រាជធានីភ្នំពេញ ៖ ក្នុងរយៈពេលជិត១ឆ្នាំ២០១៩នេះ ការនាំចេញទៅកាន់គ្រប់ទ្វីប លើពិភពលោកពីកម្ពុជា ក្រោមប្រព័ន្ធអនុគ្រោះពន្ធ និងពាណិជ្ជកម្មសេរី មានទឹកប្រាក់ប្រមាណ១០.៨១៣លានដុល្លារអាមេរិក ។ នេះបើតាមរបាយការណ៍…
រាជធានីភ្នំពេញ ៖ ក្នុងរយៈពេលជិត១ឆ្នាំ២០១៩នេះ ការនាំចេញទៅកាន់គ្រប់ទ្វីប លើពិភពលោកពីកម្ពុជា ក្រោមប្រព័ន្ធអនុគ្រោះពន្ធ និងពាណិជ្ជកម្មសេរី មានទឹកប្រាក់ប្រមាណ១០.៨១៣លានដុល្លារអាមេរិក ។ នេះបើតាមរបាយការណ៍ របស់ក្រសួងពាណិជ្ជកម្មកម្ពុជា ។
តាមរបាយការណ៍ដដែលនេះបានបង្ហាញថាការនាំចេញ រយៈពេល១០ខែ២០១៩ មានកំណើនប្រមាណ៦,៤៥ភាគរយ ធៀបនឹងរយៈពេលដូចគ្នាក្នុងឆ្នាំ ២០១៨កន្លងទៅនេះ គិតជាទឹកប្រាក់មានកំណើនប្រមាណ៦៥៤លានដុល្លារអាមេរិក ។ ក្នុងចំណោមទឹកប្រាក់ប្រមាណជាង ១០ពាន់លានដុល្លារនេះ ការនាំចេញសម្លៀកបំពាក់ មានទឹកប្រាក់ប្រមាណជា៦៤០០លានដុល្លារអាមេរិកទៅហើយ វាយនភ័ណ្ឌមានទឹកប្រាក់ជាង៤០លានដុល្លារនិងស្បែកជើងមានទឹកប្រាក់ប្រមាណ ៩០៥លានដុល្លារអាមេរិក ។ ដោយឡែកសម្រាប់អង្ករកម្ពុជា ក្នុងរយៈពេល១០ខែនេះ តាមរបាយការណ៍ក៏បានបង្ហាញថាមានទឹកប្រាក់នាំចេញប្រមាណ ២៨៦លានដុល្លារអាមេរិកផងដែរ ។
លោកឧកញ៉ា វ៉ាន់ សូអៀង ប្រធានសមាគមរោងចក្រកាត់ដេរសម្លៀកបំពាក់និងស្បែកជើងកម្ពុជា បានមានប្រសាសន៍ផងដែរថា ការនាំចេញសម្លៀកបំពាក់និងស្បែកជើង ជាពិសេសផលិតផលថ្មីមួយទៀត គឺសម្ភារៈធ្វើដំណើរទៅកាន់ទីផ្សារប្រទេស មានកំណើនគួរអោយកត់សម្គាល់ ។ តាមរយៈតួលេខនាំចេញនេះនឹងអាចទាក់ទាញវិនិយោគិនបរទេសជាច្រើនទៀតមកបណ្ដាក់ទុនវិនិយោគនៅកម្ពុជាបង្កើតឱកាសការងារជាច្រើនដល់ពលរដ្ឋកម្ពុជា ។ លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា មានប្រសាសន៍ថាការនាំចេញរបស់កម្ពុជា ជាទូទៅរក្សាបានកំណើនប្រមាណ១០%ធៀបនឹងតម្លៃនាំចេញក្នុងឆ្នាំកន្លង ទៅ ដោយសារកម្ពុជាបានជម្រុញការធ្វើសមាហរ័ណកម្មបន្ថែមទៀតក្នុងក្របខ័ណ្ឌអាស៊ាន និងជាមួយអាស៊ានជាមួយដៃគូ ដូចជាជប៉ុន ចិន កូរ៉េ អូស្ត្រាលី ណូវែលហ្សេឡង់ និងឥណ្ឌាជាដើម ។
ក្នុងនោះ កំណើននៃការនាំចេញទៅទីផ្សារធំៗ ដូចជា អាមេរិក កាណាដា ចិន នៅរក្សាអត្រាដូចអត្រាកំណើនក្នុងឆ្នាំ២០១៨ដដែល ទោះបីជាមានការអនុវត្តនីតិវិធីសម្បទានពន្ធគយ និងការដាក់វិធានការណ៍ការពារលើផលិតផលអង្កររបស់កម្ពុជា កាលពីខែមករា ឆ្នាំ២០១៩នេះ ក៏ដោយ ។
លោកបានបន្តថា កម្ពុជាក៏កំពុងពង្រីកទីផ្សារថ្មីទៅកាន់បណ្តាប្រទេសមួយចំនួននៅអឺរ៉ុបខាងកើត និងទីផ្សារដែលនៅមានសក្តានុពលនាំចេញ ដូចជាចិន ជប៉ុន និងកូរ៉េ តាម រយៈចរចាបង្កើតកិច្ចព្រមព្រៀងពាណិជ្ជកម្មសេរីទ្វេភាគីនិងបញ្ចប់ការចរចាកិច្ចព្រមព្រៀងពាណិជ្ជកម្មសរីរវាង១៦ប្រទេស ដែល ហៅកាត់ថា RCEPហើយឈានទីចុះហត្ថលេខានៅឆ្នាំ២០២០ខាងមុខនេះ ។ ក្នុងនោះដែរ កម្ពុជាបានចុះហត្ថលេខាលើសេចក្តីថ្លែងការណ៍រួមស្តីពីការសិក្សាពីលទ្ធភាពបង្កើតកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ កាលពីថ្ងៃទី២៥ ខែវិច្ឆិកា ឆ្នាំ២០១៩ និងបានជួបប្រជុំពិភាក្សាអំពីលទ្ធភាពនៃការបង្កើតកិច្ចព្រមព្រៀង ពាណិជ្ជកម្មសេរីទ្វេភាគីកម្ពុជា-ចិន កាលពីថ្ងៃទី៣-៤ ខែធ្នូ ឆ្នាំ២០១៩ នៅទីក្រុងប៉េកាំង នៃសាធារណៈរដ្ឋប្រជាមានិតចិន ព្រមទាំងបានឯកភាពគ្នាលើគោលការណ៍ធំៗសម្រាប់ការចរចាបន្ត ។
គួរបញ្ជាក់ថា កាលពីពេលថ្មីៗនេះ រាជរដ្ឋាភិបាល ក៏បានបើកជំហរនូវការចរចារជាមួយប្រទេសចិន និងប្រទេសកូរ៉េខាងត្បូង ដើម្បីបង្កើតកិច្ចព្រមព្រៀងពាណិជ្ជកម្មសេរី ដែលធ្វើអោយកម្ពុជា អាចនាំចេញទំនិញជាច្រើនទៀត ទៅកាន់ទីផ្សារប្រទេសដែលមានទីផ្សារធំមួយនេះ ក្នុងពិភពលោក ៕
ចែករំលែកព័តមាននេះ