ប្រទេសអូស្ត្រាលី ៖ ថ្ងៃទី១៧ ខែធ្នូ ឆ្នាំ២០១៩ នេះ ជាថ្ងៃដែលក្ដៅខ្លាំងបំផុតនៅអូស្ត្រាលី ជាមួយសីតុណ្ហភាពខ្ពស់បំផុតគិតជាមធ្យមក្នុងកម្រិតជាតិ ៤០,៩អង្សាសេ ខណៈផ្នែកភាគច្រើនរបស់ប្រទេសមានសីតុណ្ហភាពដល់លើសពី៤៥អង្សាសេ។ នេះជាការប្រកាសកាលពីថ្ងៃទី១៨ធ្នូរបស់ការិយាល័យឧតុនិយម។
អាកាសធាតុក្ដៅខ្លាំងលើកមុនកាលពីខែមករាឆ្នាំ២០១៣ មានសីតុណ្ហភាព៤០,៣អង្សាសេ គិតជាមធ្យមក្នុងកម្រិតជាតិ។ ផ្នែកឧតុនិយមបន្តថាធាតុអាកាសក្ដៅខ្លាំងអាចមានលើសពីនេះទៀតមកពីរលកកម្ដៅខ្លាំង ដែលអាចឲ្យភ្លើងឆេះព្រៃដែលកំំពុងបំផ្លិចបំផ្លាញប្រទេសកាន់តែអាក្រក់ថែមទៀត។
អ្នកឧតុនិយមម្នាក់លោកស្រីDIANA EADIEថ្លែងថា តួលេខដំបួងបង្ហាញកាលពីថ្ងៃទី១៧ធ្នូ្នថា ថ្ងៃនោះជាថ្ងៃដែលក្ដៅបំផុតពុំធ្លាប់មាន ជាមួយសីតុណ្ហភាពលើសពី៤៥អង្សាសេក្នុងផ្នែកដ៏ធំរបស់ប្រទេស។
ធាតុអាកាសក្ដៅបំផុតក្នុងសប្ដាហ៍នេះមានក្នុងរដ្ឋអូស្ត្រាលីខាងលិច ដែលនៅទីនោះពួកអ្នកពន្លត់ភ្លើងកំពុងតែពុះពារពន្លត់ភ្លើងឆេះព្រៃ ដែលបំផ្លាញព្រៃឈើជាច្រើនពាន់ហិកតា៕ (កែសម្រួលដោយ ៖ បុប្ផា)
ចែករំលែកព័តមាននេះ