រោយពីសម្រេចបានសមិទ្ធផលធំគួរឲ្យមោទនភាព លីហ្សា ក៏បានបន្សាត់ខ្លួនឆ្ងាយទៅៗ រហូតស្ទើរបាត់មុខពីសិល្បៈ។ សកម្មភាពសិល្បៈគួរឲ្យកត់សម្គាល់របស់នាង គឺតាមរយៈការសម្ដែងជាតួឯកស្រីក្នុងវីដេអូចម្រៀងរបស់លោក ឆាយ វីរៈយុទ្ធ មានចំណងជើងថា «ទឹកលុយសម្លាប់ទឹកចិត្តខ្ញុំហើយ»៕ (កែសម្រួលដោយ ៖ បុប្ផា)
ចែករំលែកព័តមាននេះ