ខេត្តបន្ទាយមានជ័យ ៖ បើតាមសេចក្តីរាយការណ៍បឋមបានឱ្យដឹងថា នៅពេលដែលវត្តមានរបស់ជនជាតិចិន ចូលដល់ក្រុងប៉ោយប៉ែតយ៉ាងគគ្រឹកគគ្រេងនាពេលកន្លងមកនេះ តម្លៃបន្ទប់ជួលបានហក់ឡើងខ្ពស់កប់ពពក ធ្វើឲ្យពលរដ្ឋខ្មែរមួយចំនួនធំដែលបំរើការងារតាមក្រុមហ៊ុន និងកាស៊ីណូ ហើយស្នាក់នៅជាយដែនមួយនេះ ប្រឈមបញ្ហាខ្លះ…
ខេត្តបន្ទាយមានជ័យ ៖ បើតាមសេចក្តីរាយការណ៍បឋមបានឱ្យដឹងថា នៅពេលដែលវត្តមានរបស់ជនជាតិចិន ចូលដល់ក្រុងប៉ោយប៉ែតយ៉ាងគគ្រឹកគគ្រេងនាពេលកន្លងមកនេះ តម្លៃបន្ទប់ជួលបានហក់ឡើងខ្ពស់កប់ពពក ធ្វើឲ្យពលរដ្ឋខ្មែរមួយចំនួនធំដែលបំរើការងារតាមក្រុមហ៊ុន និងកាស៊ីណូ ហើយស្នាក់នៅជាយដែនមួយនេះ ប្រឈមបញ្ហាខ្លះ ដោយត្រូវរត់រកសាច់ញាតិសុំស្នាក់នៅ និងភាគច្រើនទៅជួលបន្ទប់នៅទីតាំងឆ្ងាយៗពីកន្លែងធ្វើការព្រោះមានតម្លៃថោកជាង។
សេចក្តីរាយការណ៍បន្តថា មិនតែប៉ុណ្ណោះ សូម្បីតែវិស័យអចលនៈទ្រព្យ (ការពុះដីល្វែងលក់) ក៏ហក់ឡើងខ្ពស់ដូចគ្នា ។ អ្នកទិញ ឬបង់រំលស់ផ្ទះល្វែងតាមបូរី ក៏បានជួលឲ្យជនជាតិចិនស្នាក់នៅជំនួស ព្រោះជួលបានតម្លៃថ្លៃ ហើយនាំគ្នាទៅជួលបន្ទប់ស្នាក់នៅឆ្ងាយៗដែលមានតម្លៃថោកទៅវិញ។
ចំណែកបុគ្គលិកកាស៊ីណូភាគច្រើនបានរអ៊ូរទាំថា បន្ទប់ជួលជិតៗទីតាំងកាស៊ីណូដែលកន្លងមក ពួកគេជួលស្នាក់នៅតម្លៃ1ខែយ៉ាងថ្លៃ3000បាតប្រាក់ថៃ បែរជាឡើងថ្លៃកប់ពពក ដោយ1ខែតម្លៃចូលម៉ឺនបាត ហើយទីតាំងលក់ដូរខ្លះគេឈប់ជួលឲ្យខ្មែរធ្វើអាជីវកម្ម បែរជាយកទៅជួលឲ្យជនជាតិចិនវិញ ព្រោះបានថ្លៃជាង។
ទោះជាយ៉ាងណា ក្រោយវិធានការរបស់រាជរដ្ឋាភិបាលបិទល្បែងអនឡាញ និងមុខរបរមួយចំនួនចំពោះជនបរទេសនៅកម្ពុជា ចិនហាក់បាត់វត្តមានជាបន្តបន្ទាប់ ពោលគឺនៅសល់តិចតួចក្នុងភូមិសាស្ត្រក្រុងប៉ោយប៉ែត ខេត្តបន្ទាយមានជ័យ។
ទន្ទឹមគ្នានេះ វិស័យអចលនៈទ្រព្យ (ដីធ្លី/ពុះល្វែងលក់) ក៏ធ្លាក់ចុះស្រឺតៗដូចទឹកស្រកធ្វើឲ្យអ្នកខ្លះរអ៊ូរទាំថា «ខកខ្លួន» ព្រោះមិនបានលក់ចេញពេលដីឡើងថ្លៃ។ ចំណែកការផ្សព្វផ្សាយឃោសនាលក់អចលនៈទ្រព្យតាមបណ្តាញសង្គមហ្វេសប៊ុកដែលកន្លងមក ផុលផុសនោះ ពេលនេះស្ងាត់ស្ងៀមផងដែរ។
ក្រោយបាត់វត្តមានចិនជាបន្តបន្ទាប់នេះ ប្រភពខ្លះថា អ្នកខ្លះក៏លង់ខ្លួននឹងប្រាក់កម្ចីធនាគារខ្លះដែរ ព្រោះប្រឹងកសាងអគារបន្ថែម តែមិនទាន់រួចរាល់ផង ត្រូវជនជាតិចិនចាកចេញអស់។
អ្វីដែលឃើញផ្ទាល់ភ្នែកមួយរយៈចុងក្រោយនេះ គឺអគារធំៗ និងបន្ទប់ជួលជាច្រើនគេឃើញមានដាក់ប៉ាយថា «មានអគារ ឬបន្ទប់ជួល»។ ដោយឡែកអគារធំៗលើទឹកដីកាស៊ីណូមួយចំនួនដូចជា ចំណុចអគារ8ជាន់ ដែលពីមុនមានវត្តមានជនជាតិចិនរស់នៅច្រើន ពេលនេះមានត្រឹមតែមេការ3ទៅ4នាក់តែប៉ុណ្ណោះ ដែលប្រភពថា ជាប់កុងត្រា ហើយដកខ្លួនមិនរួច។
ប្រភពដដែលបន្តថា ជនជាតិចិនដែលចេញពីក្រុងប៉ោយប៉ែត ភាគច្រើនឆ្ពោះទៅប្រទេសភូមាឆ្លងកាត់ច្រកទ្វារអន្តរជាតិប៉ោយប៉ែត។
ជុំវិញករណីខាងលើ សមត្ថកិច្ចជំនាញក្នុងខេត្តបន្ទាយមានជ័យម្នាក់ បានប្រាប់តាមទូរស័ព្ទថា វត្តមានជនជាតិចិននៅក្នុងភូមិសាស្ត្រក្រុងប៉ោយប៉ែត ខេត្តបន្ទាយមានជ័យ នៅសល់តិចតួចតែប៉ុណ្ណោះ៕ (កែសម្រួលដោយ ៖ បុប្ផា)
ចែករំលែកព័តមាននេះ