សមយុទ្ធទ្រង់ទ្រាយធំ នៅបរិវេណព្រលានយន្តហោះអន្តរជាតិ (វីដេអូ)
- សៀមរាប
ខេត្តសៀមរាប ៖ លំហាត់សមយុទ្ធទ្រង់ទ្រាយធំគ្រប់គ្រងគ្រោះអាសន្នប្រចាំឆ្នាំ (Full Scale Airport_Emergency Exercise) ដែលមានឈ្មោះ (REPEX-19 )…
ខេត្តសៀមរាប ៖ លំហាត់សមយុទ្ធទ្រង់ទ្រាយធំគ្រប់គ្រងគ្រោះអាសន្នប្រចាំឆ្នាំ (Full Scale Airport_Emergency Exercise) ដែលមានឈ្មោះ (REPEX-19 )…
ខេត្តសៀមរាប ៖ លំហាត់សមយុទ្ធទ្រង់ទ្រាយធំគ្រប់គ្រងគ្រោះអាសន្នប្រចាំឆ្នាំ (Full Scale Airport_Emergency Exercise) ដែលមានឈ្មោះ (REPEX-19 ) បានចាប់ផ្តើមនាវេលាម៉ោងប្រមាណ៩ព្រឹក ថ្ងៃទី១៨ ខែធ្នូ ឆ្នាំ២០១៩នះ ក្នុងបរិវេណអាកាសយានដ្ឋានអន្តរជាតិសៀមរាប ។
លំហាត់សមយុទ្ធទ្រង់ទ្រាយធំខាងលើនេះ បានប្រព្រឹត្តិទៅក្រោមអធិបតីភាពលោក ទៀ សីហា អភិបាលខេត្តសៀមរាប, លោក ខាន់ វណ្ណា អគ្គនាយកនៃអគ្គនាយកដ្ឋានបច្ចេកទេស រដ្ឋលេខាធិការដ្ឋានអាកាសចរស៊ីវិល, លោក ប៊ុន រដ្ឋា នាយកអាកាសយានដ្ឋានអន្តរជាតិសៀមរាប , លោកឧត្តមសេនីយ៍ទោ ទិត្យ ណារ៉ុង ស្នងការនគរ បាលខេត្ត ក្នុងគោលបំណងធ្វើការសាកល្បង ហ្វឹកហ្វឺន និងផ្តល់បទពិសោធន៍ដល់ស្ថាប័ននានា ដែលមានការពាក់ព័ន្ធ សំដៅលើកកម្ពស់ការជួយសង្គ្រោះជនរងគ្រោះបានទាន់ពេលវេលា នៅពេលមានឧបទ្ទវហេតុគ្រោះថ្នាក់ធ្លាក់យន្តហោះ ដែលអាចកើតមានឡើងជាយថាហេតុ ផងដែរ ។
នៅក្នុងលំហាត់សមយុទ្ធទ្រង់ទ្រាយធំនេះ គឺមានការដុតប្រេង និងកង់ឡានចាស់ៗ បង្កើតជាអណ្តាតភ្លើង និងផ្សែងខ្មួលខ្មាញ់ជាសប្បនិម្មិតនៃការធ្លាក់យន្តហោះ មានការចល័តរថយន្តពន្លត់អគ្គិភ័យ ការដឹកជញ្ជូនជនរងគ្រោះទៅកាន់មន្ទីរពេទ្យនានា ក្នុងក្រុងសៀមរាប ដែលជាប្រធានបទ នៃការធ្វើលំហាត់សមយុទ្ធទ្រង់ទ្រាយធំនេះ ផងដែរ។
សូមបញ្ជាក់ផងដែរថា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានស្នើឱ្យប្រជាពលរដ្ឋទាំងអស់ កុំមានការព្រួយបារម្ភចំពោះសមយុទ្ធចំនួន២ ដែលកម្ពុជាបាននិងកំពុងរៀបចំនៅថ្ងៃទី១៨ ខែធ្នូ ឆ្នាំ២០១៩នេះ ហើយមិនត្រូវធ្វើការឃោសនា ឬផ្សព្វផ្សាយអកុសលចំពោះសមយុទ្ធទាំងនេះឡើយ។ ការលើកឡើងរបស់ប្រមុខរាជរដ្ឋាភិបាលកម្ពុជា បានធ្វើឡើងក្នុងពិធីប្រគល់សញ្ញាបត្រជូននិស្សិតសាកលវិទ្យាល័យវេស្ទើន ប្រមាណ ២,៨៣១នាក់ នៅមជ្ឈមណ្ឌលសន្និបាត និងពិព័រណ៍កោះពេជ្រ នាព្រឹកថ្ងៃទី១៨ ខែធ្នូ ឆ្នាំ២០១៩ នេះផងដែរ។
សម្តេចតេជោ ហ៊ុន សែន បានថ្លែងយ៉ាងដូច្នេះទៀតថា ៖ «នៅថ្ងៃនេះ មានសមយុទ្ធ២កើតឡើងផ្ទួនគ្នាតែម្តង គឺសមយុទ្ធទី១ ៖ គឺការសង្គ្រោះគ្រោះមហន្តរាយ ពេលមានឧបទ្ទវហេតុធ្លាក់យន្តហោះ នៅឯព្រលានយន្តហោះទីក្រុងសៀមរាប សូមកុំឱ្យមានការភ័យព្រួយ ឬក៏ការប្រើបណ្តាញសង្គម ហើយដែលលើកឡើងអំពីការមួលបង្កាច់ទាក់ទងនឹងការធ្លាក់យន្តហោះជាដើម»។
ដោយយមានការយកចិត្តទុកដាក់ពីសំណាក់ប្រមុខនៃរាជរដ្ឋាភិបាលកម្ពុជា រដ្ឋលេខាធិការដ្ឋានអាកាសចរស៊ីវិលកម្ពុជា និងអាជ្ញាធរខេត្តសៀមរាប សំដៅលើកកម្ពស់ប្រសិទ្ធភាព ក្នុងការជួយសង្គ្រោះជនរងគ្រោះបានទាន់ពេលវេលា នៅពេលមានឧបទ្ទវហេតុគ្រោះថ្នាក់ធ្លាក់យន្តហោះ ដែលអាចកើតមានឡើងជាយថាហេតុ ណាមួយផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ