ខេត្តមណ្ឌលគិរី ៖ ដីព្រៃជិត៥ម៉ឺនហិកតាក្នុងដែនជម្រកចំនួន៣ ដែនជម្រកសត្វព្រៃស្រែពក, ដែនជម្រកសត្វព្រៃភ្នំព្រេច និងដែនជម្រកសត្វព្រៃកែវសីមា ត្រូវបានប្រគល់ទៅឲ្យជនជាតិដើមភាគតិចរស់នៅក្នុងខេត្តមណ្ឌលគិរី ការពារថែរក្សា និងអាស្រ័យផលពីធម្មជាតិ តាមប្រពៃណីដូនតា…
ខេត្តមណ្ឌលគិរី ៖ ដីព្រៃជិត៥ម៉ឺនហិកតាក្នុងដែនជម្រកចំនួន៣ ដែនជម្រកសត្វព្រៃស្រែពក, ដែនជម្រកសត្វព្រៃភ្នំព្រេច និងដែនជម្រកសត្វព្រៃកែវសីមា ត្រូវបានប្រគល់ទៅឲ្យជនជាតិដើមភាគតិចរស់នៅក្នុងខេត្តមណ្ឌលគិរី ការពារថែរក្សា និងអាស្រ័យផលពីធម្មជាតិ តាមប្រពៃណីដូនតា ថែមទាំងមានការជួយជ្រោមជ្រែងពីអាជ្ញាធរខេត្ត មន្ទីរបរិស្ថាន និងអង្គការ WWF អង្គការWCS ដោយគាំទ្រាំផ្ដល់ ទាំងផ្នែកសម្ភារៈបច្ចេកទេស ព្រមទាំងថវិកាផងដែរ ។
លោក តើន ឡឺប ជាតំណាងសហគមន៍១ក្នុងចំណោមសហគមន៍ទាំង១២បានលើកឡើងថា លោកពិតជាត្រេកអរ ដែលក្រសួងបរិស្ថានបានផ្ដល់សិទ្ធគ្រប់គ្រាន់ឲ្យប្រជាសហគមន៍មានអត្ថិភាពគ្រប់គ្រងថែរក្សា អាស្រ័យផល និងបង្ក្រាបបទល្មើស ធម្មជាតិក្នុងសហគមន៍របស់ខ្លួន ក្រោមការទំនុកបម្រុងពីសំណាក់អាជ្ញាធរ និងអង្គការដៃគូ ។ លោកបន្តថា សហគមន៍ទូលូងរបស់ លោក ស្ថិតក្នុងឃុំក្រងតេះ ស្រុកពេជ្រាដា មានទំហំផ្ទៃដីជាង៧ពាន់ហិកតា និងមានសមាជិកជាង៣០០នាក់ ក្នុងព្រៃសហគមន៍ មានសត្វព្រៃនៅច្រើនប្រភេទ ចំណែកព្រៃឈើវិញគឺសំបូរបែបច្រើនប្រភេទរាប់មិនអស់នោះទេ ។ លោកបន្ថែមថា ក្នុងពិធីប្រគល់ ព្រៃសហគមន៍នេះដែរ ក្នុងនាមជនជាតិដើមភាគតិចព្នងក៏បានរៀបចំសែនព្រេនតាមប្រពៃណីជូនដូនតា ដើម្បីឲ្យអារក្សអ្នកតា ម្ចាស់ព្រៃបន្តជួយថែរក្សា និងជឿជាក់ថាការសែនព្រេនបែបនេះអាចធ្វើអ្នកចង់ប្រព្រឹត្តបទល្មើសក្នុងព្រៃមានអារម្មណ៍ខ្លាចញញើត។
លោក សេង ទៀក នាយកអង្គការ WWF នៅកម្ពុជាបានឲ្យដឹងថា សហគមន៍ទាំង១២ដែលបានផ្ដល់ជូនប្រជាពលរដ្ឋមានផ្ទៃដីសរុបប្រមាណ៤.៥០០០ហិកតា ការផ្ដល់ជូននេះក្នុងគោលបំណងបង្កើនប្រសិទ្ធភាពថែរក្សាការពារព្រៃឈើនិងសត្វព្រៃឲ្យបានគង់វង្ស ជាងនេះទៀត ហើយសហគមន៍នីមួយៗនឹងទទួលបានផលប្រយោជន៍ជាច្រើនពីសហគមន៍របស់ខ្លួន ។
លោក ឈឹម កាន អភិបាលរងខេត្តមណ្ឌលគិរីលើកឡើងដែរថា កន្លងមកធនធានធម្មជាតិនៅខេត្តមណ្ឌលគិរីបានរងនូវការបំផ្លិចបំផ្លាញផងដែរ ព្រោះតែការកាប់ព្រៃឈើ បរបាញ់ដាក់អន្ទាក់សត្វព្រៃ និងការរុករករ៉ែខុសច្បាប់ ព្រោះតែមន្ត្រីល្បាតព្រៃនៅមានចំនួនតិចនៅឡើយ ។ លោកសង្ឃឹមថា ក្រោយសហគមន៍ទាំង១២ទទួលបានសិទ្ធិពេញលេញសម្រាប់អភិរក្សធម្មជាតិហើយនោះ នឹងអាចរួមគ្នាជាមួយមន្ត្រីជំនាញការពារធនធានធម្មជាតិក្នុងព្រៃបានយ៉ាងល្អ ។
លោកជំទាវ ម៉ុម ថានី រដ្ឋលេខាធិការក្រសួងបរិស្ថានបានថ្លែងដែរថា ការថែទាំព្រៃប្រឹក្សាធម្មជាតិក្នុងព្រៃគឺជនជាតិដើមភាគ តិចជាម្ចាស់ទឹកដី មានបទពិសោធន៍ល្អជាងមន្ត្រីជំនាញទៅទៀត លោកជំទាវសូមកោតសរសើរចំពោះស្នាដៃកន្លងមក ដែលបងប្អូនជនជាតិដើមភាគតិចរួមចំណែកក្នុងការអភិរក្សព្រៃឈើ និងសត្វព្រៃ ជាមួយមន្ត្រីជំនាញ ។
ពិធីប្រគល់តំបន់អភិរក្សព្រៃឈើ និងសត្វព្រៃរាប់ម៉ឺនហិកតា ជូនដល់ជនជាតិដើមភាគតិចនៅខេត្តមណ្ឌលគិរីនេះបានធ្វើឡើងនៅឡើងស្រុកកោះញែក កាលពីថ្ងៃទី១៩ ធ្នូ ២០១៩ និងមានការបែងចែកតំបន់ទាំងនោះជា១២សហគមន៍ផ្សេងគ្នា មានការគ្រប់គ្រងតាមសហគមន៍នីមួយៗរៀងៗខ្លួន ។ សហគមន៍ការពារធម្មជាតិទាំង១២ ក៏ទទួលបានសម្ភារៈបច្ចេកទេសគ្រប់គ្រាន់ក្នុងការល្បាតព្រៃដូចមន្ត្រី ឧទ្យានុរក្សដែរ និងជំនួញថវិកាជាច្រើនពីសំណាក់អង្គការដៃគូ ដោយសហគមន៍នីមួយៗទទួលបានជំនួញថវិកាប្រមាណជាង១ម៉ឺនដុល្លារៀងរាល់ឆ្នាំ ៕ (កែសម្រួលដោយ ៖ ធីតា)
ចែករំលែកព័តមាននេះ