រាជធានីភ្នំពេញ ៖ គណៈប្រតិភូសភាកម្ពុជាបានបង្ហាញទៅកាន់កិច្ចប្រជុំមហាសន្តិបាតសភាតំបន់អាស៊ី (APA) លើកទី១២ ថាបុរេលក្ខណដ៏ចាំបាច់ គឺសន្តិភាព និងស្ថេរភានយោបាយ ។ នេះបើតាមលោក…
រាជធានីភ្នំពេញ ៖ គណៈប្រតិភូសភាកម្ពុជាបានបង្ហាញទៅកាន់កិច្ចប្រជុំមហាសន្តិបាតសភាតំបន់អាស៊ី (APA) លើកទី១២ ថាបុរេលក្ខណដ៏ចាំបាច់ គឺសន្តិភាព និងស្ថេរភានយោបាយ ។ នេះបើតាមលោក ឈិត គឹមយាត ។
លោកឈិត គឹមយាត អនុប្រធានគណៈកម្មការកិច្ចការបរទេសសហប្រតិបត្តិការអន្តរជាតិ ឃោសនាការ និងព័ត៌មាននៃព្រឹទ្ធសភាបានឲ្យដឹងក្នុងសន្និសីទសារព័ត៌មាន នាព្រឹកថ្ងៃទី១៩ខែធ្នូ នៅព្រលានយន្តហោះអន្តរជាតិភ្នំពេញថា នៅក្នុងកិច្ចពិភាក្សាទូទៅនៃមហាសន្និបាត ក្រោមមូលបទ «តួនាទីកិច្ចសហប្រតិបត្តិការពុហភាគីរវាងសភាតំបន់អាស៊ី» ។ លោកថា ក្នុងកិច្ចប្រជុំលោកបណ្ឌិត ងួន ញ៉ិល អនុប្រធានទី១ រដ្ឋសភា និងជាប្រធានប្រតិភូសភាកម្ពុជាបានធ្វើបទអន្តរាគមន៍ដោយបានថ្លែងទៅកាន់អង្គមហាសន្និបាតដែលមានសារៈសំខាន់ និងភាពចាំបាច់របស់តួនាទីនៃពហុភាគីនិយម ជាពិសេសតាមរយៈការងារការទូតសភាដែលត្រូវបានអនុវត្តចាប់តាំងពីសង្គ្រាមត្រជាក់មកក្នុងការដោះស្រាយជម្លោះក្នុងតំបន់ និងពិភពលោកប្រកបដោយសន្តិវិធី ។
លោកបណ្ឌិតបានបញ្ជាក់ថា សភាកម្ពុជាបានប្រតិបត្តិតួនាទីនេះយ៉ាងសកម្មក្នុងការរួមចំណែកដល់ការពង្រឹងលើកកម្ពស់ និងថែរក្សាសុខសន្តិភាព ស្ថេរភាព និងការអភិវឌ្ឍទាំងក្នុងតំបន់ និងសកលលោក ។ លោកអនុប្រធានទី១ រដ្ឋសភាក៏បានបង្ហាញជូនអង្គមហាសន្និបាតពីសមិទ្ធផលសេដ្ឋកិច្ចសង្គមសំខាន់នានាដែលកម្ពុជាសម្រេចបានក្នុងការកសាង និងអភិវឌ្ឍប្រទេសដែលក្នុងនោះកត្តាគន្លឹះ និងបុរេលក្ខណដ៏ចាំបាច់នោះ គឺសន្តិភាព និងស្ថេរភាពនយោបាយ ។
ក្នុងរយៈពេលជាង ២ទសវត្សន៍ចុងក្រោយនេះបន្ទាប់ពីកម្ពុជាទទួលបាននូវសុខសន្តិភាពពេញលេញ និងស្ថេរភាពសង្គមបានជួយឱ្យកម្ពុជាទទួលបាននូវកំណើនសេដ្ឋកិច្ចខ្ពស់ រឹងមាំ និងធន់ ដែលជាមធ្យមក្នុងរង្វង់៧ភាគរយ ។ លទ្ធផលនៃវឌ្ឍនភាពសេដ្ឋកិច្ច-សង្គម បានប្រែក្លាយកម្ពុជាពីប្រទេសក្រីក្រទៅជាប្រទេសមានចំណូលមធ្យមកម្រិតទាប និងឈានទៅជាប្រទេសមានចំណូលមធ្យមកម្រិតខ្ពស់ក្នុងឆ្នាំ២០៣០ ។
បើតាមលោក ឈិត គឹមយានក៏បានឲ្យដឹងថា លទ្ធផលរួមនៃមហាសន្និបាតក្នុងរយៈពេល៣ ថ្ងៃអង្គមហាសន្និបាតលើកទី១២ របស់សភាតំបន់អាស៊ីសម្រេចបានលទ្ធផលដូចបានអនុម័តយល់ព្រមដោយឯកច្ឆ័នឱ្យសភាកាតា និងទីម័រលេស ចូលជាសមាជិកពេញសិទ្ធិរបស់ APA។ មកទល់ពេលនេះសមាជិកសភា អេភីអេបានកើនដល់ចំនួន៤៤ប្រទេស ។ បានអបអរសាទរ និងអរគុណចំពោះសភាតួកគី ដែលបានយល់ព្រមធ្វើជាប្រធាន APA សម្រាប់អាណត្តិ ២០២០-២០២១ ។ បានអនុម័តសេចក្តីព្រាងសេចក្តីសម្រេចចំនួន ៣០ពាក់ព័ន្ធនឹងគណៈកម្មការចំនួន៤សំខាន់ រួមមានគណៈកម្មាធិការអចិន្ត្រៃយ៍កិច្ចការសង្គម និងវប្បធម៌មានសេចក្តីសម្រេចចំនួន១៣ , គណៈកម្មាធិការអចិន្ត្រៃយ៍កិច្ចការសេដ្ឋកិច្ច និងការអភិវឌ្ឍប្រកបដោយចីរភាពមានសេចក្តីសម្រេចចំនួន០៧, គណៈកម្មាធិកាអចិន្ត្រៃយ៍កិច្ចការនយោបាយមានសេចក្តីសម្រេចចំនួន០៩ និងគណៈកម្មាធិការអចិន្ត្រៃយ៍កិច្ចការថវិកា និងផែនការមានសេចក្តីសម្រេច ចំនួន០១ ៕
ចែករំលែកព័តមាននេះ