ខេត្តសៀមរាប ៖ ក្នុងពេលកម្ពុជាធ្វើជាប្រធានបណ្ដាញបញ្ញត្តិករថាមពលអាស៊ាន សម្រាប់ឆ្នាំ ២០១៨-២០១៩ កម្ពុជាបានធ្វើជាម្ចាស់ផ្ទះ ក្នុងកិច្ចប្រជុំបណ្ដាញបញ្ញត្តិករថាមពលអាស៊ាន លើកទី ១០ នៅខេត្តសៀមរាប ដោយមានការចូលរួមពីបញ្ញបត្តិករ ប្រទេសក្នុងតំបន់អាស៊ាន និងពីអគ្គលេខាធិការអាស៊ានផងដែរ ។ ក្នុងកិច្ចប្រជុំនោះ បណ្ដាប្រទេសនីមួយៗ បានចែករំលែកបទពិសោធន៍ ពីការអភិវឌ្ឍថាមពលរបស់ខ្លួនទៅកាន់ប្រទេសជាសមាជិក ដើម្បីយកទៅអភិវឌ្ឍន៍ថាមពលប្រកបដោយគុណភាព ។
ថ្លែងក្នុងកិច្ចប្រជុំនេះកាលពីថ្ងៃទី ១៧ ខែធ្នូ ឆ្នាំ ២០១៩ លោក យឹម វិសិដ្ឋ ប្រធានអាជ្ញាធរអគ្គិសនីកម្ពុជា និងជាប្រធានបណ្ដាញបញ្ញត្តិករថាមពលអាស៊ាន បានមានប្រសាសន៍ថា កិច្ចប្រជុំនេះ នឹងក្លាយជាវេទិកាដ៏សំខាន់ ដើម្បីចែករំលែកពីការអភិវឌ្ឍថាមពលរបស់ប្រទេសនីមួយៗ ក៏ដូចជាជជែកដោះស្រាយពីបញ្ហាថាមពលក្នុងតំបន់អាស៊ានផងដែរ ។ លោកបន្តថា «ក្នុងកិច្ចប្រជុំនេះដែរ ប្រទេសក្នុងតំបន់អាស៊ានក៏នឹងទទួលបាននូវបច្ចេកវិទ្យាថ្មីៗ ដែលសមាជិកធ្វើបានជោគជ័យ ដើម្បីចែកទៅដល់ប្រទេសមិនទាន់បានអនុវត្តន៍ផងដែរ» ។
លោកបន្តទៀតថា កិច្ចប្រជុំនេះក៏នឹងរៀបចំយុទ្ធសាស្ត្រថ្មីសម្រាប់អាណត្តិថ្មីឆ្នាំ ២០២០-២០២១ ផងដែរ ដែលជាការត្រូវគិតគូរជាមុន ដើម្បីអនុវត្តន៍ទាំងអស់អោយទទួលបានជោគជ័យផ្លែផ្កា និងបំពេញទៅតាមតម្រូវការថាមពលក្នុងបណ្ណាប្រទេសនីមួយៗ ។ សម្រាប់កម្ពុជា ការអភិវឌ្ឍថាមពលក្នុងឆ្នាំ ២០១៩ កន្លងទៅនេះ បើតាមរបាយការណ៍របស់អាជ្ញាធរអគ្គិសនីបានបង្ហាញថា ការតបណ្ដាញអគ្គិសនីចូលភូមិទូទាំងប្រទេសសម្រេចបាន ៩៩,៤៨ ភាគរយ ស្មើនឹង ១៤.០៩៥ ភូមិ នៅសល់តែចំនួន ៧៣ ភូមិទៀត នឹងគ្រប់ភូមិទាំងអស់ទូទាំងប្រទេសហើយ និងត្រូវសម្រេចអោយគ្រប់ទូទាំងប្រទេសនៅពេលឆាប់ៗខាងមុខនេះ ។
លោក យឹម វិសិដ្ឋ បានបញ្ជាក់ថា បណ្តាញជាតិ គឺជាប្រព័ន្ធផ្តល់សេវាបញ្ជូនអគ្គិសនីដែលមានហេដ្ឋារចនាសម្ព័ន្ធសំខាន់ៗ ៣ គឺបណ្តាញបញ្ជូនតង់ស្យុងខ្ពស់ អនុស្ថានីយ និងមជ្ឈមណ្ឌលបញ្ជា ។ ការអភិវឌ្ឍបណ្តាញជាតិមានគោលបំណងសំខាន់ៗ ៣ គឺ៖ ទី ១- បើកឱកាសឲ្យយើងអាចអភិវឌ្ឍន៍ប្រភពអគ្គិសនីដែលមានសក្តានុពល នៅទីតាំងផ្សេងៗ ភ្ជាប់បញ្ចូលមកក្នុងបណ្តាញជាតិ, ទី ២- គ្រប់គ្រងការទទួលប្រភពអគ្គិសនីទាំងនេះតាម ពេលវេលា និងរដូវកាលមកលាយបញ្ចូលគ្នាតម្រូវទៅតាមទំហំនៃសេចក្តីត្រូវការប្រើប្រាស់តាមពេលនីមួយៗ និងទី ៣- បញ្ជូនប្រភពអគ្គិសនីទាំងនេះទៅឲ្យរាជធានី-ខេត្ត និងតំបន់នានា តាមរយៈអនុស្ថានីយរបស់ខ្លួន ដើម្បីធ្វើការផ្គត់ផ្គង់អគ្គិសនីបន្តឲ្យទៅអ្នកប្រើប្រាស់ ហើយនៅចុងឆ្នាំ ២០១៩ នេះតាមរយៈហេដ្ឋារចនាសម្ព័ន្ធដែលមានខាងលើ បណ្តាញជាតិមានលទ្ធភាពនាំចូលប្រភពអគ្គិសនីពីប្រទេសវៀតណាម ។
របាយការណ៍ដដែលបានបង្ហាញថា នៅកម្ពុជា ការផ្គត់ផ្គង់អគ្គិសនីឱ្យប្រើប្រាស់តាមមធ្យោបាយរបស់អ្នកផ្គត់ផ្គង់មាន ៣ ប្រភេទ ទី ១- តាមរយៈអនុស្ថានីយបណ្ដាញជាតិចំពោះអ្នកប្រើប្រាស់អគ្គិសនីធុនធំ ដែលមានអានុភាពចាប់ពី ១០ មេហ្កាវ៉ាត់ឡើងទៅ ទី ២- តាមរយៈបណ្ដាញបញ្ជូនរងរបស់អ្នកបញ្ជូនរង ចំពោះអ្នកប្រើប្រាស់ធុនធំ MV ដែលមានអានុភាពចាប់ពី 275 KVA ឡើទៅ និងទី ៣- តាមរយៈបណ្ដាញចែកចាយ MV និង LV របស់អ្នកចែកចាយ ចំពោះអ្នកប្រើប្រាស់រាយដែលអានុភាពតូចជាង 275 KVA មានសិទ្ធិជ្រើសរើស ការផ្គត់ផ្គង់ចេញពីបណ្ដាញបញ្ជូនរងរបស់អ្នកបញ្ចូនរង ឬចេញពីបណ្ដាញ MV របស់អ្នកចែកចាយទៅតាមបំណងរបស់អ្នកប្រើប្រាស់ផងដែរ ។
តាមរបាយការណ៍នេះបង្ហាញថា គិតត្រឹមខែធ្នូ ឆ្នាំ ២០១៩ នេះការវិនិយោគលើហេដ្ឋារចនាសម្ព័ន្ធ បញ្ជូនរង និងប្រព័ន្ធចែកចាយដែលបានអភិវឌ្ឍន៍រួចសរុបជាទឹកប្រាក់ប្រមាណ ១,៥ពាន់លានដុល្លារអាមេរិក ក្នុងនោះឃើញថា ការវិនិយោគដោយឯកជនមានបរិមាណ និងទំហំច្រើនជាងការវិនិយោគដោយអគ្គិសនីកម្ពុជា ។
បើតាមមន្ត្រីនៃអគ្គិសនីកម្ពុជា បានលើកឡើងផងដែរថា បច្ចុប្បន្ននេះកម្ពុជាកំពុងកែប្រែ និងពង្រីកការវិនិយោគថាមពលអគ្គិសនីពីប្រព័ន្ធសូឡាបន្ថែមទៀត ដោយបានទាក់ទាញការវិនិយោគពីក្នុង និងក្រៅប្រទេស ដើម្បីបំពេញទៅតាមតម្រូវការជាក់ស្ដែងរបស់ខ្លួន ។ មិនមែនតែកម្ពុជាទេ ប្រទេសក្នុងតំបន់អាស៊ាន ក៏បាននិងកំពុងអភិវឌ្ឍន៍ថាមពល សូឡានេះកាន់តែច្រើនផងដែរ ដោយសារតែវាជាថាមពលដែលអាចកកើតឡើងវិញ និងមិនមានផលប៉ះពាល់ទៅដល់បរិស្ថាន ។
សូមរំឭកថាបច្ចុប្បន្ន ថាមពលដែលកំពុងប្រើប្រាស់ក្នុងប្រទេសកម្ពុជា មានប្រភពសំខាន់ៗមកពីប្រភពដុតធ្យូងថ្ម ប្រភពវារីអគ្គិសនី ប្រភពដុតប្រេង ប្រភពថាមពលកកើតឡើងវិញ ប្រភពបានមកពីអ្នកចែកចាយ និងអ្នកប្រើប្រាស់បានបញ្ចេញក្នុងរដូវប្រាំង និងប្រភពនាំចូលពីប្រទេសជិតខាង ដូចជាថៃ វៀតណាម និងឡាវ ៕ កែសម្រួលដោយ ៖ សុឃាក់
ចែករំលែកព័តមាននេះ