ខេត្តស្វាយរៀង ៖ បើតាមសេចក្តីរាយការណ៍បឋមបានឱ្យដឹងថា ថ្នាំញៀនប្រភេទមេតំហ្វេតាមីនអាយ ចំនួន៤កញ្ចប់ធំលាក់ទុកក្នុងធុងបាស់រួចបម្រុងឆ្លងដែន ត្រូវបានសមត្ថកិច្ចធ្វើការបង្ក្រាប និងដកហូតបាន ខណៈពេលជនសង្ស័យបំរុងលួចនាំឆ្លងដែនទៅប្រទេសវៀតណាម។ បើតាមសមត្ថកិច្ចបានឱ្យដឹងថា ករណីបង្ក្រាបការដឹកជញ្ជូន…
ខេត្តស្វាយរៀង ៖ បើតាមសេចក្តីរាយការណ៍បឋមបានឱ្យដឹងថា ថ្នាំញៀនប្រភេទមេតំហ្វេតាមីនអាយ ចំនួន៤កញ្ចប់ធំលាក់ទុកក្នុងធុងបាស់រួចបម្រុងឆ្លងដែន ត្រូវបានសមត្ថកិច្ចធ្វើការបង្ក្រាប និងដកហូតបាន ខណៈពេលជនសង្ស័យបំរុងលួចនាំឆ្លងដែនទៅប្រទេសវៀតណាម។
បើតាមសមត្ថកិច្ចបានឱ្យដឹងថា ករណីបង្ក្រាបការដឹកជញ្ជូន រក្សាទុក និងជួញដូរដោយខុសច្បាប់នូវសារធាតុញៀនខាងលើនេះ ក្រោយពេលដែលសមត្ថកិច្ចកម្ពុជាទទួលព័ត៌មានពីខាងសមត្ថកិច្ចនៃប្រទេសវៀតណាមកាលពីថ្ងៃទី១៦ ខែធ្នូ ឆ្នាំ២០១៩ កន្លងទៅថា មានក្រុមឧក្រិដ្ឋជនបម្រុងយកគ្រឿងញៀនឆ្លងដែនទៅប្រទេសវៀតណាមតាមច្រកទ្វាអន្តរជាតិក្រុងបាវិត។
ប្រភពដដែលបានឱ្យដឹងទៀត លោកវរសេនីយ៍ឯក កែវ គង់ អធិការនគរបាលក្រុងបាវិតបានទទួលព័ត៌មានពីសមត្ថកិច្ចគយវៀតណាមតាមរយៈទូរស័ព្ទមកថា សមត្ថកិច្ចវៀតណាម បានឃាត់ខ្លួនបុរសជនជាតិកម្ពុជាម្នាក់ពាក់ព័ន្ធនឹងករណីដឹកជញ្ជូនគ្រឿងញៀនឆ្លងដែន និងដកហូតថ្នាំញៀនចំនួន១គីឡូក្រាមពីឈ្មោះ អ៊ុំ ណាំ ភេទប្រុស អាយុ១៧ឆ្នាំ មុខរបររត់ការលិខិតឆ្លងដែនកម្ពុជា-វៀតណាម មានទីលំនៅភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង។
កិច្ចប្របត្តិការណ៍បង្ក្រាបនេះ ដោយមានការសហការពីសមត្ថកិច្ចវៀតណាម កម្លាំងអធិការដ្ឋាននគរបាលក្រុងបាវិត ក៏បាននាំខ្លួនជនសង្ស័យខាងលើមកកម្ពុជាវិញ ដើម្បីធ្វើការសាកសួរ ។ បើតាមចម្លើយរបស់ជនសង្ស័យ បានឆ្លើយសារភាពថា មានអីវ៉ាន់ចំនួន២កេសទៀតផ្ញើទុកនៅហាងបាយយីហោ (តាលឿង) មានទីតាំងស្ថិតនៅភូមិវិតកណ្ដាល សង្កាត់បាវិត ក្រុងបាវិត ខេត្តស្វាយរៀង។
ប្រភពខាងលើបានបន្តទៀតថា នៅពេលបានតម្រុយដូច្នេះហើយ សមត្ថកិច្ចក៏បានចុះទៅត្រួតពិនិត្យអីវ៉ាន់នៅនោះដោយឃើញមានធុងបាស់ចំនួន២គ្រឿង ដោយមានការសង្ស័យសមត្ថកិច្ចក៏បានគាស់ធុងបាស់នោះដើម្បីធ្វើការត្រួតពិនិត្យ ក៏ស្រាប់តែប្រទះឃើញមានកញ្ចប់គួរឲ្យសង្ស័យចំនួន៤កញ្ចប់ធំ ជាម្សៅក្រាម ពណ៌សថ្លា ដោយសង្ស័យថា ជាថ្នាំញៀនប្រភេទមេតំហ្វេតាមីនអាយ (ម៉ាទឹកកក) ដោយក្នុង១ធុងបាស់នោះ គឺលាក់ទុកថ្នាំញៀនចំនួន២កញ្ចប់ធំ សរុបធុងបាស់ទាំង២គ្រឿងខាងលើនេះ គឺមាន៤កញ្ចប់ធំ។
បច្ចុប្បន្នសមត្ថកិច្ចបានឃាត់ខ្លួនជនសង្ស័យ និងវត្ថុតាងថ្នាំញៀន៤កញ្ចប់ធំ យកមករក្សាទុកនៅអធិការដ្ឋាននគរបាលក្រុងបាវិត ដើម្បីស្រាវជ្រាវរកមេក្ខោង មកផ្តន្ទាទោសតាមច្បាប់។
គួរបញ្ជាក់ថា សមត្ថកិច្ចកម្ពុជាបានចាប់គ្រឿងញៀនទាំងអស់ចំនួន៤កញ្ចប់ធំមានទម្ងន់៤,១៤០.០៨ក្រាម។ ប៉ុន្តែបើគិតទាំងខាងវៀតណាម ដែលចាប់បាននៅប្រទេសវៀតណាមទៀតនោះ សរុបទាំងអស់៥កញ្ចប់ធំ ស្មើជាង៥គីឡូក្រាម គិតទាំងសំបកវេចខ្ចប់។ (កែសម្រួលដោយ)
ចែករំលែកព័តមាននេះ