ADផ្ទាំងផ្សព្វផ្សាយពាណិជ្ជកម្ម

ចាក់ក្រាលកៅស៊ូជុំវិញវិមានឯករាជ្យក្នុងក្រុងប៉ៃលិន

4 ឆ្នាំ មុន

ប៉ៃលិន
១៩ ខែ ធ្នូ ឆ្នាំ ២០១៩ ម៉ោង ០៩:៣១

ខេត្តប៉ៃលិន ៖ រហូតមកដល់ពេលនេះ គេសង្កេតឃើញសោភ័ណភាពនៅក្នុងក្រុងប៉ៃលិន កាន់តែស្រស់បំព្រង មានផ្លូវខ្វាត់ខ្វែង ក្រាលទៅដោយកៅស៊ូ និងចាក់បេតុង ព្រមទាំងមានការដាំផ្កាលម្អនៅលើទ្រូងផ្លូវ ស្រោចទឹកថែទាំជារៀងរាល់ថ្ងៃ ដោយមន្ត្រីនៅតាមមន្ទីរនីមួយៗ ធ្វើឱ្យប្រជាពលរដ្ឋ ក៏ដូចជាភ្ញៀវទេស ចរណ៍មានការស្ញប់ស្ញែង និងកោតសរសើរ ព្រមទាំងសប្បាយរីករាយយ៉ាងខ្លាំង ដោយសង្ឃឹមថា នៅថ្ងៃខាងមុខនេះ ក្រោមការដឹកនាំរបស់លោក ផាន់ ចាន់ធុល អភិបាលខេត្ត នឹងមានការអភិវឌ្ឍន៍យ៉ាងឆាប់រហ័ស ។

ប្រភពព័ត៌មានពីលោក បាន សុខជា ជាមេការធ្វើផ្លូវក្រាលកៅស៊ូ បានរៀបរាប់បណ្តើរនិងដើរត្រួតពិនិត្យការងារបណ្តើរឱ្យដឹងថា នៅពេលនេះ ក្រុមការងាររបស់លោកបានយកល្បាយជ័យកៅស៊ូដែលបានលាយជាមួយកំទេចថ្មទៅចាក់ក្រាលនៅជុំវិញវិមានឯករាជ្យ ដើម្បីឱ្យផ្លូវថ្នល់កាន់តែខ្មៅរលោងស្អាត ងាយស្រួលក្នុងការធ្វើដំណើររបស់ពលរដ្ឋ ។

លោកបាន សុខជា បន្តទៀតថា ការក្រាលកៅស៊ូនេះ នឹងរៀបចំធ្វើជុំវិញសួនកន្លែងលេងកំសាន្ត និងតាមផ្លូវផ្សេងៗទៀត ជាច្រើនក្នុងក្រុងឱ្យមានខ្វាត់ខ្វែង ដើម្បីសម្រួលដល់ការចេញចូលរបស់ពលរដ្ឋ ក៏ដូចជាលំអ ទីរួមខេត្តឱ្យកាន់តែមានសោភ័ណភាព ស្រស់ស្អាតថែមទៀតផង ។

លោកបញ្ជាក់ទៀតថា ក្រោមការដឹកនាំរបស់លោក ផាន់ ចាន់ធុល អភិបាលខេត្តប៉ៃលិន អាណត្តិថ្មីនេះ គេឃើញមានការឈូសឆាយធ្វើសួនកុមារថ្មី ធ្វើផ្លូវថ្មីៗជាច្រើនខ្សែ ដែលជាហេតុ ធ្វើ ឱ្យពលរដ្ឋមានការភ្ញាក់ផ្អើល ហើយសង្ឃឹមថា នៅថ្ងៃខាងមុខ មិនត្រឹមតែផ្លូវនៅក្នុងទីក្រុងប៉ុណ្ណោះទេ សូម្បីតែនៅជនបទដាច់ស្រយាល ក៏មានផ្លូវខ្វាត់ខ្វែងផងដែរ ព្រោះវាប្រៀបបានទៅនឹងសរសៃឈាម ដែលធ្វើឱ្យសេដ្ឋកិច្ចយើងមានការរីកច្រើន និងងាយស្រួលក្នុងការដឹកកសិផលយកទៅលក់ដូរនៅទីផ្សារថែមទៀត ។

លោកបញ្ជាក់បន្តទៀតថា ចំណែកប្រជាពលរដ្ឋរស់នៅក្នុងក្រុងប៉ៃលិន បាននិយាយខ្សឹបខ្សៀវគ្នា កោតសរសើរដល់ អាជ្ញាធរខេត្ត ដែលដឹកនាំដោយអភិបាលខេត្តថ្មីថា មួយរយ:ពេលថ្មីនេះ គេឃើញអាជ្ញាធរខេត្តសម្រុ កសាងសង់ផ្លូវស្ទើរគ្រប់កន្លែង ទាំងផ្លូវក្នុងក្រុង និងនៅតាមស្រុកផងដែរ ។ ដូច្នេះ ពួកគាត់ជឿជាក់ថា បើមានផ្លូវល្អហើយ ការធ្វើដំណើរចេញចូលទៅមកក៏ស្រួល ។ ចំណែកការដឹកកសិផលទៅលក់ដូរក៏បានរហ័សទាន់ពេលវេលា មិនភ័យបារម្ភ ចំពោះការធ្វើចរាចរណ៍របស់សិស្សានុសិស្សទៅរៀនសូត្រក៏មានការងាយស្រួលផងដែរ ៕ (កែសម្រួលដោយ ៖ ធីតា)