រាជធានីភ្នំពេញ ៖ វិទ្យាស្ថានខេមអេដប៊ីហ្សនេសស្គូល គឺជាវិទ្យាស្ថានឧត្តមសិក្សាដំបូងគេក្នុងប្រទេសកម្ពុជា ដែលទទួលបានការទទួលស្គាល់ជាអន្តរជាតិ ពីស្ថាប័នបណ្តាញសាកលវិទ្យាល័យអាស៊ាន (ASEAN University Network Quality Assurance) លើកម្មវិធីសិក្សាបរិញ្ញាបត្រ ផ្នែកគណនេយ្យ និងហិរញ្ញវត្ថុ។
នេះជាការលើករបស់លោក ឆូលទីស ឌីរ៉ាធិទិ ដែលជានាយកប្រតិបត្តិ នៃស្ថាប័នបណ្តាញសាកលវិទ្យាល័យអាស៊ាន (Asean University Network Quality Assurance) ក្នុងពិធីប្រគល់ វិញ្ញាបនបត្រទទួលស្គាល់គុណភាពអប់រំ លើកម្មវិធីសិក្សាបរិញ្ញាបត្រ ផ្នែកគណនេយ្យ និងហិរញ្ញវត្ថុ ពីស្ថាប័នបណ្តាញសាកលវិទ្យាល័យអាស៊ាន (Asean University Network Quality Assurance)ក្រោមអធិបតីភាពរបស់លោកយក់ ង៉ុយ រដ្ឋលេខាធិការ តំណាងដ៏ខ្ពង់ខ្ពស់លោកបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និង មានការអញ្ជើញចូលរួមពី លោក ខេស៊ី បាណេត នាយកវិទ្យាស្ថានខេមអេដ លោក ឆូលទីស ឌីរ៉ាធិទិ នាយកប្រតិបត្តិ នៃស្ថាប័នបណ្តាញសាកលវិទ្យាល័យអាស៊ាន (Asean University Network Quality Assurance) ភ្ញៀវជាតិ និងអន្តរជាតិ សាស្ត្រាចារ្យ និងសិស្សនិស្សិត ប្រមាណ ២៥០នាក់។
លោក ឆូលទីស ឌីរ៉ាធិទិ បានថ្លែងទៀតថា ៖ AUN-QA គឺជាស្ថាប័នធានាគុណភាពអប់រំ នៃបណ្តាញសាកលវិទ្យាល័យអាស៊ាន ដែលត្រូវបានទទួលស្គាល់ ជាសមាគមឧត្តមសិក្សា ដ៏មានកិត្យានុភាពក្នុងតំបន់អាស៊ាន ក្នុងនោះរួមមាន សាកលវិទ្យាល័យជាតិសិង្ហបុរី, សាកលវិទ្យាល័យម៉ាឡាយ៉ា នៃប្រទេសម៉ាឡេស៊ី, សាកលវិទ្យាល័យដឺឡាសាល នៃប្រទេសហ្វីលីពីន និងសាកលវិទ្យាល័យជូឡាឡុងកន នៃព្រះរាជាណាចក្រថៃ។
ការទទួលស្គាល់នេះ នឹងធ្វើអោយសិស្សនិស្សិតកម្ពុជា ដែលបញ្ជប់ការសិក្សាផ្នែកគណនេយ្យ នៅវិទ្យាស្ថានខេមអេដប៊ីហ្សនេសស្គូល មានឱកាសបម្រើរការក្នុងបណ្តាប្រទេសនៅតំបន់អាស៊ាន ដូចជាប្រទេសសិង្ហបុរី ជាដើម។ លើសពីនោះទៅទៀត ការទទួលស្គាល់ក៏ជួយសម្រួលដល់ និស្សិតដែលមានបំណងផ្ទេរការសិក្សា ឬបន្តការសិក្សាថ្នាក់ក្រោយឧត្តមសិក្សានៅមហាវិទ្យាក្រៅប្រទេសផងដែរ។
នៅក្នុងឱកាសនោះដែរ លោកយក់ ង៉ុយ រដ្ឋលេខាធិកាក្រសួងអប់រំ យុវជន និងកីឡា, បានថ្លែងថា ភាពជោគជ័យរបស់វិទ្យាស្ថានខេមអេដ ចំពោះការទទួលបានការទទួលស្គាល់គុណភាព ពីសំណាក់ស្ថាប័នបណ្តាញសាកលវិទ្យាល័យអាស៊ាន (AUN) គឺជាឱកាសដ៏ល្អមួយសម្រាប់សិស្សនិស្សិតកម្ពុជា ដែលកំពុងតែបន្តការសិក្សាថ្នាក់បរិញ្ញបត្រ នៅវិទ្យាស្ថាននេះ ដោយអាចទទួលបាននូវការអប់រំ ស្តង់ដាជាតិ និងអន្តរជាតិ។
បន្ថែមពីនោះលោក ក៏បានជម្រុញលើទឹកចិត្តដល់គ្រឹះស្ថានអប់រំទាំងអស់ ក្នុងប្រទេសកម្ពុជា អោយបន្ថែមការសហប្រតិបត្តិការជាមួយនឹងស្ថានប័នរដ្ឋ ក៏ដូចជាឯកជន អោយបានច្រើន ដើម្បីអភិវឌ្ឍកម្មវិធីសិក្សារបស់ខ្លួនអោយកាន់តែប្រសើរឡើង ឆ្ពោះទៅកាន់ការទទួលស្គាល់គុណភាពពីស្ថាប័នជាតិ និងអន្តរជាតិ ដូចជា ស្ថាប័នបណ្តាញសាកលវិទ្យាល័យអាស៊ាន (AUN-QA) ជាដើម។
លោក ខេស៊ី បាណេត បានបញ្ជាក់ថា វិទ្យាស្ថានខេមអេដ គឺជាវិទ្យាស្ថានតែមួយគត់ដែលទទួលបានការទទួលស្គាល់ពីសមាគមគណនេយ្យករជំនាញអន្តរជាតិ ACCA ដែលមាន ទីតាំងនៅក្នុងចក្រភពអង់គ្លេស លើផ្នែកគុណភាពនៃការអប់រំផ្នែកគណនេយ្យ ហិរញ្ញវត្ថុ និងសវនកម្ម ជំនាញ។ លើសពីនេះទៅទៀត ថ្នាក់បរិញ្ញាបត្រជំនាញគណនេយ្យ និងហិរញ្ញវត្ថុ របស់វិទ្យាស្ថាន ក៏ទទួលបានការទទួលស្គាល់គុណភាពពីសំណាក់ស្ថាប័នអ្នកជំនាញផ្នែកហិរញ្ញវត្ថុ CFA ដែលមានទីតាំងនៅ សហរដ្ឋអាមេរិក ផងដែរ។
ហើយពេលនេះកម្មវិធីដដែលនេះ ក៏ទទួលបានការស្គាល់ថ្មីមួយទៀត ពីស្ថាប័នបណ្តាញសាកលវិទ្យាល័យអាស៊ាន(AUN) ដែលមានទីតាំងនៅ ទីក្រុងបាងកក ប្រទេសព្រះរាជាណាចក្រថៃ។
គួរបញ្ជាក់ផងដែរថា មុននឹងឈានទៅដល់ ការទទួលបានការទទួលស្គាល់គុណភាពពីសំណាក់ស្ថាប័នបណ្តាញសាកលវិទ្យាល័យអាស៊ាន វិទ្យាស្ថានខេមអេដ ត្រូវឆ្លងកាត់ការវាយតម្លៃជាច្រើនដំណាក់កាល ទៅលើគុណភាពកម្មវិធីសិក្សា ក៏ដូចជាគុណភាពបង្រៀន ធៀបជាមួយនឹង លក្ខខណ្ឌស្តង់ដារគុណភាពអប់រំ របស់ស្ថាប័នបណ្តាញសាកលវិទ្យាល័យអាស៊ាន(AUN-QA)។ ភាពជោគជ័យនេះ ក៏មានការចូលរួម ពីកត្តា ៣សំខាន់ផងដែរ រួមមាន៖ ស្ថានប័នឯកជន, ស្ថាប័នរដ្ឋ និងវិទ្យាស្ថានខេមអេដ ផ្ទាល់ ៕ (កែសម្រួលដោយ ៖ បុប្ផា)
ចែករំលែកព័តមាននេះ