ខេត្តប៉ៃលិន ៖ តារាចម្រៀងនិងជាតារាកំប្លែងល្បីនាយចឺម បានរងរបួសបែកក្បាល និងរបួសដៃ ក្រោយយុវជនម្នាក់បានចោទនាយថា «ឆាតហ្វេសបុកទាក់ទងលួងលោមសង្សាររបស់គេនាំទៅដេក» កើតឡើងនៅភូមិផ្សារព្រំ (ជាប់ព្រំដែនថៃ) វេលាម៉ោង៤និង២០នាទីទៀបភ្លឺ…
ខេត្តប៉ៃលិន ៖ តារាចម្រៀងនិងជាតារាកំប្លែងល្បីនាយចឺម បានរងរបួសបែកក្បាល និងរបួសដៃ ក្រោយយុវជនម្នាក់បានចោទនាយថា «ឆាតហ្វេសបុកទាក់ទងលួងលោមសង្សាររបស់គេនាំទៅដេក» កើតឡើងនៅភូមិផ្សារព្រំ (ជាប់ព្រំដែនថៃ) វេលាម៉ោង៤និង២០នាទីទៀបភ្លឺ ថ្ងៃទី១៨ ធ្នូ ២០១៩ ចំណុចបុរីម្កុដពេជ្រ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
សេចក្តីរាយការណ៍បន្តថា ជនរងគ្រោះឈ្មោះដើម សុខមេសា (ហៅនាយចឺម) អាយុ២២ឆ្នាំ ជាតារាចម្រៀងប្រចាំនៅផលិតកម្មសាន់ដេ និងជាតារាកប្លែង រស់នៅភូមិត្រាចកោះ ឃុំមហាឬស្សី ស្រុកគងពីសី ខេត្តកំពង់ស្ពឺ ។ ចំណែកជនសង្ស័យឈ្មោះ ង៉ែត លីទី ភេទប្រុស អាយុ២២ឆ្នាំ ជាបុគ្គលិកកាស៊ីណូ រស់នៅភូមិផ្សារព្រំជើង ឃុំស្ទឹងកាច់ សាលាក្រៅ ខេត្តប៉ៃលិន ដោយបានយកកំណាត់បន្ទះឈើប្រវែងប្រហែល១ម៉ែត្រ វាយជនរងគ្រោះរបួសកំភួនដៃទាំងសងខាង និងបែកក្បាលដេរអស់៥ថ្នេរ ព្រមទាំងបែកទូរស័ព្ទ ម៉ាកអាយហ្វូនអិចមួយគ្រឿង(ខូចខ្ទេចទាំងស្រុង) ។
ប្រភពបន្តថា ជនសង្ស័យបានក្លែងជា(សង្សារស្រី) បានឆាតតបទៅមកជាមួយនាយចឺមវិញ រហូតនាយចឺមបើករថយន្តម្នាក់ឯងទៅកាន់ដល់កន្លែងណាត់ជួបជាមួយជនសង្ស័យ ក៏បានប្រតាយប្រតប់គ្នា រហូតជនដៃដល់ទាញបានកំណាត់ឈើ វាយរងរបួសតែម្តង ។ តាមការឱ្យដឹងជនដៃដល់ថា មុនពេលកើតហេតុ ជនរងគ្រោះ(នាយចឺម) បានទៅចូលរួមច្រៀងក្នុងពិធីខួបកំណើតឱ្យគេម្នាក់ នៅភូមិផ្សារព្រំតាំងពីល្ងាចរហូតដល់យប់ជ្រៅក៏ចប់កម្មវិធី រួចចូលទៅដេកក្នុងផ្ទះសំណាក់ក្បែរនោះ លុះដល់ម៉ោងជាង២រំលងអធ្រាត្រ ថ្ងៃទីដដែល ក៏ចាប់ផ្តើមរាវរកលេខទូរស័ព្ទទាក់ទងទៅស្រីរបស់គេ ។
ពេលនោះ នាយចឺមបានទូរស័ព្ទទៅរកសង្សារគេចំនួន៣ទៅ៤ដង តែនាងកំពុងដេកលង់លក់ មិនបានលើកទូរស័ព្ទនិយាយឆ្លើយតបនោះទេ ទើបជនរងគ្រោះចាប់ផ្តើមឆាតជាសារទៅរកនាង ។ តែដោយសារជនសង្ស័យ ដាក់ភ្ជាប់ហ្វេសប៊ុកនាងទៅទូរស័ព្ទរបស់ខ្លួនដែរ ក៏ឃើញទើបឆាតតបជារបៀបផ្តោះផ្តងស្នេហាគ្នា រហូតដល់នាយចឺមឡើងកំដៅស្នេហ៍ ក៏បើករថយន្តម្នាក់ឯងទៅដល់មុខបន្ទប់ ស្របពេលជនដៃដល់ចេញមកឃើញ ក៏វាយប្រតាយប្រតប់គ្នា ហើយជនដៃដល់ក៏ទាញបានកំណាត់ឈើមួយវាយទៅលើជនរងគ្រោះ បណ្តាលឱ្យរបួសតែម្តង ។
ពាក់ព័ន្ធនឹងបញ្ហានេះ ភ្នាក់ងារកោះសន្តិភាពមិនអាចសុំការបំភ្លឺបន្ថែមពីនគរបាលនៃអធិការស្រុកសាលាក្រៅបានទេ ហាក់ដូចជាចង់បិទបាំងរឿងរ៉ាវ ។ រីឯនាយចឺម ជាជនរងគ្រោះ ភ្នាក់ងារនៅមិនអាចសុំការបំភ្លឺបាននៅឡើយដែរ ។ បច្ចុប្បន្នជនសង្ស័យ ត្រូវបាននគរបាលឃាត់ខ្លួននៅអធិការដ្ឋាននគរបាល ស្រុកសាលាក្រៅ ដើម្បីរៀបចំកសាងសំណុំរឿងបញ្ជូនទៅតុលាចាត់ការតាមនីតិវិធី ។
ចែករំលែកព័តមាននេះ