រាជធានីភ្នំពេញ ៖ តាមរយៈក្រសួងកសិកកម្មរុក្ខាប្រមាញ់ និងនេសាទធនធានអភិវឌ្ឍន៍អាស៊ីបានជំរុញឲ្យពន្លឿនសេចក្តីព្រាងស្តីពី«ការពាររុក្ខជាតិ និងភូតគាមអនាម័យ»ឲ្យឆាប់ចប់ ។ យោងតាមបណ្តាញសង្គមរបស់ក្រសួងកសិកម្មបានឲ្យដឹងថា ក្នុងជំនួបជាមួយលោកវេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នាព្រឹកថ្ងៃទី២០ ខែធ្នូ នៅទីស្តីការក្រសួង ។
លោក Sunniya Durrani-Jamal នាយកប្រតិបត្តិនៃធនាគារអភិវឌ្ឍអាស៊ី (ADB) ប្រចាំកម្ពុជា និងសហការីបានធ្វើដើម្បីតាមដានពីដំណើរការនៃការរៀបចំសេចក្តីព្រាងច្បាប់ស្តីពី «ការការពាររុក្ខជាតិ និងភូតគាមអនាម័យ» ដែលទទួលបានការជួយឧបត្ថម្ភពី ADB ។ ជាបឋមលោកស្រីបានលើកឡើងថា ជំនួបនេះ គឺលោកស្រីមានបំណងចង់ពិភាក្សា និងតាមដានអំពីដំណើរការនៃការរៀបចំសេចក្តីព្រាងច្បាប់ខាងលើ ដើម្បីធ្វើយ៉ាងណាជំរុញកិច្ចការនេះឲ្យបានលឿន រលូន និងទទួលបានការអនុម័តនាពេលអនាគតដ៏ខ្លី ដើម្បីជួយលើកកម្ពស់សមត្ថភាពពេញលេញក្នុងការចូលរួមអនុវត្តការការពាររុក្ខជាតិ និងការត្រួតពិនិត្យភូតគាមអនាម័យក្នុងវិស័យកសិកម្មកម្ពុជា និងជាពិសេស ដើម្បីជួយសម្រួលដល់ការធ្វើកសិ-ពាណិជ្ជកម្មឲ្យបានរលូន ទូលំទូលាយ និងមានប្រសិទ្ធភាពស្របនិយាម និងគោលនយោបាយរបស់អាស៊ាន និងអន្តរជាតិ ។
ជាការឆ្លើយតបលោករដ្ឋមន្ត្រីបានថ្លែងអំណរគុណចំពោះ ADB និងជាពិសេសចំពោះលោកស្រី និងក្រុមការងារដែលយកចិត្តទុកដាក់ និងសម្តែងនូវក្តីកង្វល់ចំពោះការយឺតយ៉ាវនៃដំណើរការរៀបចំសេចក្តីព្រាងច្បាប់នេះ ។ លោកបានបញ្ជាក់ថា ចំពោះក្រសួងច្បាប់នេះមានសារ:សំខាន់ទាំងក្នុងពេលបច្ចុប្បន្ន និងអនាគតព្រោះវានឹងជួយសម្រួលដល់ការធ្វើកសិ-ពាណិជ្ជកម្ម ការការពាររុក្ខជាតិពីជំងឺឆ្លង និងសត្វល្អិតចង្រៃដែលអាចបង្កហានីភ័យដល់ដំណាំ និងជាពិសេសនោះ គឺជាឧបសគ្គចំបងដល់ការនាំចេញកសិផលកម្ពុជា ប្រសិនបើយើងគ្មានវិធានការការពារ ឬទប់ស្កាត់ឲ្យបានត្រឹមត្រូវច្បាស់លាស់ និងមានប្រសិទ្ធភាពស្របតាមលក្ខណច្បាប់ និងបច្ចេកទេសនោះទេ។
ដោយឡែកចំពោះដំណើរការនៃកិច្ចពិភាក្សាលើសេចក្តីព្រាងច្បាប់នេះកំពុងដំណើរការទៅមុខបើទោះបីមានបញ្ហាខ្លះៗដែលត្រូវពិភាក្សាឲ្យបានលម្អិត និងស៊ីជម្រៅបន្ថែមទៀតជាមួយក្រសួង និងស្ថាប័នពាក់ព័ន្ធ ប៉ុន្តែទោះជាយ៉ាងណាក្រសួងនឹងខិតខំឲ្យអស់ពីសមត្ថភាពក្នុងការចរចា និងដោះស្រាយបញ្ហាដែលជាប់គាំងទាំងឡាយធ្វើយ៉ាងណាជំរុញឲ្យសេចក្តីព្រាងច្បាប់នេះអនុម័តក្នុងពេលឆាប់ ៕ កែសម្រួលដោយ ៖ សុឃាក់
ចែករំលែកព័តមាននេះ