ប្រទេសលីបង់ ៖ មនុស្សច្រើនសិបនាក់រងរបួសកាលពីថ្ងៃទី១៧ធ្នូ មុនពេលព្រឹកព្រហាមនៅក្រុងបីរូត ក្នុងការប៉ះទង្គិចគ្នារវាងកងកម្លាំងប៉ូលិស និងបណ្ដាអ្នកគាំទ្រនៃចលនាស៊ីអ៊ីត២ ដែលវាយប្រហារលើជំរំនានារបស់ពួកបាតុករ ប្រឆាំងរដ្ឋាភិបាលដែលនាំឲ្យមានការភ័យខ្លាចដល់ភាពតានតឹងក្នុងប្រទេសដែលកំពុងមានវិបត្តិនេះ។
ឈានជិតដល់មាត់ជ្រោះនៃការដួលរលំខាងសេដ្ឋកិច្ច លីបងចាប់តាំងពីថ្ងៃទី១៧ ខែតុលាមក ផ្ទុះបាតុកម្មតវ៉ាដ៏ធំពុំធ្លាប់មានពីមុនមក ប្រឆាំងវណ្ណៈដឹកនាំដោយចោទថាពុករលួយនិងគ្មានសមត្ថភាព។ ប្រមុខចលនាស៊ីអ៊ីតហេសប៊ុលឡាហ៍លោកហាសាន់ណាស្ត្រាឡាហ៍និងប្រមុខគណបក្សAMAL លោកណាប៊ីហ៍ប័រជាប្រធានសភាចាប់តាំងពីឆ្នាំ១៩៩២មក ត្រូវបានពួកបាតុករចោទដូចមេដឹកនាំឯទៀតៗរបស់ប្រទេសដែរ។
ជារួមចលនាតវ៉ាប្រព្រឹត្តទៅដោយគ្មានឧប្បត្តិហេតុធំដុំ តែចាប់តាំងពីថ្ងៃទី១៤ធ្នូមក កើតមានការប៉ះទង្គិចគ្នានានា រវាងបាតុករនិងកងកម្លាំងប៉ូលិស ហើយនាយប់ថ្ងៃទី១៦ធ្នូរហូតដល់ព្រឹកព្រលឹមថ្ងៃទី១៧ធ្នូ មានការប៉ះទង្គិចខ្លាំង រវាងពួកអ្នកគាំទ្រចលនាហេសប៊ុលឡាហ៍ និងគណបក្ស AMAL និងកងកម្លាំងសន្តិសុខ។
អំពើហិង្សាចុងក្រោយនេះកើតឡើង ដោយសារការវាយប្រហាររបស់បណ្ដាមនុស្សនៃគណបក្សស៊ីអ៊ីតទាំង២ ប្រឆាំងបណ្ដាជំរំតវ៉ារបស់ពួកបាតុករនាកណ្ដាលក្រុងបីរូត។ ពួកយុវជនដែលលើកគ្នាមកដោយដើរ និងជិះម៉ូតូ បន្ទាប់មកបានគប់ដុំថ្ម និងគ្រឿងផ្ទុះប្រឆាំងប៉ូលិសនិងដុតរថយន្តនានា។ ប៉ូលិសបានតបតវិញដោយប្រើឧស្ម័នបង្ហូរទឹកភ្នែក។ ការប៉ះទង្គិចគ្នាបណ្ដាលឲ្យមនុស្សច្រើនសិបនាក់រងរបួស ក្នុងនោះ២៣នាក់បញ្ជួនទៅមន្ទីរពេទ្យ ហើយ៤៣នាក់ព្យាបាលនៅនឹងកន្លែង៕ (កែសម្រួលដោយ ៖ បុប្ផា)
ចែករំលែកព័តមាននេះ