ខេត្តបន្ទាយមានជ័យ ៖ ផ្ទះរបស់ស្ត្រីមេម៉ាយម្នាក់សង្ស័យឆ្លងចរន្តអគ្គិសនីបង្កជាអគ្គិភ័យ ឆាបឆេះអស់ទ្រព្យសម្បត្តិទាំងស្រុង បណ្តាលឱ្យស្ត្រីរងគ្រោះយំរហូតដល់សន្លប់៣ទៅ៤ដង ខណៈស្ត្រីរងគ្រោះមិននៅផ្ទះជាប់រវល់យកចង្ហាន់ទៅវត្តនៅថ្ងៃសីល ។
ហេតុការណ៍ខាងលើនេះបានកើតឡើងកាលពីវេលាម៉ោង១០និង៥០នាទីព្រឹកថ្ងៃទី១៩ ខែធ្នូ ឆ្នាំ២០១៩ ស្ថិតនៅភូមិរោងម៉ាស៊ីន សង្កាត់អូរអំបិល ក្រុងសិរីសោភ័ណ។
ផ្ទះកើតហេតុខាងលើជាប្រភេទផ្ទះឈើលើ ថ្មក្រោម ប្រក់ស័ង្កសី មានបណ្តោយ៨ម៉ែត្រនិងទទឹង៦ម៉ែត្រ មានម្ចាស់ឈ្មោះ ទាប បុប្ផា ភេទស្រី អាយុ៥៦ឆ្នាំ ជាស្ត្រីមេម៉ោយ មុខរបរលក់ផ្លែឈើ និងកូនស្រីឈ្មោះ សំ បូភា អាយុ៣០ឆ្នាំ ។ គ្រួសារនេះរស់នៅក្នុងភូមិឃុំកើតហេតុខាងលើ។
តាមប្រភពពីម្ចាស់ផ្ទះបានប្រាប់ថា នៅពេលដែលអគ្គីភ័យកើតឡើង គឺគ្មានអ្នកនៅឡើយដោយចាក់សោបិទទ្វារចោល ហើយគាត់យកចង្ហាន់ទៅវត្តព្រោះជាថ្ងៃសីល លុះមកដល់វត្ត ស្រាប់តែមានអ្នកជិតខាងទូរស័ព្ទប្រាប់គាត់ថា ភ្លើងឆេះផ្ទះ ពេលគាត់មកដល់ក៏ឃើញរថយន្តពន្លត់អគ្គីភ័យកំពុងពន្លត់ ធ្វើឱ្យគាត់ដួលសន្លប់តែត្រូវបានអ្នកជិតខាងជួយ។
លោកវរសេនីយ៍ឯក ប៊ុន ផេង ស្នងការរងទទួលផែនអគ្គីភ័យ នៃស្នងការដ្ឋាននគរបាលខេត្តបន្ទាយមានជ័យបានបញ្ជាក់ថា នៅពេលកម្លាំងនគរបាលពន្លត់អគ្គីភ័យចុះមកជួយអន្តរាគមន៍ពន្លត់គឺអគ្គិភ័យកំពុងឆាបឆេះខ្លាំងបានបាញ់ទឹកពន្លត់ដែរ តែផ្ទះត្រូវភ្លើងឆាបឆេះអស់ស្ទើងទាំងស្រុងទៅហើយ តែមិនបណ្តាលឱ្យឆេះរាលដាលដល់ផ្ទះអ្នកជិតខាងឡើយ។
លោកវរសេនីយ៍ឯក ប៊ុន ផេង បានបញ្ជាក់ថា ក្រោយពេលអន្តរាគមន៍បាញ់ទឹកពន្លត់ហើយកម្លាំងចុះស្រាវជ្រាវជំហានដំបូងរកឃើញថា អគ្គីភ័យខាងលើកើតឡើងដោយសារឆ្លងចរន្តអគ្គីសនី បណ្តាលឆាបឆេះផ្ទះផ្នែកខាងលើ និងរាលដាលឆេះអស់ស្ទើរទាំងស្រុង ព្រមទាំងរងការខូចខាតទ្រព្យសម្បត្តិរួមមានប្រាក់៣៨.៥០០.០០០រៀល និងប្រាក់៨៨៧ដុល្លារផងដែរ។
ពាក់ព័ន្ធនឹងករណីខាងលើ លោកវរសេនីយ៍ឯក ប៊ុន ផេង បានអំពាវនាវដល់បងប្អូនប្រជាពលរដ្ឋទាំងអស់មុនពេលចាកចេញពីផ្ទះត្រូវបិទបារ៉ែតភ្លើង និងពន្លត់ភ្លើងចង្ក្រានបាយ និងពន្លត់ធូបទានឱ្យបានត្រឹមត្រូវ ដើម្បីបង្ការខ្លាចកើតមានគ្រោះអគ្គីភ័យ បណ្តាលឱ្យរងការខូចខាតទ្រព្យសម្បត្តិ៕ (កែសម្រួលដោយ ៖ ធីតា)
ចែករំលែកព័តមាននេះ