រាជធានីភ្នំពេញ៖ ផ្សារព្រំដែនកម្ពុជា-វៀតណាម ឬហៅថាផ្សារ«ដារ»ដែលស្ថិតនៅក្នុងឃុំដារ ស្រុកមេមត់ ខេត្តត្បូងឃ្មុំ ត្រូវបានគេមើលឃើញថានឹងក្លាយជាទីកន្លែងដោះដូរទំនិញ ឬកន្លែងសម្រួលពាណិជ្ជកម្មរវាងខេត្តនិងខេត្តនៃប្រទេសទាំងពីរកាន់តែប្រើសើរនៅតាមព្រំដែន ក្រោយពីដាក់ឱ្យដំណើរការជាផ្លូវការនៅថ្ងៃទី២៤ ខែធ្នូ ឆ្នាំ២០១៩ ដ៏ខ្លីខាងមុខនេះ ។
លោកប៉ានសូរស័ក្តិ រដ្ឋមន្ត្រីក្រសួងពាណិជ្ជកម្ម មានប្រសាសន៍ក្នុងសន្និបាតបូកសរុបលទ្ធផលការងារឆ្នាំ២០១៩និងលើកទិសដៅឆ្នាំបន្ទាប់កាលពីថ្ងៃទី១៨ ខែធ្នូ ម្សិលមិញនេះថាប្រទេសកម្ពុជាបានជំរុញកិច្ចសហប្រតិបត្តិការជាមួយប្រទេសវៀតណាម សាងសង់ផ្សារព្រំដែនដើម្បីផ្លាស់ប្តូរមុខទំនិញ ការធ្វើពាណិជ្ជកម្មទៅវិញទៅមក។ លោករដ្ឋមន្ត្រីបានសង្កត់ធ្ងន់យ៉ាងដូច្នេះថា «ជាលទ្ធផលផ្សារព្រំដែនកម្ពុជា-វៀតណាមដែលហៅថាផ្សារ «ដារ» ស្ថិតនៅឃុំដា ស្រុកមេមុត ខេត្តត្បូងឃ្មុំនឹងបើកសម្ពោធដាក់ឱ្យប្រើប្រាស់ជាផ្លូវការដោយសម្តេចអគ្គមហាសេនាបតីតេជោ ហ៊ុនសែននៅថ្ងៃទី២៤ ខែ ធ្នូខាងមុខនេះ។
ពាក់ព័ន្ធនឹងគម្រោងផ្សារដារនេះ តាមប្រធានមន្ទីរពាណិជ្ជកម្មខេត្តត្បូងឃ្មុំមើលឃើញថា បើផ្សារដារនេះដាក់ឱ្យដំណើរជាផ្លូវការនវានឹងក្លាយជាទីន្លែងដោះដូរមុខទំនិញរបស់ប្រជាកសិករក្នុងតំបន់កាន់តែប្រសើរ កាន់តែងាយស្រួលដែលជាផ្នែកមួយនៃការសម្រួលពាណិជ្ជកម្ម។
លោក តួច សុខន ប្រធានមន្ទីរពាណិជ្ជកម្មខេត្តត្បូងឃ្មុំ បានមានប្រសាសន៍ថា «យើងនឹងមានទីតាំងមួយសម្រាប់ឱ្យអាជីវករសម្រាប់ដោះដូរទំនិញឱ្យកាន់តែល្អប្រសើរនៅពេលខាងមុខនេះ។ការធ្វើអាជីវកម្មជាមួយប្រទេសវៀតណាមនៅតាមទល់ដែននេះគឺវាមានភាពសកម្មគឺមានការកើនឡើងពីមួយឆ្នាំទៅមួយឆ្នាំ ហើយយើងសង្ឃឹមថានៅពេលដែលយើងមានផ្សារដារបើកសម្ពោធជាផ្លូវការហើយនោះ សន្ទុះពាណិជ្ជកម្មកាន់តែមានភាពខ្លាំងក្លា ពិសេសខេត្តត្បូងឃ្មុំជាមួយខេត្តតៃនិញរបស់ប្រទេសវៀតណាម»។ លោកបានលើកឡើងបន្ថែមថា ផលិតផលរបស់កម្ពុជាកន្លងមកធ្លាប់នាំចេញនៅតាមច្រកនេះ ភាគច្រើនជាកសិផល ហើយខាងភាគីវៀតណាមនាំចូលមកវិញភាគច្រើនផលិតផលបម្រើនៅក្នុងវិស័យឧស្សាហកម្ម មានដូចជាវត្ថុធាតុដើមសម្រាប់ផលិតជីជា
ដើម។ យើងនាំចេញកសិផលមានកៅស៊ូ ឈើកៅស៊ូកែច្នៃរួចរួមនិងផលិតផលមួយចំនួនផ្សេងទៀតដែលនាំចេញទៅប្រទេសវៀតណាមនេះ។ពិសេសនៅតាមបណ្តាខេត្តមួយចំនួនស្ថិតនៅភាគខាងលិចពេលជួបបញ្ហា នៅពេលភាគីថៃគាត់ចាល់កសិផលរបស់គាត់ ភូមិភាគរបស់យើនៅខាងបាត់ដំបង បៃលិន បានបញ្ជូនកសិផលរបស់គាត់មកតាមច្រកផ្សារដារនេះដើម្បីសម្រួលពាណិជ្ជកម្មមិនឱ្យស្ទះ។
លោក តូច សុខន មានប្រសាសន៍ថា «តាមខ្ញុំយល់ នៅពេលផ្សារដារនេះដាក់ឱ្យដំណើរការ គ្រប់ផលិតរបស់កម្ពុជាអាចនាំមកលក់នៅច្រកផ្សារដារនេះបាន។ជាការពិតនៅពេលផ្សារដារនេះវានឹងចូលរួមធ្វើទីផ្សារកសិផល តម្រូវការរបស់កសិករមានភាពល្អប្រសើរ ហើយវាងាយស្រួលក្នុងការដោះដូរព័ត៌មានទីផ្សារទៅវិញទៅមក»។ បើតាមប្រធានមន្ទីររូបនេះ ផ្សារដារនេះប្រើទុនប្រមាណ២លានដុល្លារដែលជាថវិការបស់ភាគីវៀតណាម ហើយសាងសង់លើផ្ទៃដីប្រហែល២ហិកតា៕ កែសម្រួលដោយ ៖ សុឃាក់
ចែករំលែកព័តមាននេះ