ព្រះមានព្រះភាគត្រាស់ថា បូជា ច បូជនីយានំ កិរិយាបូជាដល់បុគ្គលដែលគួរបូជា ជាមង្គលដ៏ឧត្តម ។
បូជាគឺការឱ្យឬការគោរពប្រតិបត្តិមានពីរយ៉ាងគឺ បូជាដោយការឱ្យសម្ភារផ្សេងៗ ហៅថាអាមិសបូជា និងបូជាដោយការគោរពត្រង់ត្រាប់ ស្តាប់គំនិត យោបល់ និងអនុវត្តតាម ហៅថា បដិបត្តិបូជា ។
ការបូជាជាការប្រសើរ ប៉ុន្តែបើបូជាដល់បុគ្គលពាលគ្មានគុណធម៌ គ្មានសីលធម៌ ក្រៅពីមិនបានផលល្អដល់ខ្លួនឯងនិងសង្គម ក៏នៅមានការបង្កក្តីអន្តរាយ ក្តៅក្រហាយដោយសារបុគ្គលពាលនោះថែមទៀតផង ជាពិសេសនឹងក្លាយជាអ្នកលើកតម្កើងសភាវៈអាក្រក់ចូលជុំជិតក្នុងជីវិត ។
ហេតុនេះការបូជាត្រូវតែធ្វើឡើងដោយបញ្ញា ធ្វើចំពោះបុគ្គលដែលគួរគោរពបូជា គឺបុគ្គលដែលមានគុណធម៌ខ្ពស់ មានសីលធម៌ដ៏ប្រពៃ និងជាបុគ្គលតែងធ្វើនូវសេចក្តីសុខចម្រើនដល់សង្គមមនុស្សជានិច្ច ។
បូជនីយបុគ្គលទាំងនេះ មានជាអាទិ៍ដូចជា ព្រះសង្ឃ មាតា បិតា គ្រូអាចារ្យ និងអ្នកដែលមានគុណូបក្ការៈចំពោះខ្លួន ឬចំពោះសង្គមជាតិជាដើម ការគោរពបូជាដល់បូជនីយបុគ្គលទាំងនោះ ជាមង្គលដ៏ឧត្តម ។ ដោយសាន សារិន
ចែករំលែកព័តមាននេះ