ខេត្តកំពង់ឆ្នាំង ៖ អាជ្ញាធរឃុំឆ្នុកទ្រូ ស្រុកបរិបូណ៌ បានអំពាវនាវដល់ប្រជាពលរដ្ឋ សូមមេត្តាបោះបង់គំនិតការកាប់ទន្ទ្រានយកដីព្រៃលិចទឹកជាបន្តទៀត និងសូមចូលរួមគោរពច្បាប់ស្ដីពីជលផលទាំងអស់គ្នា ។
សេចក្តីអំពាវនាវនេះ ធ្វើឡើងបន្ទាប់ពីការកាប់ទន្ទ្រានយកដីព្រៃលិចទឹក ក្នុងភូមិសាស្ត្រឃុំឆ្នុកទ្រូ នៅតែកើតមានឡើងជាបន្តបន្ទាប់ និងកាន់តែមានសន្ទុះខ្លាំងឡើង ៗជារៀងរាល់ឆ្នាំ ទើបអាជ្ញាធរសំណូមពរផងមានវិធានការផង ដើម្បីថែរក្សាដីព្រៃលិចទឹក ទុកជាសម្បត្តិធម្មជាតិសម្រាប់ត្រីពងកូននិងជីវៈចម្រុះក្នុងទឹកផងដែរ ។
លោក សាំង គីមស៊ន ឃុំឆ្នុកទ្រូ ស្រុកបរិបូណ៌ អំពាវនាវដល់ប្រជាពលរដ្ឋទាំងអស់ទាំងនៅក្នុងឃុំឆ្នុកទ្រូ ទាំងនៅឃុំជាប់គ្នានេះ សូមមេត្តាបញ្ឈប់ជាមិនទាន់ការកាប់ទន្ទ្រានយកដីព្រៃលិចទឹកដែលជាជម្រកត្រីពងកូន ។ លោកមេឃុំបានបញ្ជាក់ថាកន្លងមកថ្មីៗនេះការកាប់ទន្ទ្រានព្រៃលិចទឹកនៅតែកើតមានឡើង និងមានសន្ទុះខ្លាំងឡើងជាងរាល់ឆ្នាំ បន្ទាប់ពីមានការបន្លាស់ទីផ្ទះបណ្ដែតទឹក ប្រជាពលរដ្ឋមករស់នៅលើគោក ។
ដោយឃើញបែបនេះ ទើបមានប្រជាពលរដ្ឋមកពីខាងក្រៅមកទន្ទ្រានយកដីព្រៃលិចទឹក ដោយចង់យកធ្វើជាកម្មសិទ្ឋ ធ្វើដូចដែលអ្នកបន្លាស់ទីផ្ទះបណ្ដែតទឹកនៅលើគោកមានច្បាប់ត្រឹមត្រូវដែរ ។ ជាក់ស្ដែង នៅជិតភូមិវត្តយុគន្ធរចម្ងាយប្រមាណជាង២០០ម៉ែត្រ មានការទន្ទ្រានយកដីព្រៃលិចទឹកអស់ប្រមាណជិត២ ហិកតា ដោយបានសង់ផ្ទះរស់នៅទៀតផង ។ ចំណែកនៅជិតគ្នានោះក៏មានជាប្រជាពលរដ្ឋ អ្នកនៅក្នុងឃុំផ្សេង បានមកកាប់ទន្ទ្រានដីព្រៃលិចទឹកជិតគ្នាអស់រាប់សិបហិកតាផងដែរ។
ព័ត៌មានពិស្តារមានផ្សាយជូននៅកាសែតកោះសន្តិភាព ។
ចែករំលែកព័តមាននេះ